पुनः मतदान गर्नुपर्ने माग राख्दै मेलम्ची र पाँचपोखरीमा मतगणना ठप्प- स्थानीय तह निर्वाचन २०७९ - कान्तिपुर समाचार

पुनः मतदान गर्नुपर्ने माग राख्दै मेलम्ची र पाँचपोखरीमा मतगणना ठप्प

अनिश तिवारी

सिन्धुपाल्चोक — नेकपा माओवादी केन्द्रलगायत दलका कार्यकर्ताले सिन्धुपाल्चोकको मेलम्ची नगरपालिका ९ ज्यामिरे र पाँचपोखरी थाङपाल गाउँपालिका ७, भोटेनाम्लाङमा पुनः मतदान गर्नुपर्ने माग राखेर विरोध गरेपछि मतगणना अझै सुरु हुन सकेको छैन । शनिबार बिहानैदेखि ठप्प मतगणना सुरु गर्नका लागि धेरै पटक सर्वदलीय छलफल गरिए पनि सहमति नजुट्दा अहिलेसम्म मत गणना सुरु हुन नसकेको हो ।

‘स्थानीय र दलका कार्यकर्ताले पुनः मतदान गर्नुपर्ने माग राख्दै मतगणना रोकेका छन् । मेलम्ची नगरमा अहिले पनि छलफल भइरहेको छ,’ रिजालले भने ।

शुक्रबार पाँचपोखरी थाङपाल गाउँपालिकामा एमाले, राप्रपजस्ता मुख्य दलले कसैलाई छिर्न नदिई बुथ कब्जा गर्दै मतदान गरेकाले विश्वसनीय नभएको भन्दै स्थानीय र कार्यकर्ता आक्रोशित भएका थिए । त्यही आरोपप्रत्यारोप झडपमा बदलिँदा अहिले एमाले र माओवादी केन्द्रका कार्यकर्ताबीच झडपको स्थिति बनेको छ ।

चर्को झडपको अवस्था रोक्न सुरक्षाकर्मीले चारैतिर गस्ती बढाएको जिल्ला प्रहरी नायव उपरीक्षक दक्षकुमार बस्नेतले बताए । ‘दुवै क्षेत्रमा विशेष सुरक्षाकर्मी खटिएका छन् । पाँचपोखरी थाङपाल गाउँपालिकामा झडपको अवस्था बनेपछि प्रहरी पुगिसकेको छ । अन्य दलीय छलफल अघि बढाउने प्रयास थालिएको छ,’ डीएसपी बस्नेतले भने ।

त्यस्तै मेलम्ची नगरको गोल्माथान स्वास्थ्य चौकीमा शुक्रबारदेखि सुरु भएको मतदानबारे विवाद अझै नरोकिँदा मतगणना सुरु हुन सकेको छैन । कांग्रेसका उम्मेदवारले एकलौटी मतदान गर्न लगाएको आरोपमा एमाले र अन्य दलका कार्यकर्ताले यहाँ पुन मतदान गर्नुपर्ने माग राखेका छन् । एमाले र कांग्रेसका कार्यकर्ताबीच धकेलाधकेलबाट सुरु भएको विवाद झडपमा परिणत हुँदा कांग्रेसका एक कार्यकर्ता घाइतेसमेत भएका थिए ।

कांग्रेसका उम्मेदवारले भने एमालेका एक कार्यकर्ताले फर्जी मत हालेको र सामाजिक सञ्जालमा बुथ कब्जा भएको हल्ला फिँजाएपछि विवाद सुरु भएको आरोप लगाएका छन् । नेपाली सेनाले बन्दुक तेर्स्याएपछि स्थानीय मतदाता आक्रोशित बनेका छन् । मतदान सकिएपछि पनि एमालेका प्रतिनिधिले हस्ताक्षर नगरी मतदानस्थल छाडेर हिँडेपछि अन्य दलको हस्ताक्षरपछि मतपेटिका सुरक्षित राखिएको थियो । दुवै क्षेत्रमा केही दलका स्थानीय कार्यकर्ता र मतदाताले पुनः मतदान गर्नुपर्ने माग राखेपछि विवाद अझै सुल्झिन सकेको छैन ।

