अछामको तुर्माखाँदमा एमाले विजयी
अछाम — अछामको तुर्माखाँद गाउँपालिकामा नेकपा (एमाले)का उम्मेदवार विजयी भएका छन् । मंगलबार बिहान सार्वजनिक अन्तिम मतपरिणामअनुसार एमालेका डम्बर बीसी ३ हजार ५ सय २३ मत ल्याएर विजयी भएका हुन् ।
उनका निकटतम प्रतिद्वन्द्वी नेपाली कांग्रेसका कर्णबहादुर बुढाले ३ हजार ४ सय ९३ मत ल्याए । जुन बीसीभन्दा ३० मत मात्र कम हो । माओवादी केन्द्रका मनबहादुर बयकले ३०९१ मत ल्याए । उपाध्यक्षमा पनि एमालेले जितेको छ । एमालेकी विमला शाहीले ३ हजार ५ सय १ मत ल्याएर विजयी भइन् । प्रतिस्पर्धी कांग्रेसकी अनुजा सिंजापती विष्टले ३ हजार ४ सय ५२ मत ल्याइन् । माओवादी केन्द्रकी पवित्रा उपाध्यायले ३ हजार १ सय ५५ मत ल्याइन् ।
गाउँपालिकाका बहुमत वडामा भने कांग्रेस विजयी भएको छ । आठ वडा रहेको तुर्माखाँदमा रहफ, भुलू, नाडा, रानीवन र तोसीमा कांग्रेसले जित्यो । एमाले भैरवस्थान र धमालीमा विजयी बन्दा माओवादी केन्द्रले भने वडा नम्बर ४ मा मात्र जित्न सक्यो । तुर्माखाँदमा २०७४ सालको स्थानीय तह निर्वाचनमा कांग्रेस विजयी भएको थियो ।
