दाङको शान्तिनगर गाउँपालिकामा कांग्रेस विजयी- स्थानीय तह निर्वाचन २०७९ - कान्तिपुर समाचार

दाङको शान्तिनगर गाउँपालिकामा कांग्रेस विजयी

दुर्गालाल केसी

दाङ — शान्तिनगर गाउँपालिकामा कांग्रेस विजयी भएको छ । २०७४ को निर्वाचनमा पनि अध्यक्ष र उपाध्यक्ष कांग्रेसले नै जितेको थियो । अध्यक्षमा प्रमोद बस्नेत १ हजार १ सय ९२ मतान्तरले विजयी भएका छन् ।

उनले ५ हजार ७ सय १६ मत प्राप्त गरेका छन् भने उनका निकटतम प्रतिस्पर्धी एमालेका बिष्णुबहादुर केसीले ४ हजार ५ सय २४ मत प्राप्त गरेका छन् । माओवादी केन्द्रका मोहनलाल वलीले २ हजार ७ सय ९४ मत प्राप्त गरेका छन् । एमालेका केसी २०७४ को निर्वाचनमा पनि कांग्रेसका कमानसिंह डाँगीसँग अध्यक्षमा पराजित भएका थिए ।

उपाध्यक्षमा कांग्रेसकै प्रेमाकुमारी बुढाथोकी १ हजार ७ सय २२ मतान्तरले विजयी भएकी छिन् । उनले ५ हजार ७ सय ५० मत प्राप्त गरेकी छिन् भने निकटतम प्रतिस्पर्धी एमालेकी कमला भण्डारीले ४ हजार २८ मत प्राप्त गरेकी छिन् । माओवादी केन्द्रकी राधिका परियारले ३ हजार ८३ मत प्राप्त गरेकी छिन् । परियार २०७४ को निर्वाचनमा पनि उपाध्यक्षमा पराजित भएकी थिइन् ।

कांग्रेसले तीन, एमालेले दुई, माओवादी केन्द्रले एक र स्वतन्त्रले एक वडा जितेका छन् । कांग्रेसले ३, ५ र ७ नं. वडा, एमालेले ४ र ६ नं. वडा तथा माओवादी केन्द्रले १ नं. वडा जितेका छन् । वडा नं. २ मा कांग्रेसबाट बागी उठेका स्वतन्त्र उम्मेदवार २७ वर्षीय सुनिल वलीले जितेका छन् । शान्तिनगरमा २० हजार ८ सय ६३ मतदाता रहेकोमा १४ हजार ८ सय १ मत खसेको थियो ।


प्रकाशित : जेष्ठ ३, २०७९ १४:३२
प्रतिक्रिया
पठाउनुहोस्

दाङको तुलसीपुर-१७ मा आज मतदान

दुर्गालाल केसी

काठमाडौँ — नेकपा एमालेका तर्फबाट तुलसीपुर उपमहानगरपालिका १७ मा अध्यक्षका उम्मेदवार लवरु चौधरीको निधनका कारण स्थगित भएको मतदान मंगलबार बिहानदेखि सुरु भएको छ ।

निर्वाचनमा वडाध्यक्ष पदका लागि त्रिपक्षीय प्रतिस्पर्धा हुने भएको छ । गठबन्धन दलका तर्फबाट नेपाली कांग्रेसका थलराज पुरी, नेकपा एमालेका तर्फबाट स्वर्गीय लवरु चौधरीका छोरा प्रदिप चौधरी र स्वतन्त्र उम्मेदवार डिल्लीराज शर्मा अध्यक्षका प्रत्याशी बनेका छन् ।

अहिलेसम्म १३ प्रतिशत मत खसेको लुम्बिनी प्रदेश निर्वाचन कार्यालय दाङका प्रमुख नारायण भण्डारीले बताए । उक्त वडामा जम्मा ६ हजार १ सय १७ मतदाता रहेका छन् ।

प्रकाशित : जेष्ठ ३, २०७९ १०:०९
पूरा पढ्नुहोस्
प्रतिक्रिया
पठाउनुहोस्
×