भक्तपुर नगरपालिकामा मुख्य दलका उम्मेदवार पुरानै- स्थानीय तह निर्वाचन २०७९ - कान्तिपुर समाचार
कान्तिपुर वेबसाईट
AdvertisementAdvertisement

भक्तपुर नगरपालिकामा मुख्य दलका उम्मेदवार पुरानै

लिला श्रेष्ठ

भक्तपुर — भक्तपुर नगरपालिकामा नेपाल मजदुर किसान पार्टी (नेमकिपा) बलियो राजनीतिक शक्ति मानिन्छ । जनमत संग्रहपछि २०३९ सालको स्थानीय निकाय निर्वाचनपछि नेमकिपाले भक्तपुर नगरमा लगातार जित्दै आएको छ । उसको किल्लामा बलिया उम्मेदवार उठाउन प्रमुख दलहरू यसपटक पनि हच्किएका छन् । नेमकिपाले २०७४ मा प्रमुख र उपप्रमुखसहित भक्तपुर नगरको १० वटै वडामा विजयी नेमकिपाले यसपटक पुनः पुरानै उम्मेदवारलाई यसपटक दोहोर्‍याएको छ ।

नेमकिपाका भक्तपुर नगर प्रमुखमा पुनः सुनील प्रजापति र उपप्रमुखमा रजनी जोशीले उम्मेदवारी दिएका छन् । वडाध्यक्षका उम्मेदवारसमेत पुरानै छन् । सोमबार नगरको १० वडामध्ये ७ वटाका वडाध्यक्षमा पुरानैको उम्मेदवारी परेको छ । वडा १ मा श्यामकृष्ण खत्री, २ मा हरिप्रसाद बासुकला, ३ मा राजकृष्ण गोरा, ६ मा हरिराम सुवाल, ७ मा उकेश कवां, ९ मा रवीन्द्र ज्याख्व र १० मा लक्ष्मीप्रसाद ह्योमिखा पुनः वडाध्यक्षको उम्मेदवार बनेका हुन् । नगरको वडा ४ मा उपेन्द्र सुवाल, ५ मा नेमकिपाका अध्यक्ष नारायणमान बिजुक्छेका भाइ योगेन्द्रमान बिजुक्छे र ८ वडामा कृष्णप्रसाद कोजुले उम्मेदवारी दिएका छन् । भक्तपुर नगरमा अन्य पार्टीको आकर्षणसमेत कम छ । जिल्लाको अन्य तीन नगरपालिकामा नेमकिपा कमजोर देखिन्छ ।

नेमकिपाका तर्फबाट चाँगुनारायण नगर प्रमुखमा केशव तिमिल्सिना र उपप्रमुखमा कल्पना लामाले उम्मेदवारी दिएका छन् । सूर्यविनायक नगर प्रमुखमा नेमकिपाबाट श्याम बिसुंखे र उपप्रमुखमा चनमति खुलिमुलीले उम्मेदवारी दिएका छन् । त्यस्तै, नेमकिपाका तर्फबाट मध्यपुर थिमि नगर प्रमुखमा आशाहरि प्रजापति र उपप्रमुखमा दीक्षा बाडेले उम्मेदवारी दिएका छन् । मध्यपुर थिमि नगर प्रमुखमा एमालेका तर्फबाट पुनः मदनसुन्दर श्रेष्ठले उम्मेदवारी दिएका छन् । स्थानीय तह निर्वाचन २०७४ मा विजयी श्रेष्ठले पुनः उम्मेदवारी दिएका हुन् । सम्पदा पुनर्निर्माणमा अग्रणी भूमिका खेलेका श्रेष्ठलाई एमालेले पुनः उम्मेदवार बनाएको हो । एमालेकै तर्फबाट उपप्रमुखमा उत्तरा नेपालको उम्मेदवारी परेको छ । मध्यपुर थिमिको वडाध्यक्षहरूमा १ मा कृष्णकुमार प्याठः, २ मा प्रकाश थापामगर, ३ मा होमनाथ ढुंगेल, ४ मा बालकृष्ण पात्य श्रेष्ठ, ५ मा राधेश्याम प्रजापति, ६ मा दिलकृष्ण प्रजापति, ७ मा कृष्णकुमार प्रजापति, ८ मा विक्रम बुढा र ९ मा दीपेन्द्र थापाले उम्मेदवारी दिएका छन् ।

