स्याङ्जाको बिरुवा गाउँपालिकामा एमालेका कुँवर विजयी- स्थानीय तह निर्वाचन २०७९ - कान्तिपुर समाचार

स्याङ्जाको बिरुवा गाउँपालिकामा एमालेका कुँवर विजयी

प्रतीक्षा काफ्ले

स्याङ्जा — प्रमुख प्रतिस्पर्धी नेपाली कांग्रेसका डोलराज पोखरेललाई १ सय २६ मतान्तरले पछाडि पार्दै स्याङ्जा बिरुवा गाउँपालिका अध्यक्षमा नेकपा एमालेका सूर्य कुँवर विजयी भएका छन् । कुँवरले ४ हजार ८ सय ७२ मत ल्याउँदा कांग्रेसका पोखरेलले ४ हजार ७ सय ४६ मत प्राप्त गरे । पोखरेल विरुवा गाउँपालिकाको कांग्रेस सभापति समेत हुन् ।

यस्तै, उपाध्यक्षमा एमालेकै भगवती शर्मा विजयी भएकी छन् । निकतम प्रतिद्वन्द्वी माओवादी केन्द्रका थमनबहादुर गुरुङलाई १ हजार २ सय ६१ मतले पछाडि पार्दै विजयी भएकी शर्माले ४ हजार ९ सय ३७ मत प्राप्त गरेकी छन् । गुरुङले ३ हजार ६ सय ७६ मत प्राप्त गरे ।

यसैगरी बिरुवा गाउँपालिकाका ८ वडामध्ये १ मा कांग्रेसका राजेन्द्र केसी, २ मा कांग्रेसकै नोमबहादुर गुरुङ, ३ मा माओवादी केन्द्रकी मनुकुमारी थापा, ४ मा कांग्रेसका मुक्तबहादुर गुरुङ, ५ मा एमालेका नवीन थापा, ६ मा एमालेका कृष्ण क्षेत्री, ७ मा कांग्रेसका मेखराज गुरुङ र ८ मा एमालेका नवीन आले निर्वाचित भएको निर्वाचन अधिकृतको कार्यालयले जानकारी दिएको छ ।

प्रकाशित : जेष्ठ ३, २०७९ ०९:५१
प्रतिक्रिया
पठाउनुहोस्

स्याङ्जाको आँधीखोलामा एमालेका पौडेल निर्वाचित

प्रतीक्षा काफ्ले

स्याङ्जा — आँधीखोला गाउँपालिकाको अध्यक्ष पदमा नेकपा एमालेका विश्व पौडेल विजयी भएका छन् । प्रमुख प्रतिद्वन्द्वी नेपाली कांग्रेसका प्रेमराज पौडेललाई ८ सय २६ मतले पछाडि पार्दै पौडेल विजयी भएका हुन् । पौडेलले ५ हजार १ सय ७७ मत ल्याएका छन् भने प्रेमराजले ४ हजार ३ सय ५१ मत प्राप्त गरेका छन् ।

यस्तै, प्रमुख प्रतिद्वन्द्वी एकीकृत समाजवादीका रामचन्द्रप्रसाद पौडेललाई १ हजार ४ सय ५६ मतान्तरको फरकमा उपाध्यक्ष पदमा एमालेकै सीता थापा विजयी भएकी छन् । थापाले ५ हजार २ सय ७३ मत ल्याएकी छन् भने, रामचन्द्रले ३ हजार ८ सय १७ मत प्राप्त गरेका छन् । यसभन्दा अघि आँधीखोलामा एमालेबाटै अध्यक्ष र उपाध्यक्ष निर्वाचित भएका थिए ।

यस्तै आँधीखोलाको १ नम्बर वडामा एमालेका पवनकाजी अधिकारी निर्वाचित भएका छन् । यसैगरी २ नम्बर वडामा एमालेकै कमलप्रसाद पौडेल, ३ मा कांग्रेसका शेरबहादुर कार्की, ४ मा एमालेका सिंहबहादुर क्षेत्री, ५ मा एमालेका कृष्णप्रसाद पनेरु र ६ मा कांग्रेसका नवीन ढकाल निर्वाचित भएको निर्वाचन अधिकृत डिल्लीराम पौडेलले जानकारी थिए । यसभन्दा अघिल्लो स्थानीय तहको निर्वाचनमा आँधीखोलाका ६ वटा वडामा एमाले विजयी भएको थियो । यसपटकको निर्वाचनमा आफ्ना २ वटा वडा गुमाउन पुगेको छ ।

प्रकाशित : जेष्ठ २, २०७९ २३:४६
पूरा पढ्नुहोस्
प्रतिक्रिया
पठाउनुहोस्
×