हुम्लाको चंखेली गाउँपालिकामा पुनः मतदान हुने
हुम्ला — हुम्लाको चंखेली गाउँपालिका २ को महादेव माध्यमिक विद्यालयको मतदान केन्द्रमा पुनः मतदान कार्य हुने भएको छ । गत वैशाख ३० गते सम्पन्न मतदानमा आधाभन्दा बढी मतदाताले मत खसाल्न नपाएको उजुरीका आधारमा आयोगले सो मतदान केन्द्रको मतदान कार्य पुनः गर्ने निर्णय गरेको हो ।
मुख्य निर्वाचन अधिकृत जगतबहादुर पौडेलले उक्त मतदान केन्द्रको मतदान कार्य पुनः हुने बताएका छन् । निर्वाचन कहिले गर्ने भन्ने निर्णय सम्बन्धित गाउँपालिकाको निर्वाचन अधिकृतको कार्यालयले गर्ने र मुख्य निर्वाचन अधिकृतको कार्यालयले कर्मचारी र मतपत्र पठाउने छ ।
यसका लागि आयोगबाट पत्रसमेत प्राप्त भएको उनले बताएका छन् । गठबन्धन दलहरूका तर्फबाट अध्यक्ष पदका उम्मेदवार गोविन्द शाही, नेपाली कांग्रेस र नेकपा माओवादी केन्द्रका नेताहरूले निर्वाचन अधिकृतको कार्यालय र स्थानीय प्रशासनसँग मतदान कार्य पुनः सञ्चालन गर्न माग गरेका थिए ।
स्वतन्त्र उम्मेदवार प्यारीलाल शाही पक्षले धाँधली गरेर मतदातालाई मत हाल्नबाट वञ्चित गरेको भन्दै पुनः मतदान गर्न गठबन्धन दलले माग गरेका थिए । गठबन्धन दलको मागमाथि छलफल गर्दा आयोग पुनः मतदान कार्य गराउने निष्कर्षमा पुगेको बताइएको छ ।
मतदान केन्द्रमा ९ सय ३ मतदाता रहेकोमा ३ सय ९० मत मात्र खसेको थियो । स्वतन्त्र उम्मेदवारको मात्र मत खसाल्न दिएको दाबी गठबन्धन दलहरुले गर्दै आएका थिए ।
