रामेछापको गोकुलगंगा गाउँपालिकामा कांग्रेसका उम्मेदवार विजयी - स्थानीय तह निर्वाचन २०७९ - कान्तिपुर समाचार
कान्तिपुर वेबसाईट
AdvertisementAdvertisement

रामेछापको गोकुलगंगा गाउँपालिकामा कांग्रेसका उम्मेदवार विजयी 

टीकाप्रसाद भट्ट

रामेछाप — रामेछापको गोकुलगंगा गाउँपालिका अध्यक्षमा नेपाली कांग्रेसका उम्मेदवार काजीबहादुर खड्का (दिनेश) विजयी भएका छन् । खड्काले एमालेका उम्मेदवार खड्गबहादुर सुनुवारलाई पराजित गरेका हुन् ।

निर्वाचन अधिकृत रामप्रसाद पौडेलका अनुसार खड्काले ६ हजार ९३ मत प्राप्त गरी अध्यक्षमा विजयी हासिल गरेका हुन् । उनका प्रतिस्पर्धी सुनुवारले ४ हजार ७ सय १० मत पाएका थिए । त्यसैगरी उपाध्यक्षमा नेपाली कांग्रेसकै उषादेवी कार्की विजयी भएकी छिन् । कार्की ५ हजार २ सय ५३ मत पाएर विजयी भएकी हुन् । कार्कीकी प्रतिस्पर्धी एमालेकी राधिका नेवार श्रेष्ठले ४ हजार ६ सय ८६ मत पाएकी थिइन् ।

गोकुलगंगा एमालेको आधार इलाकाको रुपमा रहेको थियो । यसअघिको निर्वाचनमा गाउँपालिकाको अध्यक्ष र उपाध्यक्षमा विजयी सुनुवार र नेवारलाई एमालेले यो पटक पनि उम्मेदवार बनाएको थियो । हालका विजयी खड्का नेपाल तरुण दल रामेछापका अध्यक्ष हुन् । खड्का राजनीतिक परिवार सदस्य हुन् । उनका बाबु स्व. पूर्णबहादुर खड्का २०४९ सालमा नामाडीको गाविस अध्यक्षमा निर्वाचित भएर काम गरेका थिए भने दाजु दीपक खड्का कांग्रेसको जिल्ला सचिव हुन् । १३ जना दाजुभाइमध्ये सबैभन्दा कान्छा काजीबहादुर खड्का युवा माझ लोकप्रिय छन् ।

प्रकाशित : जेष्ठ २, २०७९ १९:१४
प्रतिक्रिया
पठाउनुहोस्

राकाथुममा स्थगित मतदान सोमबार हुने

टीकाप्रसाद भट्ट

रामेछाप — रामेछापको खाँडादेवि गाउँपालिका वडा नम्बर १ राकाथुममा स्थगित भएको मतदान प्रक्रिया सोमबार पुन: सुरु हुने भएको छ । मूख्य निर्वाचन अधिकृतको कार्यालयका अनुसार निर्वाचन आयोगले तोके बमोजिम उक्त वडामा सोमबार फेरि मतदान हुन लागेको हो ।

वैशाख ३० गते मतदानको क्रममा नेपाली कांग्रेस र माओवादी केन्द्रका कार्यकर्ताबीच झडप हुँदा उक्त मतदान केन्द्रको मतदान स्थगित भएको थियो । तनाबग्रस्त अवस्थालाई नियन्त्रणमा लिन प्रहरीले उक्त केन्द्रमा ७ राउण्ड हवाई फायरसमेत गरेको थियो ।

जिल्ला निर्वाचन कार्यालयले राकाथुममा पुन: मतदान गराउनका लागि सम्पूर्ण तयारी पूरा भएको जनाएको छ ।

प्रकाशित : जेष्ठ १, २०७९ १०:१८
पूरा पढ्नुहोस्
प्रतिक्रिया
पठाउनुहोस्
×