बाजुराको बुढीगंगाका निर्वाचन अधिकृतद्वारा राजीनामा- स्थानीय तह निर्वाचन २०७९ - कान्तिपुर समाचार

बाजुराको बुढीगंगाका निर्वाचन अधिकृतद्वारा राजीनामा

अर्जुन शाह

बाजुरा — बाजुराको बुढीगंगा नगरपालिकाका निर्वाचन अधिकृत उपसचिव कृष्ण सापकोटाले राजीनामा दिएका छन् । शुक्रबार मतदानको दिन अधिकांश मतदान केन्द्रमा तनाव तथा स्वतन्त्र र निष्पक्ष मतदान प्रभावित भएको, त्यहीकारण आफूलाई सुरक्षाको जोखिम रहेको भन्दै उनले राजीनामा दिएका हुन् । उनको राजिनामा स्वीकृत भए/नभएको जिल्लामा जानकारी छैन । आफु असुरक्षित हुनुका साथै हुलहुज्जत हुनसक्ने भन्दै उनले राजिनामा दिएको मुख्य निर्वाचन अधिकृत माधवप्रसाद घिमिरेले बताए । 

पालिकाका विभिन्न केन्द्रमा स्वतन्त्र तथा निष्पक्ष मतदान हुन नसकेको भन्दै शुक्रवार कांग्रेस कार्यकर्ताले निर्वाचन अधिकृत सापकोटालाई नियन्त्रणमा राखेका थिए । मतदान कै दिनदेखि आफु असुरक्षित रहेको भन्दै शनिबार दिउँसो कार्यालय छाडेर सदरमुकाम मार्तडी आउँदै गर्दा उनलाई एमाले कार्यकर्ताले बार्जुगाढबाट नियन्त्रणमा लिएर पालिकास्थित निर्वाचन कार्यालयमा फर्काएर मतपेटिका बुझ्न लगाएका छन् । यतिबेला उनको थप सुरक्षा ब्यवस्था मिलाइएको मुख्य निर्वाचन अधिकृत घिमिरेले बताए ।

बुढीगंगा नगरपालिका अन्तर्गतका विभिन्न मतदान केन्द्रमा शुक्रबार मतदानका क्रममा झडप, उम्मेदवार घाइते, बुथकब्जा, उम्मेदवार मतदान केन्द्रबाट लखेटिएका, सुरक्षाकर्मीले मतेपटिका छाडेर मतदान केन्द्रबाट हिँडेकोलगायतका घटना भएका थिए ।

उपसचिव सापकोटा मतदानकै दिनदेखि दोहोरो दवावमा रहेको बुझिएको छ । शनिबार दिउँसोसम्म दश वटा वडा रहेको बुढीगंगाका कुनै पनि मतदान केन्द्रको मतपेटिका निर्वाचन कार्यालयले बुझ्न मानेको थिएन । एमालेले मत पेटिका बुझेर मतगणना गर्न भनिरहेको छ भने कांग्रेसले केही मतदान केन्द्रमा एकलौटी भएको आरोप लगाउँदै पुनः मतदानको माग गरिरहेको छ । खास गरी बुढीगंगाका २,३,५ र ९ मा एमालेले बुथ कब्जा गरेको कांग्रेसको आरोप छ भने ४ र ७ नम्बरमा कांग्रेसले बुथ कब्जा गरेको एमालेको दावी छ ।

जिल्ला निर्वाचन ब्यवस्थापन समितिले सर्वदलीय बैठक बसिरहेको भएपनि सहमति हुन सकिरहेको छैन । बुढीगंगाका अधिकांश मतदानकेन्द्रहरु शुक्रबार तनावग्रस्त भएका थिए ।

त्यसक्रममा एमाले र कांग्रेसको आआफ्नो वर्चस्व रहेको केन्द्रमा एकलौटी मतदान गरेका स्थानीयको भनाई छ । बुढीगंगाका ६ वटा मतदानकेन्द्रमा वडाध्यक्षका उम्मेदवारहरु मतदान केन्द्रबाटै लखेटिएका मतदान गर्न नपाएका सर्वसाधारणले बताएका छन् ।


प्रकाशित : वैशाख ३१, २०७९ १९:२८
प्रतिक्रिया
पठाउनुहोस्

राजविराजमा २ सय मत गन्दा मेयरमा ४१ र उपमेयरमा ५७ मत बदर

अवधेशकुमार झा

राजविराज — सप्तरीको राजविराज नगरपालिकामा २ सय मत गन्दा नगरप्रमुख पदमा ४१ र उपप्रमुखमा ५७ मत बदर भएको छ । २ सय मत गणना गर्दा प्रमुखमा १ सय ५९ र उपप्रमुखमा १ सय ४३ मत मात्र सदर भएको हो । राजविराज १ बाट मतगणना सुरु भएको हो । 

पछिल्लो मत परिणामअनुसार नगरप्रमुखमा जसपाका भिमराज यादवले ७१ मत प्राप्त गरी प्रारम्भिक अग्रता लिएका छन् । नेकपा माओवादी केन्द्रका शम्भुप्रसाद यादवले ४४ मत प्राप्त गरी उनलाई पछ्याइरहेका छन् । यस्तै नेकपा एकीकृत समाजवादी पार्टीका नथुनी दासले १७ र नेपाली कांग्रेसका इर्साद अन्सारीले १३ मत प्राप्त गरेका छन् ।

उपप्रमुखमा माओवादी केन्द्रकी प्रमिलाकुमारी साहले ५०, कांग्रेसकी सुशीला यादवले ३२ र जसपाकी इसरत परविणले २८ मत प्राप्त गरेकी छन् ।

त्यस्तै राजविराज १ को वडाध्यक्षमा कांग्रेसका आनन्दकुमार झाले ४१, जसपाका चन्द्रशेखर चौधरीले ४० र माओवादी केन्द्रका गंगाराम यादवले ३५ मत प्राप्त गरेका छन् ।

प्रकाशित : वैशाख ३१, २०७९ १९:२७
पूरा पढ्नुहोस्
प्रतिक्रिया
पठाउनुहोस्
×