बुढीगंगामा एमाले उम्मेदवारको अग्रता - स्थानीय तह निर्वाचन २०७९ - कान्तिपुर समाचार

बुढीगंगामा एमाले उम्मेदवारको अग्रता 

अर्जुन शाह

बाजुरा — बाजुराको बुढीगंगा नगरपालिकामा पुनः मतदानको प्रारम्भिक मतगणनामा एमाले उम्मेदवारले अग्रता लिएका छन् । एक हजार मतगणना हुँदा नगरप्रमुख पदमा एमाले उम्मेदवार रामबहादुर बानियाँले ५२० मत प्राप्त गरेका छन् भने कांग्रेस उम्मेदवार रंगबहादुर खातीले ४२७ मत पाएका छन् । 

वैशाख ३० गते स्थगित भई बिहीबार सम्पन्न मतदानको शुक्रबार दिउँसोदेखि गणना सुरु भएको हो । १० वटा वडा रहेको नगरपालिकामा सुरुमा वडा नम्बर १ र १० नम्बरको गणना भइरहेको छ ।

एक हजार १०९ मत खसेको १० नम्बरमा ६ सय गणना हुँदा एमाले उम्मेदवारले ३३५ र कांग्रेस उम्मेदवारले २४८ मत प्राप्त गरेको जिल्ला निर्वाचन कार्यालयले जनाएको छ । यस्तै ८३१ मत खसेको वडा नम्बर १ मा ४०० मतगणना हुँदा एमाले उम्मेदवारले १८५ र कांग्रेस उम्मेदवारले १९५ मत प्राप्त गरेका छन् । गणना भइरहेका दुवै वडामा वडाध्यक्ष पदमा पनि एमाले उम्मेदवारकै अग्रता छ । १३ हजार ६५९ मत कुल मतदाता रहेको बुढीगंगामा ९ हजार १२८ खसेको छ ।

प्रकाशित : असार २४, २०७९ २०:५६
प्रतिक्रिया
पठाउनुहोस्

पूर्वनगरप्रमुख बुढाथोकीद्वारा पत्रकार महासंघ सल्यानलाई २ लाख ८० हजार सहयोग

विप्लव महर्जन

सल्यान — जिल्लाको बाग्चौर नगरपालिकाका पूर्वनगर प्रमुख लोकमान बुढाथोकीले नेपाल पत्रकार महासंघ सल्यानलाई २ लाख ८० हजार ८ सय ४५ रुपैयाँ सहयोग गरेका छन् । 

आफू नगर प्रमुख भएका बेलामा सरकारले उपलब्ध गराएको तलब सुविधाबाट पत्रकार महासंघ शाखा सल्यानलाई रकम सहयोग गरेका हुन् । उनले शुक्रबार बाग्चौर नगरपालिकामा एक कार्यक्रम गरेर पत्रकार महासंघ शाखा सल्यानलाई २ लाख ८० हजार ८ सय ४५ रुपैयाँको चेक पत्रकार महासंघ शाखा सल्यानका अध्यक्ष नविन पौडेललाई हस्तान्तरण गरेका थिए । पूर्वनगरप्रमुख बुढाथोकीले सहयोग गरेको रकम पत्रकार महासंघले कार्यविधिअनुसार प्रयोग गर्ने सम्झौता समेत गरेको छ ।

पत्रकार समाजको ऐना भएकाले उनीहरुको हकहितका लागि सहयोग पुगोस् भनेर रकम सहयोग गरेको पूर्व नगरप्रमुख बुढाथोकीले बताएका छन् । उनले आफूले गरेको सहयोगले जिल्लाको पत्रकारितामा सहयोग पुग्ने विश्वास व्यक्त गरे ।

पूर्वनगरप्रमुख बुढाथोकीले सहयोग गरेको रकम पत्रकार राहत तथा अक्षयकोषमा राखेर त्यसबाट प्राप्त हुने ब्याजले प्रत्येक वर्ष उत्कृष्ट हुने एक जना पत्रकारलाई पुरस्कृत गरिने अध्यक्ष नविन पौडेलले बताए ।

प्रकाशित : असार २४, २०७९ २०:४८
पूरा पढ्नुहोस्
प्रतिक्रिया
पठाउनुहोस्
×