स्याङ्जा-२ मा सुरुवाति अग्रता एमालेकी अर्याललाई- प्रतिनिधि / प्रदेशसभा निर्वाचन २०७९ - कान्तिपुर समाचार
कान्तिपुर वेबसाईट
AdvertisementAdvertisement

स्याङ्जा-२ मा सुरुवाति अग्रता एमालेकी अर्याललाई

प्रतीक्षा काफ्ले

स्याङ्जा — मतदान भएको १० दिनपछि बुधबार रातिदेखि स्याङ्जा निर्वाचन क्षेत्र नम्बर २ को मतगणना सुरु गरिएको छ । निर्वाचन आयोगले मंसिर ४ को मतदानलाई सदर गर्दै बुधबार मतगणना गर्न निर्देशन दिएको थियो ।

वालिङ नगरपालिकाको भवनमा भइरहेको मतगणनाको सरुवाति चरणमा एमाले सचिव पद्माकुमारी अर्यालले कांग्रेस उपसभापति धनराज गुरुङलाई उछिनेकी छिन् । पछिल्लो मतपरिणामअनुसार अर्यालले २६४८ मत ल्याउँदा गुरुङले २३७८ मत ल्याएका छन् ।

मंसिर ४ मा सम्पन्न प्रतिनिधिसभा र प्रदेशसभा निर्वाचनमा चापाकोट नगरपालिकाअन्तर्गत कांग्रेसले ४ वटा बुथ कव्जा गरी मतदान गरेको आरोप नेकपा एमाले लगायतका राजनीतिक दलले लगाएपछि मतगणना रोकिएको थियो । बुथ कब्जा गरेर मृत्यु भएका र विदेशमा रहेका मतदाताको नाममा पनि मत खसालेको भन्दै सुरु भएको स्याङ्जा–२ को विवाद जिल्लास्तरबाट सुल्झन नसकेर आयोगमा पुगेको थियो । आयोगको स्थलगत टोलीको प्रतिवेदनको आधारमा गणना गर्न आयोगले निर्देशन दिएको हो ।

स्याङ्जाको चापाकोट नगरपालिका–३ को दिसिङकोट आधारभूत विद्यालय, वडा ४ को राममन्दिर मावि, वडा ५ का जनसक्रिय आधारभूत विद्यालय र दिनदलायु आधारभूत विद्यालयका सबै मतदात केन्द्रमा कांग्रेसका कार्यकर्ताले बुथ कब्जा गरेर फर्जी मत खसालेको एमालेको दाबी छ । यी बुथमा अस्वाभाविक मत खसेको र प्रहरी प्रशासन पनि मूकदर्शक बनेको एमालेलगायतका दलको आरोप थियो । अरु क्षेत्रमा औसतमा ६० प्रतिशत मत खसे पनि त्यहाँ ९८ प्रतिशतसम्म मत खसेको भन्दै एमाले उम्मेदवार पद्मा अर्याल, राष्ट्रिय स्वतन्त्र पाटीका टीकराज गुरुङ लगायतले मतदानका भोलीपल्ट (मंसिर ५ गते) आयोगसमक्ष निवदेन दिएर पुन: मतदानको माग राखेको थिए ।

विवाद चुलिँदै गएपछि लामोसमयसम्म मतगणना वा मतदान के हुने भन्ने अन्योल थियो । कांग्रेसले भने मतगणना सुरु गर्न माग गर्दै निर्वाचन आयोगको ध्यानाकर्षण गराएको थियो । मंसिर ४ गते चापाकोट नगरपालिका–१ आंधीचौघेरास्थित भानु मावि मतदान केन्द्रमा कांग्रेस र एमालेका प्रतिनिधिबीच विवाद भएपछि प्रहरीले सुरक्षाका लागि भन्दै हवाइ फायरसमेत गरेको थियो । वालिङमा रहेको निर्वाचन अधिकृतको कार्यालयअघि एमाले र काँग्रेसका छुट्टाछुट्टै दवावमुलक आन्दोलन भएका थिए ।

यस्तै, कांग्रेसले चापाकोट नगरपालिका–१ को भानु मावि आँधीचौघेरा, गल्याङ नगरपालिका–७ मनहरिखर्कको मतदान केन्द्र, कालीगण्डकी गाउँपालिकाको अमरदीप मावि र कोटाकोट आधारभूत विद्यालय केन्द्रमा एमालेले बुथ कब्जा गरेको आरोप लगाएको थियो । स्याङ्जा दुईमा मुख्य प्रतिस्पर्धीका रुपमा कांग्रेसबाट केन्द्रीय उपसभापति धनराज गुरुङ, एमालेबाट केन्द्रीय सचिव पद्मा अर्याल, राष्ट्रिय स्वतन्त्र पार्टीका टिकराज गुरुङ रहेका छन् ।

प्रकाशित : मंसिर १५, २०७९ ०६:४४
प्रतिक्रिया
पठाउनुहोस्

निर्वाचनमा मत नदिएको भन्दै आक्रमण गरिनु दु:खद् : नेता पोखरेल

सुनिता बराल

महोत्तरी — निर्वाचनमा मतदान नगरेकै निहुँमा मंगलबार राति गौशाला नगरपालिकाको निगौलका स्थानीयमाथि टोलमै पसेर कुटपिट भएको घटनाले दुखी बनाएको माओवादी केन्द्रका नेता गिरिराजमणि पोखरेलले बताएका छन् ।

नेता पोखरेलले सामाजिक सन्जालमा लेख्दै टोलमै पसेर आक्रमण गर्नु र घाइतेहरु उपचारमा रहेका बेला अस्पतालमै गएर पुनः आक्रमण गरेको घटनाले दुःखित बनाएको बताएका हुन् । 'निर्वाचनमा म पराजित भए पनि विगत २ दिनदेखि मतदातालाई आभार तथा धन्यवाद ज्ञापन कार्यक्रम आयोजना गर्दै विभिन्न वडामा जाने क्रममा हिजो बिहान त्यही निगौलमा कार्यक्रम गरिएको थियो,' उनले भनेका छन्, 'कार्यक्रममा सहभागी हुने गठबन्धनका नेता, कार्यकर्तामाथि कुटपिट भएको छ ।'

महोत्तरीका प्रमुख जिल्ला अधिकारी, प्रहरी प्रमुखलगायतलाई भेटेर घटना अनुसन्धानबारे जानकारी लिँदै निगौलका जनताको सुरक्षा संवेदनशिलताप्रति गम्भीर हुन अनुरोध गरेको पोखरेलले जनाएका छन् ।

लोकतान्त्रिक प्रक्रियामा सहभागी भए पनि सोच, शैली र व्यवहारमा आपराधिक प्रवृत्ति हुनेहरुको पतन निश्चित हुने उनको दाबी छ । घाइते निगौलवासीको नेता पोखरेलले स्वास्थ्यलाभको कामना गरेका छन् ।

प्रकाशित : मंसिर १४, २०७९ २२:३०
पूरा पढ्नुहोस्
प्रतिक्रिया
पठाउनुहोस्
×