जिब्रो भन्छ- गुलियो-चिल्लो, मुटु भन्छ- नाइँ- विचार - कान्तिपुर समाचार
कान्तिपुर वेबसाईट
AdvertisementAdvertisement

जिब्रो भन्छ- गुलियो-चिल्लो, मुटु भन्छ- नाइँ

जिब्रोले स्वादमाथि नियन्त्रण गर्दै गएपछि ठूलो भुँडी घट्दै गयो । शरीर स्वस्थ भयो । अंग–प्रत्यंग स्वास्थ्य झन्झटबाट टाढा हुँदै गए ।
राजेन्द्र कोजु

अहा, रसबरी कस्तो मीठो ! कति रसिलो ! अझै त्यो स्वाद गा’ छैन ।’ जिब्रो एक्लै बोल्दै थियो । हड्डी नै नभएको ज्यानलाई कहिले तालुमा चिप्काउँदै, कहिले गालामा नचाउँदै, दाँतको कुनाकाप्चा चहार्दै खुसी भइरहेको थियो जिब्रो । ‘अझ त्यो मासुको झोलसँगको भात त ! जत्ति खाए ’नि नपुग्ने ।’ मासुको स्वाद सम्झँदै ओठ फेरि एक पटक चाट्यो जिब्रोले । ‘त्यो मोरो पेटले ठाउँ छैन भन्यो र पो ! नत्र त अर्को एक थाल खान्थें नि !’

जिब्रो खुसी भएर बोलेको अलिक मुनि रहेको मुटुले सुन्यो । जिब्रो र मुटुको धनी मनुवा भने बिन्दास घुरिरहेको थियो । टन्न भोज खाएर आएको शरीर, मस्त सुतिराखेको थियो ।

फोक्सो, मुटुजस्ता अंग सधैंझैं जागै थिए । जिब्रो खुसी हुँदै बरबराइरहेपछि मुटुले झपार्‍यो, ‘के फतफताइरा’ नसुती !’

जिब्रो पनि कड्कियो, ‘तँ सुत् न !’

‘तँजस्तो हो, मनुवा सुत्नासाथ आराम पाउने ? म ’नि निदाएर ढुकढुक गरिनँ भने त यो मनुवा चेट हुन्छ । तँ ’नि फतफत गर्न पाउँदैनस् ।’ मुटुले सही कुरा बोल्यो ।

‘साँच्ची, तँ सुतिस् भने त हामी सबै

सुइँकिन्छौं होला ।’

रिस अलि थामिएपछि मुटुले जिज्ञासा राख्यो, ‘अघिदेखि के बरबराउँदै थिइस् ?’

जिब्रोले गमक्क पर्दै भन्यो, ‘हैन, आज यो मनुवा भोजमा गा’ थियो । स्वादिलो खाना मस्तले खान पाइयो । मैले त बजाएँ, सब थरीका खाना । मासु नै पाँच थरी । त्यो स्वाद सम्झेर बस्या ।’

‘स्वादिलो थियो भनेर धेरै खानुपर्छ त ?’ मुटुले गाली गर्‍यो ।

‘अनि मीठो भएपछि खानुपरेन त ?’

‘तैंले धेरै खाए हामीलाई गाह्रो पर्छ नि !’

‘हँ ? के भन्छ यो ? मैले धेरै खाँदा तँलाई किन गाह्रो ? गाह्रो भए पेटलाई हुन्छ नि !’ जिब्रोले अनभिज्ञता प्रकट गर्‍यो ।

‘पेटलाइ त एक्कै छिन हो नि ! पेटबाट तल पुगेपछि यी गुलिया, चिल्ला, मीठामीठा खानेकुरा मसिनो हुँदै आन्द्राबाट सोसिन्छन् । त्यही सोसिएको खानेकुरा नै रक्तनली हुँदै कलेजो र शरीरका सबै भागमा पुग्ने हो । आवश्यकता अनुसार ठिक्क मात्रामा शरीरमा पुगे अमृत, धेरै मात्रामा पुगे त्यही बोसो भई जम्नाले रक्तनली साँघुरिएर विषजस्तै हुने त हो नि !’ मुटुले बेलीविस्तार लगायो ।

