नेपालगन्ज — स्थानीय तहको निर्वाचन नजिकिंदै गर्दा राजनीतिक दलका नेताहरूबीच उम्मेदवार बन्ने प्रतिस्पर्धा चलेको छ । वडा सदस्यदेखि पालिका प्रमुखहरूमा सर्वसम्मत उम्मेदवार बनाउन दलहरूलाई हम्मेहम्मे परेको छ । एउटा वडाध्यक्षका लागि दर्जन बढीले दाबी गरिरहेका छन् । कतिपय दलका नेताहरूले स्वस्फूर्त रूपमा सामाजिक सन्जालमा उम्मेदवारी घोषणा गरिसकेका छन् ।
बाँकेको नेपालगन्ज उपमहानगरपालिकामा कांग्रेसका तर्फबाट वर्तमान उपप्रमुख उमा थापा मगर, कांग्रेस नगर सभापति प्रशान्त विष्ट, व्यवसायी ललित रौनियारलगायतका नेताहरूले उम्मेदवारीको दाबी गर्दै दौडधुप गरिरहेका छन् । उपप्रमुख थापा मगर कोइरालानिकट र विष्ट देउवा पक्षधर मानिन्छन् । एमालेले केन्द्रीय सदस्य पशुपतिदयाल मिश्रालाई नगर प्रमुखमा अगाडि सार्ने तयारी गरिरहेका बेला पार्टी नगर प्रमुख दत्तप्रसाद आचार्यले सामाजिक सन्जालमा नगर कमिटीले उम्मेदवारबारे कुनै निर्णय नगरेको जनाएका छन् । नेकपा (माओवादी) केन्द्रका तर्फबाट व्यवसायी नन्दलाल वैश्य, नवीन शर्मा र आदेश अग्रवाललगायतले दाबी गरेका छन् ।
कोहलपुर नगरपालिकाको प्रमुखमा कांग्रेसबाट दर्जन बढी नेताले उम्मेदवारी दाबी गरेका छन् । जिल्ला नेता फूलराम थारु, हालकी उपप्रमुख सन्जुकुमारी चौधरी, बलराम शर्मा न्यौपाने, चिन्तामणि धिताल, भानुभक्त भट्टराई र चक्र अधिकारीलगायत दर्जन बढीले दाबी गरेका छन् । एमालेका तर्फबाट खिलप्रसाद भुसाल, वसन्ती अधिकारी र गोपाल गिरीले नगर प्रमुखमा दाबी गरेका छन् । नेकपा माओवादी केन्द्रबाट यसअघि नगर प्रमुखमा प्रतिस्पर्धा गरेका नरेन्द्र शर्माले पनि प्रमुखमा दाबी गरेका छन् । कांग्रेस, माओवादी, नेकपा (समाजवादी) लगायत ५ दलीय गठबन्धन गर्ने केन्द्रीय निर्णय बाँकेमा कार्यान्वयन हुने/नहुने अन्योल छ । कांग्रेस सभापति नारायण गौडेलले कांग्रेस प्रजातान्त्रिक पार्टी भएकाले धेरैले उम्मेदवार हुन दाबी गर्नु स्वाभाविक भएको बताए । ‘धेरै नेता भएको पार्टीमा धेरैले उम्मेदवार बन्न खोज्नुलाई स्वाभाविक रूपमा लिनुपर्छ । पार्टीले छलफलपछि सहमतिमै उम्मेदवारको टुंगो लगाउनेछ,’ उनले भने, ‘गठबन्धनबारे पनि छलफल हुन्छ । हेरौं, के हुन्छ ?’
गत निर्वाचनमा कांग्रेसले राप्ती सोनारी र डुडवा गाउँपालिकामा जितेको थियो । एमालेले कोहलपुर नगरपालिका, खजुरा, बैजनाथ र जानकी गाउँपालिकामा जितेको थियो । नेपालगन्ज उपमहानगरपालिकाको प्रमुखमा राप्रपाका डा. धवलशमशेर राणा, उपमेयरमा कांग्रेसकी उमा थापा मगर विजयी भएका थिए । नरैनापुर गाउँपालिकामा संघीय समाजवादी फोरमले विजय प्राप्त गरेको थियो ।
एमाले बाँकेका अध्यक्ष किस्मतकुमार कक्षपतिले स्थानीय तह निर्वाचनमा धेरैले उम्मेदवारमा दाबी गरे पनि छलफलपछि टुंगो लाग्ने विश्वास व्यक्त गर्छन् । उनले वडाध्यक्ष र सदस्यका लागि वडा कमिटीले र नगरपालिकाको हकमा जिल्ला कमिटीले उम्मेदवार सिफारिस गर्ने प्रक्रिया रहेको जनाए । ‘वडाबाटै सिफारिस हुने भएकाले धेरै फिल्टर भएरै उतैबाट आउने भए । जिल्लाको हकमा प्रदेशलाई हामीले सिफारिस गर्छौं,’ उनले भने, ‘वडामा दाबी गरेका धेरै उम्मेदवारको नाम पालिका कमिटीले टुंग्याउनेछ ।’
प्रकाशित : वैशाख १, २०७९ ११:५६
