कांग्रेसको गढमा राप्रपाको प्यानल नै विजयी- स्थानीय तह निर्वाचन २०७९ - कान्तिपुर समाचार
कान्तिपुर वेबसाईट
AdvertisementAdvertisement

कांग्रेसको गढमा राप्रपाको प्यानल नै विजयी

नारायण शर्मा

पूर्वी नवलपरासी — नेपाली कांग्रेसको गढ मानिने पूर्वी नवलपरासीको विनयी त्रिवेणी गाउँपालिका वडा नम्बर ७ मा राप्रपाको प्यानल विजयी भएको छ । राप्रपाका वडा नम्बर ७ का अध्यक्ष उम्मेदवार उमेश कार्कीको प्यानल नै निर्वाचित भएको हो ।

कार्कीले ९ सय ७० मतल ल्याएर निर्वाचित हुँदा कांग्रेसका गोपाल क्षेत्रीले ६ सय ५ मत ल्याएका हुन् । त्यहाँ यसअघिको निर्वाचनमा नेपाली कांग्रेसको प्यानलनै निर्वाचित भएको थियो ।

राप्रापाले जितेको यो स्थान भारतसँग सिमाना जोडिएको त्रिवेणी धाम हो । ०७४ सालको निर्वाचनमा यो जिल्लामा राप्रपाले एउटा सदस्य पनि जितेको थिएन ।

प्रकाशित : जेष्ठ १, २०७९ ०७:०३
प्रतिक्रिया
पठाउनुहोस्

चितवनमा एमाले ३, माओवादी २ र कांग्रेस एउटा वडामा विजयी

रमेशकुमार पौडेल

चितवन — सात स्थानीय तह रहेको चितवनका कुल ९८ वडाहरुमध्ये हालसम्म सातवटा वडाहरुको अन्तिम मत परिणाम आएको छ ।

जसमध्ये नेकपा एमालेले तीनवटा वडाहरुमा, माओवादी केन्द्रले दुई र नेपाली कांग्रेस तथा राष्ट्रिय प्रजातन्त्र पार्टी (राप्रपा)ले एक एक स्थानमा वडाध्यक्ष पदमा विजयी भएका छन् ।

राप्रपाका अमित लामा माडी नगरपालिकाको वडा नम्बर १ मा वडाध्यक्षमा विजयी भएका छन् । त्यसैगरी माडी नगरपालिकाको वडा नम्बर ९ मा माओवादी केन्द्रका घनश्याम दवाडी विजयी भएका छन् ।

इच्छाकामाना गाउँपालिकाको वडा नम्बर १ मा माओवादी केन्द्रका सन्तबहादुर मगर र वडा नम्बर २ मा नेकपा एमालेका पञ्चबहादुर चेपाङ वडाध्यक्ष पदमा विजयी भएका छन् ।

कालिका नगरपालिकामा वडा नम्बर १ मा नेपाली कांग्रेसका सन्तवीर स्यान्ताङ र वडा नम्बर ११ मा एमालेका कृष्णबहादुर चेपाङ वडाध्यक्षमा विजयी भएको कालिका नगरपालिकाका निर्वाचन अधिकृत महेशप्रसाद खत्रीले जानकारी दिए ।

त्यसैगरी चितवनको राप्ती नगरपालिकाको वडा नम्बर ६ मा एमालेका जल्लु महतो थारु वडाध्यक्षमा विजयी भएका छन् । सात स्थानीय तह रहेको चितवनमा मतगणना जारी छ ।

भरतपुर महानगरपालिका, रत्ननगर र खैरहनी नगरपालिकामा मेयर उपमेयर पदमा सत्तारुढ गठबन्धनका उम्मेदवारहरू अगाडि छन् । त्यस्तै माडी नगरपालिकाको मेयरमा एमाले र उपमेयरमा सत्तारुढ गठबन्धनका उम्मेदवार अग्रस्थानमा छन् । राप्ती र कालिका नगरपालिकाको मेयर उपमेयर तथा इच्छाकामाना गाउँपालिकाको प्रमुख उपप्रमुखमा एमालेका उम्मेदवारहरू अगाडि छन् ।

प्रकाशित : जेष्ठ १, २०७९ ०७:०१
पूरा पढ्नुहोस्
प्रतिक्रिया
पठाउनुहोस्
×