सूर्यविनायक नगर प्रमुखमा एमालेका वासुदेव थापा पुनः उम्मेदवार भएका छन् । उपप्रमुखमा सरिता भट्टराईले उम्मेदवारी दिएकी छन् । नगर प्रमुख, उपप्रमुख मात्र होइन, एमालेले २०७४ को स्थानीय तह निर्वाचनमा विजयी वडाध्यक्षहरूलाई समेत दोहोर्‍याएको छ । दोहोरिएर उम्मेदवारी दिने वडाध्यक्षहरूमा वडा १ का सानुकाजी कायस्थ, ५ मा राजकुमार जोशी, ७ मा रवीन्द्र सापकोटा, ९ मा उपेन्द्र केसी र १० का शिवराम राउत छन् । एमालेले सूर्यविनायकको वडा २ मा विश्वराज विष्ट, ३ मा रामकृष्ण राउत, ४ मा भोला राउत, ६ मा सुधाम केसी, ८ मा पुष्पराज बस्नेतलाई उम्मेदवार बनाएको छ ।

चाँगुनारायण नगरमा यसअघिकी उपप्रमुख बिना बाँस्तोलाले नगर प्रमुख पदमा उम्मेदवारी दिएकी छन् । भक्तपुर जिल्लाका ४ स्थानीय तहमध्ये, नगर प्रमुखमा उम्मेदवारी दिने एक मात्र महिला उम्मेदवार बाँस्तोला हुन् । एमालेले चाँगुनारायण नगर प्रमुखमा बाँस्तोलालाई छनोट गरेको हो । उपप्रमुखमा रमेश बुढाथोकीले उम्मेदवारी दिएका छन् । एमालेका तर्फबाट चाँगुनारायण नगरको वडाध्यक्षहरूमा वडा १ मा ईश्वर थापा, २ मा मनोज केसी, ३ मा श्यामसुन्दर धिमाल, ४ मा रोजबहादुर तामाङ, ५ मा अश्विन गिरी, ६ मा विष्णु तामाङ, ८ मा प्रकाश लामिछाने र ९ मा श्रीकण्ठ खड्काले उम्मेदवारी दिएका छन् ।

एमालेका तर्फबाट भक्तपुर नगर प्रमुखमा रवीन्द्र लाछिमस्यू र उपप्रमुखमा रञ्जना खर्बुजाले उम्मेदवारी दिएका छन् । वडाध्यक्षहरूमा वडा १ मा रमेश न्याइच्याईं, २ मा राजाराम सुवाल, ३ मा रामसुन्दर बोइजु, ४ मा सुरेश नापित, ५ मा राजेशपतिराज शर्मा, ६ मा भूपेन्द्र नेपाली, ७ मा राम तचामो, ८ मा नरेश दुवाल, ९ मा अक्षसुन्दर प्रजापति र १० मा पुण्यराम घटुवाले उम्मेदवारी दिएका छन् ।

उम्मेदवारी दिने अन्तिम समयसम्म पनि गठबन्धनका दलहरूलाई उम्मेदवार छनोटमै सकस पर्‍यो । दलका कार्यकर्ता सोमबार मध्यरातसम्म नै उम्मेदवारी दर्तामै व्यस्त भए । गठबन्धनका तर्फबाट जिल्लाको भक्तपुर, मध्यपुर थिमि र सूर्यविनायक नगर प्रमुखमा कांग्रेसले उम्मेदवारी दिएका छन् । जसमध्ये, भक्तपुरमा अघिल्लो निर्वाचनमा पराजित रामप्रसाद कासुलाले नगर प्रमुख पदमा उम्मेदवारी दिएका छन् । गठबन्धनका तर्फबाट मध्यपुर थिमिमा कांग्रेसका सुरेन्द्र श्रेष्ठले र सूर्यविनायक नगर प्रमुखमा कांग्रेसका नगर सभापति निशान ढुंगेलले उम्मेदवारी दिएका छन् । गठबन्धनका तर्फबाट भक्तपुर नगर उपप्रमुखमा एकीकृत समाजवादीका ओमचरण अमात्य, मध्यपुर थिमि उपप्रमुखमा माओवादीका विजयकृष्ण श्रेष्ठ र सूर्यविनायकको उपप्रमुखमा एकीकृत समाजवादीका जिल्ला अध्यक्ष श्यामसुन्दर बस्नेतले उम्मेदवारी दिएका छन् ।

