कान्तिपुर वेबसाईट
AdvertisementAdvertisement
१८.१२°C काठमाडौं
काठमाडौंमा वायुको गुणस्तर: १९६

सधैं उम्मेदवारी !

पर्वत पोर्तेल

काँकडभिट्टा — झापा धुलाबारीका भरोसा दास पौडेल (भगवान भरोसा), नगरमा हुने कुनै पनि संघसंस्थाको चुनावमा उम्मेदवारी दिन छुटाउँदैनन् । धेरैमा पराजित हुन्छन् । तर पनि हरेस खाँदैनन् । २०५४ देखि निरन्तर चुनावीमा होमिँदै आएका नेकपा मालेका पौडेलले यस पटक मेचीनगरको प्रमुखमा उम्मेदवारी दिएका छन् । 

सधैं उम्मेदवारी !

२०५४ को स्थानीय निर्वाचनमा रवीन कोइरालाले मेचीनगरको प्रमुख जित्दा उनी नगर परिषद् सदस्यमा मनोनीत भएका थिए । २०७४ मा प्रदेश सदस्यमा उम्मेदवारी दिएका उनी चौथो भएका थिए । ‘अहिलेसम्म ७/८ पटक उम्मेदवार भइसकें’, भन्छन्, ‘हार, जित भइरहन्छ मलाई त्यसले असर गर्दैन ।’ नजिते पनि निरन्तर चुनावीमा होमिइरहने उनी बताउँछन् । अन्य दलका उम्मेदवार दलबलसहित रंगीन चुनावी प्रचारमा व्यस्त छन्, गाडीको लावालस्कर छ । उनी भने छोरा जनार्दनसँग पैदलै घरदैलोमा छन् । बाबु–छोराको एक/एक हातमा हँसिया र तारा अंकित झन्डा छ । अर्कोमा पर्चा ।

मतदातालाई उनी पर्चा थमाउँछन् र आफ्ना एजेन्डा सुनाउँछन् । मूलतः उनी आफूलाई भ्रष्टाचारविरोधी अभियानका अभियन्ता पनि ठान्छन् । ‘मेरो चुनावको मूल मुद्दा नै भ्रष्टाचारविरुद्ध छ’, भोट माग्दै गर्दा काँकडभिट्टा बजारमा भेटिएका उनले भने, ‘नेपाली राजनीतिको क्यान्सर यही भ्रष्टाचार हो, त्यसैलाई निर्मूल गर्ने वाचासहित मत मागिरहेको छु ।’

उम्मेदवारबीच अपारदर्शी खर्च गर्ने होड चलिरहेका बेला उनी थोरै खर्चमा चुनाव प्रचार गरिरहेका छन् । पैदलै हिँड्दा प्रचारप्रसारमा खर्च हुँदैन । ‘चुनावका नाममा फजुल खर्च गर्ने मेरो हैसियत छैन’, भरोसादासले थपे, ‘चुनाव खर्चिलो हुँदा जितेर जानेले भ्रष्टाचार गर्ने निश्चित हुन्छ ।’ कम्युनिस्ट राजनीतिमा सक्रिय उनी जनआन्दोलन ०६२–६३ का घाइते पनि हुन् । वैशाख ६ मा चन्द्रगढीमा भएको विरोध प्रदर्शनमा दुई जना सहिद बन्दा धेरै आन्दोलनकारीसँगै उनी गोली लागेर ढलेका थिए । नगर प्रमुखमा विजयी भएमा जनप्रतिनिधि एवं कर्मचारीको मिलेमतोमा फस्टाएको भ्रष्टाचार र बेथिति पूर्ण रूपमा निर्मूल पार्ने उनको लक्ष्य छ ।

प्रकाशित : वैशाख २३, २०७९ ११:३७
प्रतिक्रिया
पठाउनुहोस्
जनताको राय

चालु वर्षको ९ महिनामा वार्षिक लक्ष्यको ३२.२४ प्रतिशत मात्र विकास खर्च हुनुको अर्थ के हो ?