क्रिकेटर खाँले गाउँपालिका अध्यक्षमा दिए उम्मेदवारी - स्थानीय तह निर्वाचन २०७९ - कान्तिपुर समाचार
कान्तिपुर वेबसाईट
AdvertisementAdvertisement

क्रिकेटर खाँले गाउँपालिका अध्यक्षमा दिए उम्मेदवारी 

मनोज पौडेल

कपिलवस्तु — अन्तर्राष्ट्रिय क्रिकेट खेलाडी फैजल खाँले कपिलवस्तुको मायादेवी गाउँपालिका अध्यक्ष पदमा उम्मेदवारी दिएका छन् ।  नेकपा एकीकृत समाजवादीबाट उनले पकडीस्थित निर्वाचन अधिकृतको कार्यालय पुगेर मनोनयन दर्ता गराएका हुन् । भैसकुण्डास्थित घरबाट उनी समर्थक नेता कार्यकर्ता लिएर मनोनयन दर्ता गर्न पुगेका थिए । 

उम्मेदवारी दर्तापछि २९ वर्षे क्रिकेटर खाँले क्रिकेटमा जसरी नै राजनीतिमा पनि राम्रो काम गरेर नाम राख्ने बताए । ‘नयाँ योजना र उद्देश्यले काममा लाग्छु’ उनले भने ‘यो नै मेरो जितको आधार हो ।’ मायादेबी गाउँपालिका २ का खाँ यु १९ का अन्तर्राष्ट्रिय खेलाडी हुन् । सन् २०११ देखि अन्तर्राष्ट्रिय खेल खेल्न थालेका उनी सन् २०१६ सम्म नेपालको प्रतिनिधित्व गर्दै विभिन्न ६ मुलुकमा गएर खेलका थिए । गत २०७४ मंसिरमा सम्पन्न प्रदेश सभा सदस्यमा पनि उनी निर्वाचन लडेका थिए ।


प्रकाशित : वैशाख १२, २०७९ १४:३७
प्रतिक्रिया
पठाउनुहोस्

निर्वाचनको विषयमा धारणा बनाउन चन्द समूहको बैठक 

मनोज पौडेल

कपिलवस्तु — स्थानीय तह निर्वाचन, एमसीसीलगायत एजेन्डासहित नेत्रविक्रम चन्द नेतृत्वको नेकपाको केन्द्रीय समिति बैठक सुरू भएको छ ।

कपिलवस्तुको शिवराज नगरपालिका ९, अञ्चलपुरमा रहेको पार्टी केन्द्रीय सम्पर्क कार्यालयमा शुक्रबारदेखि सुरु १२ औं पूर्ण बैठकले निर्वाचनका विषयमा पार्टीको भावी कार्यदिशा तय गर्ने केन्द्रीय सदस्य भेषराज भुसालले जानकारी दिए । उनले भने, 'संसदीय व्यवस्थाबाट मुलुकले निकास नपाउने कुरामा हामी प्रस्ट छौं । तैपनि निर्वाचनका विषयमा पार्टीले भावी कार्यदिशा तय गर्नेछ ।' बैठकमा स्थानीय निर्वाचनमा भाग लिने वा नलिने छलफल अझै सुरु नभएको उनको भनाइ थियो ।

त्यस्तै, प्रतिनिधिसभाबाट हालै अनुमोदन भएको एमसीसी सहयोगबारे बैठकलेले धारणा तय गर्ने उनले बताए । संसदीय व्यवस्थाको विरोध गर्दै आएको नेकपाभित्र स्थानीय तह निर्वाचनमा सहभागी हुने वा बहिस्कार गर्ने भन्नेमा मतान्तर छ । बैठकमा ६९ जना केन्द्रीय सदस्य र ३ जना केन्द्रीय सल्लाहकार सहभागी छन् ।

प्रकाशित : चैत्र ४, २०७८ २१:१५
पूरा पढ्नुहोस्
प्रतिक्रिया
पठाउनुहोस्
×