‘हो र ?’ जिब्रो छक्क पर्‍यो ।

‘खानेकुरामा पाइने पोषण तत्त्वहरू प्रोटिन, कार्बोहाइड्रेट, फ्याट (चिल्लो), भिटामिन, मिनरल (खनिज पदार्थ), पानी सबैको मात्रा मिले शरीरलाई राम्रो । आवश्यकताभन्दा धेरै भयो भने नराम्रो ।’ मुटुले भन्यो ।

‘अनि ?’ जिब्रो चाख मानी सुन्न थाल्यो ।

‘ती पोषण तत्त्वमध्ये धेरैले आवश्यकताभन्दा बेसी खानेचाहिँ कार्बोहाइड्रेट र फ्याट नै हो । त्यहीचाहिँ धेरै भयो भने शरीरलाई खराब हुन्छ ।’

‘त्यही कार्ब र फ्याटचाहिँ धेरै किन खान्छन् त ?’

‘तँलाई त्यही मन पर्छ ।’

‘मतलब ?’

‘तँलाई मिठाई, जेरी, रसबरी मन पर्दैन ? मासु मन पर्दैन ? भात, मैदा, आलुको परिकार, गुलियो पेय पदार्थ मन पर्दैन ? घिउ, तेल बेस्सरी हालेर तारेको मन पर्दैन ? बिस्कुट, जंक फुड मन पर्दैन ?’

‘त्यही त मीठो हुन्छ !’

‘त्यसैमा त धेरै कार्ब र फ्याट हुन्छ नि ! तँ त्यस्तै मीठोमीठो धेरै खान्छस्, सागसब्जी हेर्दैनस् र शरीरलाई रोगको पोको बनाउँछस् ।’

‘हो नि ।’ जिब्रोले स्वीकार गर्‍यो ।

‘त्यहीचाहिँ भएन । मिठाईमा हुने कार्ब; भात, मैदाबाट बन्ने खानामा हुने कार्ब; मासुमा हुने चिल्लो र अरू चिल्लोबाट पाइने फ्याट; तयारी खाना, जंक फुड, गुलियो पेय पदार्थ आदि जत्ति धेरै खाइन्छ, त्यति धेरै हानि हुन्छ,’ मुटुले सम्झायो ।

‘अनि मलाई त्यही मीठो लाग्छ,’ जिब्रो लाचारी प्रकट गर्‍यो ।

‘तेरै मीठो स्वादको लोभले त सबै बिग्रिरा छ,’

मुटु कड्कियो ।

‘त्यस्तो खाँदा खराब हुन्छ चाहिँ के त ?’

‘केचाहिँ हुन्न भन् न । प्रेसर बढ्दैन कि ? चिनी रोग हुने चान्स बढ्दैन कि ? मुटु रोगको सम्भावना बढ्छ । मृगौला खराब हुन सक्छ । पक्षाघात हुन सक्छ । आँखा खराब हुन सक्छन् । कलेजोलाई असर पर्छ ।’

‘हो र ?’ जिब्रो आत्तियो ।

‘यति मात्र हो र, योसँग सम्बन्धित अरू धेरै रोग ’नि छन् । हुँदाहुँदा, धेरै खाएर धेरै मोटा भएकाहरूमा बच्चा पेटमा आउन गाह्रो हुनेसम्म पनि हुन सक्छ ।’

‘हैट । अब म खान्नँ यस्ता कार्बसार्ब, फ्याटस्याट भा’ खानेकुरा ।’

‘तँलाई खाँदै नखा कल्ले भन्या छ र ? धेरै नखा पो भन्या । भोजभतेरमा धेरै नखा, गुलियो पेय नखा अनि भात, रोटी, मिठाई धेरै नखा पो भन्या त ! तैंले धेरै खान मन नगरे शरीर मोटो हुँदैन, शरीर हल्का हुन्छ, स्वास्थ्य पनि राम्रो हुन्छ ।’

‘अब म कार्ब र फ्याट धेरै खान्नँ । गुलियो पेय त पिउँदै पिउँदिनँ ।’ जिब्रोले वाचा गर्‍यो ।

‘बरु त्यसको सट्टा सागसब्जी, फलफूलमा ध्यान दे ।’

‘हुन्छ । म अब सागसब्जीले पहिला सन्तुष्ट हुन्छु । साग, मूला, काँक्रो, गाजर, बन्दालाई प्राथमिकता दिन्छु । भात अथवा रोटी अथवा चिउरा अथवा ब्रेड थोरै मात्र खान्छु । बरु मकै, कोदोको परिकार केही खान्छु । मासु पनि थोरै खान्छु ।’

