हिउँले छोपियो गोसाइँकुण्ड [फोटोफिचर]

कोरोना भाइरस महामारी अघि पनि हिउँ परेर मौसम खुलेपछि पर्यटकहरूको भीड लाग्ने गर्दथ्यो । गोसाइँकुण्ड समुन्द्र सतहदेखि ४ हजार ३ सय ८० मिटरको उचाईमा रहेको छ । यो प्रसिद्ध धार्मिक तथा पर्यटकीय गन्तव्यको रुपमा विकास भइरहेको छ । पौराणिक कथनअनुसार परापूर्वकालमा देवता र दानववीच समुन्द्र मन्थन हुँदा उत्पन्न कालकुट विष सेवन गरेका शिव शंकरले विषको डाह शान्त पार्न हिमालय खण्डको काखमा आई आफ्नो हातमा भएको त्रिशूलले भित्तामा हिर्काउँदा भिताबाट गंगाजल अर्थात् त्रिशूल धाराको उत्पत्ति भई उक्त धाराको पानीबाट गोसाइँकुण्डको बनेको किम्बदन्ती छ ।

कुण्डमा स्नान गरी भगवान् शिव शंकरको दर्शन गर्नाले जीवनभर गरेको पापबाट मुक्ति पाउने, पितृ तर्नुको साथै मनोकांक्षा पूरा हुने जनविश्वास रहेको छ । त्यसैले बर्सेनि हजारौं भक्तजनहरू कुण्डमा स्नानका लागि पुग्छन् । धार्मिक पर्यटनका हिसाबले गोसाइँकुण्ड स्वदेश तथा विदेशमा समेत प्रख्यात छ । यी तीर्थस्थल रसुवाको गोसाइँकुण्ड गाउँपालिका–५ लाङटाङ राष्ट्रिय निकुञ्जभित्र पर्छ । गोसाइँकुण्डमा प्रत्येक वर्ष गंगादसहरा र साउन शुक्ल पूर्णिमा अर्थात् (जनैपूर्णिमा) गरी वर्षको २ पटक विषेश मेला लाग्छ ।