गठबन्धनबाट नगर प्रमुख र उपप्रमुखमा मात्र सहमति कार्यान्वयन भएको छ । वाग्मती प्रदेशस्तरीय गठबन्धनका बैठकले प्रमुख र उपप्रमुखका लागि मात्र निर्णय गरिदिँदा वडास्तरमा गठबन्धनमा उल्झन देखिएको कांग्रेसका एक नेताले बताए । वडास्तरमै पाँच दलीय गठबन्धन भने पनि कांग्रेसले प्यानलगत रूपमा प्रत्येक नगरको वडाहरूमा उम्मेदवारी दर्ता गरेको जनाएको छ ।

चाँगुनारायण नगरमा भने गठबन्धन हुन सकेन । २०७६ को उपनिर्वाचनमा प्रदेशसभा सदस्य कृष्णलाल भँडेललाई जिताउन राप्रपासँग भएको लिखित सम्झौता बाहिरिएपछि गठबन्धन टुट्यो । कांग्रेसका तर्फबाट चाँगुनारायण नगर प्रमुखमा जीवन खत्री र उपप्रमुखमा सुभद्रा काफ्लेले उम्मेदवारी दिएका छन् । चाँगुनारायणको वडाध्यक्षहरूमा वडा १ मा सिजन कार्की, २ मा सोमप्रसाद प्रधान, ३ मा गोविन्द थापा, ४ मा बलबहादुर श्रेष्ठ, ५ मा जयन्द्र खड्का, ६ मा वीरमान तामाङ, ७ मा रमेश लामा, ८ मा जनक खत्री र ९ मा राजकुमार खड्काले उम्मेदवारी दिएका छन् ।

२०७६ को उपनिर्वाचनको सहमतिअनुसार कांग्रेससँग तालमेल हुन नसकेपछि राप्रपाले एक्लै लड्न उम्मेदवारी दिएको छ । नगर प्रमुखमा राप्रपाबाट रवीन्द्रप्रताप शाह, उपप्रमुखमा मञ्जु कार्कीले उम्मेदवारी दिएका छन् । वडाध्यक्षहरूमा वडा १ मा जनक थापा, २ मा सन्तोष केसी, ३ मा सरोज मल्ल, ४ मा कमलदीप थापा, ५ मा जनक कार्की, ६ मा धनबहादुर लामा, ७ मा श्याम नायजु, ८ मा रामबहादुर खत्री र ९ मा रमेश खत्री छन् । गठबन्धन हुन नसकेपछि एकीकृत समाजवादीबाट नगर प्रमुखमा ईश्वर खड्काले उम्मेदवारी दिएका छन् । माओवादीका तर्फबाट नगर प्रमुखमा नरेश खड्का र उपप्रमुखमा चण्डिका पाण्डेको उम्मेदवारी परेको छ । त्यस्तै, भक्तपुर नगर प्रमुखमा माओवादीका तुल्सीभक्त सुवाल र उपप्रमुखमा इन्द्रमाया सुवालले उम्मेदवारी दिएका छन् ।

प्रकाशित : वैशाख १३, २०७९ ०८:००
प्रतिक्रिया
पठाउनुहोस्

भक्तपुरमा पुरानै आकांक्षी बढी

स्थानीय तहमा पर्याप्त स्रोतसाधन परिचालन गर्न तथा शक्तिको अभ्यास गर्न सकिने भएकाले अधिकांश जनप्रतिनिधि कार्यकाल दोहोर्‍याउने दाउमा छन् । यसअघि पटक–पटक निर्वाचित र राजनीतिक नियुक्तिको स्वाद चाखेकाहरु नै आसन्न निर्वाचनका आकांक्षी देखिएका छन् । 
लिला श्रेष्ठ