‘त्यसो गरे त हामीलाई ’नि राम्रो हुन्छ ।’

‘स्वाद मलाई नै चाहिने हो । मैले नियन्त्रण गरे त भैहाल्यो नि । रह्यो मनको कुरा, मनलाई म सम्झाइहाल्छु,’ जिब्रोले भन्यो ।

यी दुईका कुरा मृगौलाले सुनिरहेको थियो । जिब्रोको सुध्रिने कुरा सुनेर उसले भन्यो, ‘क्या गज्जबको कुरा ! लौ छिटो व्यवहारमा उतार् ।’

पेटले दंग पर्दै भन्यो, ‘ल अब मलाई ’नि राम्रो हुने भो ।’

आन्द्रा झन् मक्ख पर्‍यो । ‘सबैभन्दा खुसी त मै हुन्छु होला । हरेक बिहान मलाई सजिलो हुन्छ । एकै छिनमा हल्का हुन पाउँछु ।’

गिदी र आँखा पनि दंग परे ।

सबै खुसी भएको देखेर जिब्रोलाई अचम्म लाग्यो । सोच्यो- यिनीहरू सबैलाई दुःख त मैले पो देको रैछु । आफू लोभी बनेर सबैलाई अप्ठ्यारामा पार्दै आएकामा उसलाई सरम पनि लाग्यो । र सबैले सुन्ने गरी घोषणा गर्‍यो, ‘अबदेखि म धेरै कार्ब र फ्याट भा’ खानेकुरा खान्नँ । सागसब्जीमा ध्यान दिन्छु । पानी पनि आवश्यक मात्रामा पिउँछु ।’ झट्ट सम्झिएर उसले सोध्यो, ‘चुरोटचैं के गर्नु नि ?’

सबैले एकस्वरमा गाली गरे, ‘धत्, त्यो नि सोध्ने हो ? छोडिहाल् ।’ फोक्सो आक्रोशित भएर बोल्यो, ‘तेरो त्यही अम्मलले गर्दा म सबै कालो भैसकें । अचेल कस्तो सास फुल्छ ! अझ क्यान्सर होला भन्ने कत्रो पीर छ ! छोडिहाल् ।’

‘पक्का छोड्छु,’ जिब्रोले भन्यो ।

यस्तैमा ठूलो भुँडी भएको मनुवा कोल्टे फेर्‍यो ।

०००

जिब्रोले स्वादमाथि नियन्त्रण गर्दै गएपछि, उसले प्रण नभुलेपछि ठूलो भुँडी घट्दै गयो । शरीर स्वस्थ भयो । अंग–प्रत्यंग स्वास्थ्य झन्झटबाट टाढा हुँदै गए ।

प्रकाशित : चैत्र २५, २०७८ ०७:४७
प्रतिक्रिया
पठाउनुहोस्

प्रतिनिधि चयनमै विवाद र तोडफोड

एन्फा अध्यक्षले जालझेल र षड्यन्त्र गरी चुनावी साधारणसभाका लागि प्रतिनिधि छनोट स्थगित गरेको आरोप
राजु घिसिङ

काठमाडौँ — अखिल नेपाल फुटबल संघ (एन्फा) ले आउँदो असार ६ गते हुने केन्द्रीय कार्यसमिति निर्वाचनका लागि प्रतिनिधि छनोट गर्न सहिद स्मारक ‘बी’ र ‘सी’ डिभिजन लिगका क्लबहरूलाई बिहीबार विहान ११ बजे एन्फा कम्प्लेक्स, सातदोबाटोमा बोलाएको थियो ।

क्लबका प्रतिनिधिहरू समयमै भेला भए । एन्फाको सचिवालयले बी र सी डिभिजन क्लबहरूका कागजात निर्वाचन समितिले दिउँसो ३ बजेमात्रै दियो । समितिले अपरान्ह ४ बजेपछि निर्वाचन कार्यतालिका निकाल्यो । तर, निर्वाचन कार्यतालिकाअनुसार काम अगाडि बढेन ।

