सल्यानमा ११ उम्मेदवारको धरौटी जफत - प्रतिनिधि / प्रदेशसभा निर्वाचन २०७९ - कान्तिपुर समाचार
कान्तिपुर वेबसाईट
AdvertisementAdvertisement

सल्यानमा ११ उम्मेदवारको धरौटी जफत 

विप्लव महर्जन

सल्यान — यही मंसिर ४ गते भएको प्रतिनिधि र प्रदेशसभा निर्वाचनमा सल्यानमा ११ जना उम्मेदवारको धरौटी जफत भएको छ । कानुनी व्यवस्थाअनुसार कुल सदर मतको १० प्रतिशत मत ल्याउन नसकेका ११ जना उम्मेदवारको धरौटी जफत भएको हो ।

प्रतिनिधि र प्रदेशसभा निर्वाचनमा १८ जना उम्मेदवार रहेकामा प्रतिनिधिसभातर्फ राप्रपाका नेत्रलाल श्रेष्ठ, मालेका भिमबहादुर ओली, राष्ट्रिय स्वतन्त्र पार्टीका पवनराज देवकोटा, स्वतन्त्रका जुद्धकुमार सिंहको धरौटी जफत भएको निर्वाचन अधिकृत नीमराज भट्टराईले बताए ।

प्रदेशसभाअन्तर्गत सल्यान १ मा राप्रपाका शिवबहादुर ओली, मालेका तुले सुनार, स्वतन्त्र उम्मेदवार रमेश बुढाथोकी, २ मा राप्रपाका नारायणकुमार शर्मा, जनमुक्ति पार्टीका दण्डवीर पुन, जसपाका अशोक रेउले र स्वतन्त्र निर्मल सिंहको धरौटी जफत भएको उनले जानकारी गराए । उनका अनुसार जिल्लामा कुल मतदाता १ लाख ५७ हजार ७ सय १ रहेका थिए । त्यसमध्ये ८४ हजार मत खसेको थियो भने त्यसमध्ये ६३ हजार सदर भएको थियो ।

सदर मतको १० प्रतिशतअनुसार एक उम्मेदवारले कम्तीमा पनि ६ हजार ३ सय मत ल्याउनु पर्नेमा प्रतिनिधिसभाका उम्मेदवार नेत्रलाल श्रेष्ठले २ हजार २ सय ९३, भीमबहादुर ओलीले १ हजार ५ सय ९५, पवनराज देवकोटाले ३ हजार ६ सय ९४, जुद्ध कुमार सिंहले २ सय ५ मत ल्याएका छन् ।

यस्तै प्रदेशसभाअन्तर्गत सल्यान १ मा शिवबहादुर ओलीले १ हजार ५ सय ६४, तुले सुनारले २ सय ६०, रमेश बुढाथोकीले ५ सय ६३ , र २ मा नारायण कुमार शर्माले २ हजार ५ सय ७७, दण्डविर पुनले १ सय १३, अशोक रेउलेले १ सय ३८ र निर्मल सिंहले २ सय ५ मत ल्याएका थिए ।

प्रकाशित : मंसिर २१, २०७९ १६:०९
प्रतिक्रिया
पठाउनुहोस्

सीटीईभीटीमा तीन विद्यार्थी संगठनले लगाए ताला

कान्तिपुर संवाददाता

काठमाडौँ — परीक्षा सकिएको ३ महिनाभित्रै नतिजा सार्वजनिक लगायतका माग राखी तीन विद्यार्थी संगठनले प्राविधिक शिक्षा तथा व्यावसायिक तालिम परिषद् सीटीईभीटीको भक्तपुरस्थित केन्द्रीय कार्यालयमा तालाबन्दी गरेका छन् ।


सीटीईभीटीले समयमा नै नजिता सार्वजनिक नगर्दा विद्यार्थी रोजगारी र उच्चशिक्षा अध्ययन गर्नबाट समेत वञ्चित भएको विद्यार्थी नेताहरूको गुनासो छ ।

सत्तारुढ नेपाल विद्यार्थी संघ, अखिल क्रान्तिकारी र अनेरास्ववियुले संयुक्त रुपमा तालाबन्दी गरेको विज्ञप्तिमा उल्लेख छ । सीटीईभीटीलाई पटकपटक ध्यानार्कषण गराउँदा पनि कुनै सुनुवाई नभएकाले तालाबन्दी गरिएको विद्यार्थी संगठनले जनाएका छन् ।

विद्यार्थीले गुणस्तर प्राविधिक शिक्षाका लागि अनुगमनलाई प्राथमिकता दिनुपर्ने माग समेत गरेका छन् । सरकारी कलेजलाई प्राथमिकता दिएर सम्बन्धन वितरण गर्नुपर्ने, सीटीईभीटीबाट उत्पादित जनशक्तिलाई विशेष व्यवस्था गरेर रोजगारीको अवसर दिने वातारण बनाउनुपर्ने माग अघि सारिएको छ ।

सीटीईभीटीले हचुवाका भरमा शैक्षिक संस्थाहरूको स्तरवृद्धि गरेको आरोप समेत विद्यार्थीले लगाएका छन् । ‘हचुवाको भरमा अपग्रेडिङ भएको हुँदा अनुगमनको मापदण्डको आधार लागू गरिनुपर्छ,’ विज्ञप्तिमा भनिएको छ, ‘नयाँ सम्बन्धन वितरण आर्थिक चलखेल र राजनीतिक पहुँचका आधारमा नभई मापदण्डको आधारमा हुनुपर्छ ।’

सीटीईभीटीले निवेदन दिएर बसेका कलेजलाई सम्बन्धन दिने प्रक्रिया अघि बढाएको छ । नेविसंघका केन्द्रीय प्रतिनिधि पुरनबहादुर रोकाया, अनेरास्ववियु क्रान्तिकारीका वीरेन्द्र विष्ट र अनेरास्ववियुका हर्क वमले माग पूरा नभएसम्म अनिश्चितकालीन तालाबन्दी जारी रहने बताएका छन् ।

प्रकाशित : मंसिर २१, २०७९ १६:००
पूरा पढ्नुहोस्
प्रतिक्रिया
पठाउनुहोस्
×