उपेन्द्रको पुत्रमोहले पराजय

विराटनगर — राजनीतिक नियुक्तिको जागिर खाँदाखाँदै तीन वर्ष पहिले जनता समाजवादी पार्टीको विराटनगर कमिटी अध्यक्ष बनेका थिए, अमरेन्द्र यादव । यो स्थानीय तह निर्वाचनमा सत्ता गठबन्धनको साथ पाए र विराटनगर महानगरपालिकाको उम्मेदवार बने । तर, उनले ठूलो मतान्तरले हार बेहोर्नुपरेको छ । उनको हारलाई धेरैले बाबु एवं जसपा अध्यक्ष उपेन्द्र यादवको खुम्चिँदो राजनीतिका रूपमा अर्थ्याएका छन् ।

उम्मेदवारी दर्ताकै दिनदेखि पार्टीभित्र अमरेन्द्रविरुद्ध मत तयार भएको थियो । तर, अध्यक्षको निर्णयका अघि असन्तुष्टहरू खुलेरै विरोधमा उत्रिन भने सकेनन् । निकटतम प्रतिद्वन्द्वीभन्दा झन्डै आधा मतले पराजित भएपछि पार्टीकै नेताहरूले यसलाई लज्जास्पद हारका रूपमा बताउन थालेका छन् । प्रतिस्पर्धी एमाले उम्मेदवार शिल्पा कार्कीले २५ हजार ६ सय ८० मत ल्याउँदा अमरेन्द्रले १४ हजार २ सय १९ मत मात्रै ल्याए । कतिसम्म भने उनले आफ्नै वडा विराटनगर–१४ मा कार्कीभन्दा आधा कम मत पाए । जसपाका केन्द्रीय सदस्य तथा प्रदेशका स्वास्थ्यमन्त्री जयराम यादवको गृहवडा भए पनि उनको प्रभाव देखिएन ।

स्थानीय नेताहरू जसपाले २०७४ सालमा हात पारेको विराटनगर र मोरङको उपलब्धि गुमाउनुका पछाडि अध्यक्ष उपेन्द्रलाई नै जिम्मेवार ठान्छन् । अघिल्लो निर्वाचनमा जसपाले विराटनगरमा ६ वटा वडामा अध्यक्ष जितेको थियो, यसपाला पार्टी दुई वडामा खुम्चियो । अघिल्लो निर्वाचनमा छिमेकी जहदा गाउँपालिका प्रमुख र उपप्रमुखसहित बहुमत वडा जितेको पार्टीले यसपाला त्यो सबै गुमाएको छ ।

उपेन्द्रले छोरालाई उपमयेरमा अघि सारेपछि संघीय परिषद् सदस्य उमेशकुमार यादवले पार्टी त्यागेर स्वतन्त्र रूपमा मेयरमा उम्मेदवारी दिएका थिए । उनले ८ हजार ७ सय ९५ मत ल्याए । ‘उनले पार्टी छाडेर स्वतन्त्रबाट मेयरमा उम्मेदवार दिनु र उनीसँगै स्थानीय सिनियर कार्यकर्ता उपेन्द्रविरुद्ध परिचालित हुनु नै विराटनगरमा जसपाको संगठन ध्वस्त हुनु हो,’ एक नेताले भने ।

‘परिवारवादको तानाशाही प्रवृत्ति सहन नसकेर पार्टी त्यागेको’ बताउने उमेश अध्यक्षकै कारण पार्टीले नोक्सान बेहोरोको टिप्पणी गर्छन् । ‘उपेन्द्रले छोरालाई मात्र होइन आफ्नो वडामा पार्टीका एक जनालाई समेत सदस्यमा जिताउन नसक्नु नै यसको प्रमाण हो,’ उनले भने । उपेन्द्रलेले मतदान गरेको विराटनगर–१४ मा एमालेको प्यानल विजयी भयो । यादवको घर भने वडा १० मा पर्छ । पार्टीका एक केन्द्रीय सदस्यले अध्यक्षको पुत्रमोहकै कारण पार्टीले जिल्लामा ठूलो क्षति भोग्नुपरेको बताए । उनले भने, ‘पानीमुनि बसेर गोहीको विरोध गर्न सकिँदैन तर उपेन्द्रको पुत्रमोहले विराटनगरको संगठन डुब्यो ।’