भक्तपुर — स्थानीय तह निर्वाचन नजिकिँदै जाँदा भक्तपुरका अधिकांश पालिकामा पुरानै जनप्रतिनिधि टिकट लिने कसरतमा जुटेका छन् । मध्यपुर थिमि नगरपालिकाका मेयर मदनसुन्दर श्रेष्ठ पुनः मेयर बन्ने दाउमा छन् ।


गएको चुनावमा नेकपा एमालेबाट निर्वाचित मदनसुन्दर श्रेष्ठका निकटतम् प्रतिद्वन्द्वी नेपाली कांग्रेसका अष्टकुमार कवे पुनः प्रतिस्पर्धा गर्न टिकट खोजिरहेका छन् ।

सूर्यविनायक नगरपालिकामा एमालेबाट निर्वाचित नगर प्रमुख वासुदेव थापा र उनका निकटतम् प्रतिद्वन्द्वी कांग्रेसका विष्णुराज कार्की पनि पुनः टिकट लिने कसरतमा लागेका छन् । स्थानीय तहमा पर्याप्त स्रोतसाधन परिचालन गर्न पाइने र शक्तिको अभ्यास गर्न सकिने भएकाले अधिकांश जनप्रतिनिधि दोहोरिन इच्छुक छन् । यसअघिका निर्वाचनमा पटक–पटक निर्वाचित भएका, राजनीतिक नियुक्तिको स्वाद चाखेकाहरू नै आसन्न निर्वाचनका आकांक्षी देखिएका छन् ।

नयाँ पुस्ताका कार्यकर्ताले भने पुरानै जनप्रतिनिधि र प्रतिस्पर्धी आकांक्षीका विषयमा असन्तुष्ट व्यक्त गरेका छन् । ‘पटक–पटक निर्वाचित, राजनीतिक नियुक्ति लिएकाहरूले दाबी गर्दा नयाँ पुस्तामा राजनीतिप्रति नै वितृष्णा पैदा भइरहेको छ, नयाँलाई अवसर दिनुपर्छ,’ एमाले चाँगुनारायण नगर उपाध्यक्ष जयराम बाँस्तोलाले भने ।

नेकपा एमालेका तर्फबाट मध्यपुर थिमि नगर प्रमुखका आकांक्षी जिल्ला अध्यक्ष बचन देउजा, मदनसुन्दर श्रेष्ठ, भाष्कर प्रधानाङ्ग, तारामान जोशी, चन्दनकृष्ण श्रेष्ठ, राष्ट्रशमशेर थापा, सूर्यलाल श्रेष्ठ, चन्द्रभक्त श्रेष्ठ देखिएका छन् । उपप्रमुखमा एमालेबाट सुचित्रा श्रेष्ठ, उत्तरा नेपाल र बिन्दु प्रजापतिको नाम जिल्ला कमिटीमा पठाएको एमाले जिल्ला अध्यक्ष बचन देउजाले जानकारी दिए ।

कांग्रेस जिल्ला सचिव सुशील बस्नेतका अनुसार कांग्रेसका तर्फबाट मध्यपुर थिमि नगर प्रमुखका आकांक्षीमा अष्टकुमार कवे, सुरेन्द्र श्रेष्ठ, केदार खड्का, मदनकृष्ण श्रेष्ठ, गणेश चक्रधर, महेश श्रेष्ठ, मुरारीप्रसाद आचार्य, सन्तोष भट्टराई र रामकाजी चक्रधर गरी ९ जना छन् । कांग्रेसबाट अञ्जनादेवी मधिकर्मी, उर्मिला वन, कमला कर्माचार्य, प्रमिला सुवेदी आचार्य, लक्ष्मीशोभा प्रजापति उपप्रमुखका आकांक्षी हुन् । मधिकर्मी हालकी उपप्रमुख हुन् ।