बी र सी डिजिनमा १४–१४ क्लब छन्, यसमा ‘बी’ बाट ११ र ‘सी’ बाट ९ क्लब एन्फाको साधारणसभाका लागि मताधिकारसहितको प्रतिनिधि हुन पाउने व्यवस्था छ । एन्फा केन्द्रीय कार्यसमितिमा भएका पदाधिकारी यही प्रतिनिधि छनोटमा सहभागी हुन पाउने कि नपाउने भन्नेमा विवाद निस्कियो । कुनै पनि पदाधिकारी साधारणसभामा मताधिकारसहितको प्रतिनिधि हुन नपाउने एन्फाको विधान र निर्वाचन निर्देशिकामा प्रस्टै लेखिएको भए पनि महासचिव इन्द्रमान तुलाधरले त्यो नियम प्रतिनिधि छनोटको प्रक्रियामा पनि लागू हुने दाबी गरेपछि निर्वाचन समिति अन्योलमा पर्‍यो ।

अध्यक्ष कर्माछिरिङ शेर्पा (महासचिवसहित) र वरिष्ठ उपाध्यक्ष पंकजविक्रम नेम्वाङ पक्षवीच विवाद चर्किंदै गयो । आउने निर्वाचनमा शेर्पा र नेम्वाङ अध्यक्षमा उठ्ने तयारीमा छन् । निर्वाचन समितिले पनि निर्णय लिन सकेन र ‘सी डिभिजन मताधिकारका लागि ओसिस क्लबका अध्यक्ष उत्तम बस्नेतले उक्त निर्वाचन प्रक्रियामा प्रतिनिधिहरूको विषयउपर लिखित निवेदन उजुरी पेस गरेकामा उक्त विषयमा स्पष्ट रूपमा एन्फा सचिवालयबाट लिखित निर्णय तथा विगतका निर्वाचनका सम्पूर्ण कागजात र प्रक्रियाको पूर्ण विवरण उपलब्ध गराउन अनुरोध’ गर्दै निर्वाचन कार्यतालिका नै स्थगित गर्‍यो । त्यो पत्र समितिले सूचना बोर्डमा टाँस्न सकेन, बेलुकी साढे ७ बजे महासचिव तुलाधरलाई बुझाएर पदािधकारीहरू एन्फा मुख्यालयबाट बाहिरिए ।

रुष्ट देखिएका वरिष्ठ उपाध्यक्ष नेम्वाङले भने, ‘बी र सी डिभिजनबाट हाम्रो पक्षका साथीहरू आउने भयो । सी डिभिजनमा शतप्रतिशत र ‘बी’ मा बाहुल्य हाम्रै थियो । त्यसैले अध्यक्षज्यूको निर्देशनमा प्रतिनिधि छनोट नै स्थगित गरियो । जालझेल र षड्यन्त्र भयो । यसले नेपाली फुटबलमा राम्रो गर्दैन ।’ उनको आरोपबारे महासचिव तुलाधरले प्रतिक्रिया दिन अस्वीकार गरे ।

अध्यक्ष शेर्पानिकट मकवानपुर जिल्ला फुटबल संघका अध्यक्ष टीका लामाले निर्वाचन समितिका पदाधिकारीहरूलाई छनोट प्रक्रिया नरोके ‘आफ्नो ज्यानको सुरक्षा आफै गर्न’ भन्दै समितिको कार्यकक्षमै धम्की दिएका थिए । त्यसपछि एन्फाका केन्द्रीय सदस्य दावा लामाले निर्वाचन समितिको कम्प्युटर तोडफोड गरिदिए । उनले भने, ‘बिहान ११ बजेदेखि बोलाएको छ, निर्वाचन तालिका सार्वजनिक गरिएको छ, सबै साथीहरूले क्लबबाट निर्णय गरेर चिठी ल्याएको छ, निर्वाचन समितिले एन्फा सचिवालयले सहयोग गरेन भनेको छ, अध्यक्ष र महासचिवले बी र सी डिभिजन क्लबहरू आफ्नो पक्षमा नदेखेपछि फुटबल नै सिध्याउने षड्यन्त्र गरे । त्यसैले आक्रोशित भएको हो ।’ उनले चैत १५ भएको एन्फाको विशेष साधारणसभामा जस्तै क्लबहरूले प्रतिनिधि पठाएको दाबी गर्दै त्यसमा विवाद नभएको बताए ।

प्रकाशित : चैत्र २५, २०७८ ०७:३८
पूरा पढ्नुहोस्
प्रतिक्रिया
पठाउनुहोस्
x
×