१२.१२°C काठमाडौं
काठमाडौंमा वायुको गुणस्तर: १६३

कर्णालीको दामनमा हिउँ खेल्नेको घुइँचो

शब्द/तस्बिर : हरिहरसिंह राठौर

गुराँसे (दैलेख) — सुर्खेत-दैलेख सडक खण्डको छेडादेखि रातानाङ्‌लासम्म १५ किलोमिटर उकालो मोडमा शनिबार दिनभर सवारी जाम भयो । प्रदेश ट्राफिक प्रहरीलाई जाम व्यवस्थापन गर्न हम्मे हम्मे परेको थियो । उक्त अवस्था आउनुको कारण थियो गुराँसे लेकमा हिउँ खेल्न पुगेका सयौं मोटरसाइकल, निजी कार, भाडाका जीपहरु । कर्णाली प्रदेशको राजधानी सुर्खेतबाट सबैभन्दा नजिकै हिमपात हुने करिब २ हजार मिटर उचाईको दैलेख सिमानाको गुराँसे लेक नै हो ।

यस वर्ष बिहीबार रातिदेखि शुक्रबारसम्म हिमपात भएको थियो । विगत १० वर्षकै ठूलो हिमपात भएको गुराँस गाउँपालिका प्रमुख प्रशासकीय अधिकृत दिपक आचार्यले बताए । तराईका जिल्ला नेपालगन्ज, बर्दिया र भारतको रुपैडिया नाकाबाट पनि सबैभन्दा हिमपात हुने नजिकै पर्ने यही लेक हो । शनिबार हिमपातमा मनोरन्जन लिन सुर्खेतमात्रै हैन नेपालगन्ज, रुपैडियाबाट समेत गाडी रिजर्भ गरेर युवा, युवतीहरु आएका थिए ।

सबैका हात हातमा मोबाइल र सडकमा टिकटक बनाउनेहरुको भिड देखिन्थ्यो । कतिपयले त विभिन्न पहिरनमा टिकटक बनाउन विभिन्न पोसाक पनि लिएर आएका थिए । पर्यटकका कारण लादे र सिद्धपाइलाका साना होटलहरु भरिभराउ थिए । रातानाङ्ला र गुराँसेका होटलहरुलाई खाना र खाजा बनाउन भ्याइनभ्याइ थियो । हिउँ खेल्न पुग्ने सवारी साधनका कारण सार्वजनिक यातायात समेत अवरुद्ध बनेको थियो ।


प्रकाशित : माघ २२, २०७८ २०:५५
प्रतिक्रिया
पठाउनुहोस्