त्यस्तै, नेकपा (एकीकृत समाजवादी) बाट मध्यपुर थिमि नगर प्रमुखका आकांक्षीमा भवानी खड्का, दुर्गामोहन श्रेष्ठ, पुण्यरत्न रञ्जित, प्रेमानन्दलाल श्रेष्ठ छन् भने, उपप्रमुखमा रीतु चित्रकार र नवीनप्रकाश श्रेष्ठ छन् ।

एमालेबाट सूर्यविनायक नगर प्रमुखका आकांक्षी वासुदेव थापा, राजेन्द्र राजथला, किरण थापा, राजकुमार सिलवाल, सन्तोष ढुंगेल र गोविन्द चौलागाईं छन् । उपप्रमुखका आकांक्षीमा बहालवाला उपप्रमुख जुना बस्नेत, तारा सापकोटा, अम्बिका भण्डारी बस्नेत, सरिता तिमल्सिना, तारा खड्का बस्नेत, ममता राउत, लक्ष्मी कार्की अधिकारी, वीणा बस्नेत छन् ।

कांग्रेसबाट सूर्यविनायक नगर प्रमुखका आकांक्षीमा निशान ढुङ्गेल, विष्णुराज कार्की, सुशील बस्नेत, नारायणभक्त खायमली, उद्धव सिलवाल, राजनकाजी त्वाती, प्रेमबहादुर खड्का, रवि राणा, भेषबहादुर कार्की र राजन बके छन् । ललिता धिताल पोखरेल, रीता खत्री, संगीता थापा, सुनीता खत्री, कान्छीमाया श्रेष्ठ, पुनम केसी, मीनाकुमारी ढकालले उपप्रमुखमा दाबी गरेका छन् । नेकपा (एकीकृत समाजवादी) बाट सूर्यविनायक नगर प्रमुखका आकांक्षी श्यामसुन्दर बस्नेत, अर्जुन बस्नेत, मधुकर थापा छन् भने उपप्रमुखका आकांक्षी शोभा श्रेष्ठ र दिलीप केसी छन् ।

एमालेबाट चाँगुनारायण नगर प्रमुखका आकांक्षीमा रमेश बुढाथोकी, नीरञ्जन बजगाईं, दमोदर दंगाल, रामबहादुर श्रेष्ठ, नवराज गेलाल, गीताप्रसाद नेपाल, बिना बाँस्तोला, मोहनवीर श्रेष्ठ, शम्भुप्रसाद दाहाल र प्रेमकुमार श्रेष्ठ छन् । नारायणी फुयाल दंगाल, शारदा थापा मगर, सावित्री थापा, परासर सापकोटा, शिवराम तिमल्सिना, मन्दरा मिश्रले उपप्रमुखमा दाबी गरेका छन् ।

कांग्रेसबाट चाँगुनारायण नगर प्रमुखका आकांक्षीमा शिवहरि केसी, सुरेश श्रेष्ठ, जीवन खत्री, प्रवीण वन, यादवप्रसाद अधिकारी, सरु बानियाँ, जयन्द्र खड्का, अच्युत अधिकारी, पुष्कर खत्री छन् । सुभद्रा काफ्ले, राजेश खड्का, संगीता फुयाल आचार्य, सचिला खड्का, रविता कार्की, रूपा थापा, संगीता दुलाल नेपाल, सावित्री लामिछाने उपप्रमुखको उम्मेदवार बन्ने दाउमा छन् ।

नेकपा (एकीकृत समाजवादी) का तर्फबाट चाँगुनारायण नगर प्रमुखका आकांक्षी रामप्रसाद न्यौपाने छन् भने, उपप्रमुखमा शान्ति खड्का र अञ्जना पोखरेल रहेको जिल्ला अध्यक्ष श्यामसुन्दर बस्नेतले बताए । हाललाई प्यानलगत रूपमा आकांक्षीको नामावली संकलन भए पनि गठबन्धनका विषयमा छलफल भइरहेको उनले बताए । ‘केही केही सिटमा मात्र क्षेत्राधिकार मिलेको छैन, गठबन्धनको विषय सकारात्मक रुपमा अघि बढेको छ,’ उनले भने ।

