बाँकेका दुई वडामा फरक पार्टीबाट दाजुभाइ प्रतिस्पर्धा गर्दै- स्थानीय तह निर्वाचन २०७९ - कान्तिपुर समाचार

बाँकेका दुई वडामा फरक पार्टीबाट दाजुभाइ प्रतिस्पर्धा गर्दै

ठाकुरसिंह थारु

नेपालगन्ज — नेपालगन्ज उपमहानगरपालिका १ र कोहलपुर नगरपालिका ३ मा सहोदर दाजुभाइले फरक पार्टीबाट उम्मेदवारी दिएका छन् । नेपालगन्ज उपमहानगर १ मा अध्यक्षका लागि वर्तमान वडाध्यक्ष प्रमोद रिजालले नेकपा (एमाले) र उनका सहोदर दाजु बिनोद रिजालले नेपाली कांग्रेसबाट उम्मेदवारी दर्ता गराएका हुन् । 


प्रमोद लामो समयदेखि एमालेनिकट विद्यार्थी संगठनको राजनीतिमा सक्रिय थिए । त्यस्तै, दाजु बिनोद विद्यार्थी राजनीति गर्दै हाल तरुण दल बाँकेको सचिवका रुपमा काम गर्दै आएका छन् ।

त्यस्तै कोहलपुर नगरपालिका ३ को वडाध्यक्षका लागि दाजु तारकेश्वर रिजाल नेकपा (माओवादी केन्द्र) र भाइ माधव रिजाल एमालेको तर्फबाट उम्मेदवारी दिएका छन् । २०७४ को स्थानीय निर्वाचनमा माधव वडाध्यक्षमा निर्वाचित भएका थिए । त्यस्तै, दाजु तारकेश्वर ६५ मतले पराजित भएका थिए ।

प्रकाशित : वैशाख १४, २०७९ १५:०१
प्रतिक्रिया
पठाउनुहोस्

बाँकेको जानकीमा श्रीमान-श्रीमतीको आलोपालो नेतृत्व

ठाकुरसिंह थारु

नेपालगन्ज — बाँकेको साविक खजुराखुर्द गाविस‚ हालको जानकी गाउँपालिकाको नेतृत्व ०५४ देखि नेकपा (एमाले) बाँकेका नेता पदम धिताल र पत्नी भूमिसरा धितालले आलोपालो नेतृत्व गर्दै आएका छन् ।

धितालकी पत्नी भूमिसराले हाल जानकी गाउँपालिकाको उपप्रमुख तथा वैशाख ३० गते हुने स्थानीय तहको निर्वाचनमा फेरि उपप्रमुखमा उम्मेदवारी दिएकी छन् ।

२०७४ मा भएको स्थानीय तहको निर्वाचनमा पदम धितालले पालिका प्रमुखमा दाबी गरेका थिए । तर, एमालेले पालिकामा मधेसी समुदायको बाक्लो उपस्थिति रहेको भन्दै सोही समुदायकै नेता रामनिवास यादवलाई प्रमुखमा उठाएपछि धितालले श्रीमती भूमिसरालाई उपप्रमुख बनाउने सर्तमा दाबी छाडेका थिए । यसअघि उक्त पालिका प्रमुख र उपप्रमुखमा एमालेले जितेको थियो । २०५४ मा भएको खजुराखुर्द गाविसको अध्यक्षमा पदम धिताल विजयी भएका थिए ।

यसपटक धितालपत्नी भूमिसराले पालिका प्रमुखमा दाबी गरेकी थिइन् । तर, एमालेले फेरि पनि मधेसी समुदायबाटै उम्मेदवार बनाउने निर्णय गरेपछि उनले उपप्रमुखमा पुनः उम्मेदवारी दिएकी हुन् । पालिका प्रमुखमा व्यवसायी हिमान्सु यादवले प्रमुखमा उम्मेदवारी दिएका छन् । उनी पालिका प्रमुख रामनिवास यादवका छोरा हुन् ।

पालिका प्रमुख रामनिवासको मृत्युपछि भूमिसरा कार्यवाहक प्रमुखका रुपमा काम गर्दै आएका थिइन् ।

प्रकाशित : वैशाख १३, २०७९ १३:१३
पूरा पढ्नुहोस्
प्रतिक्रिया
पठाउनुहोस्
×