प्रकाशित : वैशाख ३१, २०७९ १९:३६
प्रतिक्रिया
पठाउनुहोस्

बाजुराको बुढीगंगाका निर्वाचन अधिकृतद्वारा राजीनामा

अर्जुन शाह

बाजुरा — बाजुराको बुढीगंगा नगरपालिकाका निर्वाचन अधिकृत उपसचिव कृष्ण सापकोटाले राजीनामा दिएका छन् । शुक्रबार मतदानको दिन अधिकांश मतदान केन्द्रमा तनाव तथा स्वतन्त्र र निष्पक्ष मतदान प्रभावित भएको, त्यहीकारण आफूलाई सुरक्षाको जोखिम रहेको भन्दै उनले राजीनामा दिएका हुन् । उनको राजिनामा स्वीकृत भए/नभएको जिल्लामा जानकारी छैन । आफु असुरक्षित हुनुका साथै हुलहुज्जत हुनसक्ने भन्दै उनले राजिनामा दिएको मुख्य निर्वाचन अधिकृत माधवप्रसाद घिमिरेले बताए । 

पालिकाका विभिन्न केन्द्रमा स्वतन्त्र तथा निष्पक्ष मतदान हुन नसकेको भन्दै शुक्रवार कांग्रेस कार्यकर्ताले निर्वाचन अधिकृत सापकोटालाई नियन्त्रणमा राखेका थिए । मतदान कै दिनदेखि आफु असुरक्षित रहेको भन्दै शनिबार दिउँसो कार्यालय छाडेर सदरमुकाम मार्तडी आउँदै गर्दा उनलाई एमाले कार्यकर्ताले बार्जुगाढबाट नियन्त्रणमा लिएर पालिकास्थित निर्वाचन कार्यालयमा फर्काएर मतपेटिका बुझ्न लगाएका छन् । यतिबेला उनको थप सुरक्षा ब्यवस्था मिलाइएको मुख्य निर्वाचन अधिकृत घिमिरेले बताए ।

बुढीगंगा नगरपालिका अन्तर्गतका विभिन्न मतदान केन्द्रमा शुक्रबार मतदानका क्रममा झडप, उम्मेदवार घाइते, बुथकब्जा, उम्मेदवार मतदान केन्द्रबाट लखेटिएका, सुरक्षाकर्मीले मतेपटिका छाडेर मतदान केन्द्रबाट हिँडेकोलगायतका घटना भएका थिए ।

उपसचिव सापकोटा मतदानकै दिनदेखि दोहोरो दवावमा रहेको बुझिएको छ । शनिबार दिउँसोसम्म दश वटा वडा रहेको बुढीगंगाका कुनै पनि मतदान केन्द्रको मतपेटिका निर्वाचन कार्यालयले बुझ्न मानेको थिएन । एमालेले मत पेटिका बुझेर मतगणना गर्न भनिरहेको छ भने कांग्रेसले केही मतदान केन्द्रमा एकलौटी भएको आरोप लगाउँदै पुनः मतदानको माग गरिरहेको छ । खास गरी बुढीगंगाका २,३,५ र ९ मा एमालेले बुथ कब्जा गरेको कांग्रेसको आरोप छ भने ४ र ७ नम्बरमा कांग्रेसले बुथ कब्जा गरेको एमालेको दावी छ ।

जिल्ला निर्वाचन ब्यवस्थापन समितिले सर्वदलीय बैठक बसिरहेको भएपनि सहमति हुन सकिरहेको छैन । बुढीगंगाका अधिकांश मतदानकेन्द्रहरु शुक्रबार तनावग्रस्त भएका थिए ।

त्यसक्रममा एमाले र कांग्रेसको आआफ्नो वर्चस्व रहेको केन्द्रमा एकलौटी मतदान गरेका स्थानीयको भनाई छ । बुढीगंगाका ६ वटा मतदानकेन्द्रमा वडाध्यक्षका उम्मेदवारहरु मतदान केन्द्रबाटै लखेटिएका मतदान गर्न नपाएका सर्वसाधारणले बताएका छन् ।


प्रकाशित : वैशाख ३१, २०७९ १९:२८
पूरा पढ्नुहोस्
प्रतिक्रिया
पठाउनुहोस्
×