नेकपा माओवादी केन्द्रबाट चाँगुनारायण नगर प्रमुखमा रामशरण दाहाल, रामलाल न्हेम्हाफुकी, नरेश खड्का, राजेन्द्र आगन्जा र हरिकृष्ण रावतले दाबी गरेका छन् भने उपप्रमुखमा चण्डिका लामिछाने र शान्ति केसी छन् ।

माओवादी केन्द्रका जिल्ला संयोजक सुनील बासुका अनुसार सूर्यविनायक नगर प्रमुखका आकांक्षी कल्पदीप राई, सनिस लागेजु, रामजी भण्डारी, नारायणप्रसाद राजथला छन् । सूर्यविनायक नगर उपप्रमुख, मध्यपुर थिमि र भक्तपुर नगर प्रमुख/उपप्रमुखका विषयमा छलफल भइरहेको उनले बताए । गठबन्धनका विषयमा छलफल भइरहेकोसमेत उनले बताए ।

भक्तपुर नगरपालिकामा नेपाल मजदुर किसान पार्टी (नेमकिपा) बलियो राजनीतिक शक्ति मानिन्छ । भक्तपुर नगरको मतका कारण नेमकिपाले प्रतिनिधिसभा र प्रदेशसभामा एक/एक सिट हासिल गरेको छ । अघिल्लो निर्वाचनमा भक्तपुर नगरपालिकाको १० वटै वडामा नेमकिपाका उम्मेदवार विजयी भएका थिए । भक्तपुर नगरमा अन्य पार्टीको आकर्षणसमेत कम छ । जिल्लाका अन्य ३ नगरमा जस्तो नगर प्रमुख/उपप्रमुखका आकांक्षीसमेत नेमकिपाबाहेकका दलका कम छन् ।

एमालेबाट नगर प्रमुखका आकांक्षी अघिल्लो निर्वाचनमा पराजित विष्णुप्रसाद सुवाल, रवीन्द्र लाछिमस्यू, नारायणसुन्दर सिन्तकल, विश्वराज शिल्पकार र रोशन वज्राचार्य छन् भने उपप्रमुखमा रञ्जना खर्बुजा छिन् । कांग्रेसबाट नगर प्रमुखमा अघिल्लो निर्वाचनमा पराजित राम कासुला र नारायणप्रसाद तमखु छन् ।

नेकपा (एकीकृत समाजवादी) का ओमचरण अमात्य र रीता अवालले भक्तपुर नगर प्रमुख र प्रवीण बाटीले उपप्रमुखमा दाबी गरेका छन् ।

नेमकिपाले भने आसन्न चुनावमा जिल्लाका कुनै पनि नगरमा आकांक्षीको नाम सार्वजनिक गरेको छैन ।

राजनीतिक दलहरूले आ–आफ्नो पार्टीका आकांक्षीहरूको नामावली संकलन गरे पनि उम्मेदवारको नाम टुंग्याउन भने सकेको छैन । कांग्रेस, माओवादी केन्द्र, नेकपा (एकीकृत समाजवादी) लगायतका दलहरू आ–आफ्नो आकांक्षीहरूको नाम लिएर गठबन्धन विषयमा छलफल गरिरहेका छन् । ‘वडास्तरबाटै गठबन्धनको विषयमा छलफल भइरहेको छ,’ कांग्रेस जिल्ला सचिव सुशील बस्नेतले भने । गठबन्धनको विषय २०७४ को निर्वाचनको नतिजाका आधारमा तय हुनेसमेत दलहरूले जनाएका छन् । उम्मेदवार चयनमा ढिलाइ हुँदा जिल्लामा निर्वाचन गतिविधि पनि सुस्त छ । आकांक्षीहरू टिकट पाउन दलका नेता रिझाउन व्यस्त छन् । उम्मेदवार टुंगो लागेपछि मात्र निर्वाचन गतिविधि तीव्र हुने स्थानीय नेताहरूको भनाइ छ ।

प्रकाशित : वैशाख ७, २०७९ ०७:४५
पूरा पढ्नुहोस्
प्रतिक्रिया
पठाउनुहोस्
×