मतपरिणाम गलत सुनाएपछि रौतहटको गुजरामा मतगणना रोकियो- स्थानीय तह निर्वाचन २०७९ - कान्तिपुर समाचार
कान्तिपुर वेबसाईट
AdvertisementAdvertisement

मतपरिणाम गलत सुनाएपछि रौतहटको गुजरामा मतगणना रोकियो

शिव पुरी

रौतहट — मतपरिणाम नै गलत सुनाएपछि रौतहटको गुजरा नगरपालिकाको मतगणना शनिबार दिउँसोबाट रोकिएको छ । अन्तिम चरणमा पुगेको मतगणना निर्वाचन अधिकृतको लापरबाहीले रोकिएको हो ।

अहिले मतगणनास्थलबाहिर उम्मेदवार रसमर्थक नाराबाजीसहित धर्नामा बसेका छन् । उनीहरुले सुरुदेखि मत गन्नु पर्ने माग अघि सारेका छन् ।

मतगणनामा खटिएका इलाका प्रशासन गरुडाका कर्मचारी उपेन्द्र साहले जसपाका नगरप्रमुखका उम्मेदबार शन्तलाल चौधरीको छाता छाप र वडा नम्बर ५ का स्वतन्त्र उम्मेदवार शेख जमालुद्धीनले पाएको मत परिणाम गलत सुनाएपछि विवाद बढेको हो । मतगणनामा बसेका दलका प्रतिनिधिले राखेको तथ्यांक र सार्वजनिक गरिएको मत फरक भएपछि विवाद उत्पन्न भएको हो ।

निर्वाचन अधिकृत बद्रीनारायण शर्माले आफू खाना खान गएको बेला कर्मचारीले मतपरिणाम सुनाएको र त्यसमा त्रुटि भएको बताए । ‘हामीले मत गन्दाको अंक र सुनाइएको अंकमा कसरी फरक पर्न गयो भन्ने हेर्दैछौं,’ उनले भने,‘खाना खान गाएको बेला यता गडबड भएछ ।’

निर्वाचन अधिकृतले मतपरिणाम हेरेर मात्र सार्वजनिक गर्न निर्देशन दिनु पर्छ । कर्मचारीलाई मतपरिणाम जाँचेर निर्वाचन अधिकृतले हस्ताक्षर गरेपछि मात्र सुनाउनुपर्छ । निर्वाचन अधिकृतको लापरबाही देखिएको एमालेका नगरप्रमुखका उम्मेदवार शेख एकरामुलले बताए ।

‘हामीलाई अब शंका लाग्न थाल्यो,उनले भने,‘अंक बढाउने र घटाउने काम कर्मचारीबाट हुन थाल्यो । अघिका गणना भएको मत निष्पक्ष भन्नेमा शंका छ । अब निष्पक्ष मतगणना हुन्छ भनेर कसरी विश्वास गर्ने ।’ अहिले नेपाली कांग्रेस, नेकपा एमाले र एकीकृत समाजवादीले सुरुदेखि मत गन्नु पर्ने माग अघि सारेर आन्दोलन थालेका छन् । उनीहरूले निर्वाचन अधिकृत शर्मालाई हटाउन माग गरेका छन् । ५ र ६ नम्बर वडाको मत अझै गन्न बाँकी छ ।

जिल्ला प्रशासन कार्यालय गौरका नायब सुब्बा अधिकृत रामनरेश साहले कर्मचारीबाट तथ्यांक राख्ने क्रममा त्रुटि भएको स्विकारे । ‘मतपरिणाम सार्वजनिक गर्नु अगावै क्रस चेक गरेर मात्रै सुनाउनुपर्थ्यो,’ उनले भने, ‘कर्मचारी साथीहरू जे मन लाग्यो त्यही गरेर विवादमा पर्न थाले ।’ मतगणनामा त्रुटि हुन थालेको र पटक–पटक मतपरिणामको अंक फरक पार्न थालेको गुनासोपछि प्रमुख जिल्ला अधिकारी कृष्णबहादुर शाहीले साहलाई निगरानीका लागि पठाएका थिए ।

प्रकाशित : जेष्ठ ७, २०७९ १५:०२
प्रतिक्रिया
पठाउनुहोस्

रौतहटको कटहरिया नगरपालिकामा कांग्रेस विजयी

शिव पुरी

रौतहट — रौतहटको कहटरिया नगरपालिकाको प्रमुख र उपप्रमुखमा नेपाली कांग्रेस विजयी भएको छ । कांग्रेसका उम्मेदवार अजय प्रकाशले २ हजार ५ सय ९५ मत अन्तरले विजयी भएका हुन् । उनले ७ हजार १ सय ७२ मत प्राप्त गरेका छन् । उनका निकटतम प्रतिद्वन्द्वी नेकपा एमालेका सियारामप्रसाद कुशवाहाले ४ हजार ५ सय ७७ मत पाए । कुशवाहा निवर्तमान नगर प्रमुख हुन् ।

२०७४ मा भएको स्थानीय तह निर्वाचनमा कुशवाहा नेकपा माओवादीबाट विजयी भएका थिए । यसपालि एमाले प्रवेश गरेर नगरप्रमुखमा पुन: उम्मेदवारी दिएका थिए । निर्वाचित नगरप्रमुख अजय अघिल्लो निर्वाचनमा कुशवाहासित पराजित भएका थिए । यसपटक उनले कुशवाहालाई पराजित गरे ।

नगर उपप्रमुखमा कांग्रेसकै रिता देवी विजयी भइन् । रिताले ७ हजार ५ सय २० मत पाइन् । उनका निकटतम प्रतिद्वन्द्वी नेकपा एमालेका कुन्ती देवीले ४ हजार ५ सय ३७ मत पाइन् ।

९ वटा वडा रहेको कटहरिया नगरपालिकामा १ मा समाजवादीका वडाअध्यक्ष निर्वाचित भएका छन् । २, ३, ४ र ६ वडाहरुमा नेकपा एमाले र ५, ७, ८ र ९ नम्बर वडामा नेपाली कांग्रेसका वडाअध्यक्षहरु विजयी भएको निर्वाचन अधिकृतको कार्यालय कटहरियाले जनाएको छ ।


प्रकाशित : जेष्ठ ७, २०७९ ००:४३
पूरा पढ्नुहोस्
प्रतिक्रिया
पठाउनुहोस्
×