स्याङ्जा-२ मा ९ बजेबाट मतगणना सुरू हुने- प्रतिनिधि / प्रदेशसभा निर्वाचन २०७९ - कान्तिपुर समाचार
कान्तिपुर वेबसाईट
AdvertisementAdvertisement

स्याङ्जा-२ मा ९ बजेबाट मतगणना सुरू हुने

कान्तिपुर संवाददाता

कास्की — स्याङ्जा-२ मा बुधबार राति ९ बजेबाट मतगणना सुरू हुने भएको छ । सर्वदलीय बैठकले अहिले ९ बजेबाट मतगणना गर्ने निर्णय गरेको निर्वाचन अधिकृत रामचन्द्र शर्माले जानकारी दिए । बुधबार साँझ बसेको सर्वदलिय वैठकमा मतगणना गर्ने सहमति जुटेपछि मतगणनाको लागि तयारी भइरहेको शर्माले बताएका छन् । उनका अनुसार वालिङ् नगरपालिकाको भवनमा मतगणना हुनेछ ।

स्याङ्जा-२ चापाकोट नगरपालिकाका ४ वटा मतदान केन्द्रमा नेपाली कांग्रेसले बुथ कब्जा गरेको भन्दै नेकपा एमालेसहित अन्य राजनीतिक दलहरुले पुन: मतदानको माग गरेपछि गणना रोकिएको थियो ।

निर्वाचन आयोगले बुधबार नै स्याङ्जा-२ मा मतगणना सुरु गर्न निर्देशन दिएको थियो । बुथ कब्जा गरेर मृत्यु भएका र विदेशमा रहेका मतदाताको नाममा पनि मत खसालेको भन्दै सुरु भएको स्याङ्जा–२ को विवाद जिल्लास्तरबाट सुल्झन नसकेर आयोगमा आइपुगेको हो । स्याङ्जाको चापाकोट नगरपालिका–३ को दिसिङकोट आधारभूत विद्यालय, वडा ४ को राम मन्दिर मावि, वडा ५ का जनसक्रिय आधारभूत विद्यालय र दिनदलायु आधारभूत विद्यालयका सबै मतदात केन्द्रमा कांग्रेसका कार्यकर्ताले बुथ कब्जा गरेर फर्जी मत खसालेको एमालेको दाबी छ।

चापाकोट नगरपालिका–१ को भानु मावि आँधीचौघेरा, गल्याङ नगरपालिका–७ मनहरिखर्कको मतदान केन्द्र, कालीगण्डकी गाउँपालिकाको अमरदीप मावि र कोटाकोट आधारभूत विद्यालय केन्द्रमा एमालेले बुथ कब्जा गरेको कांग्रेसको आरोप छ।

प्रकाशित : मंसिर १४, २०७९ २०:४६
प्रतिक्रिया
पठाउनुहोस्

दाइजोको नाममा हत्या गरिएको भन्दै पीडित पक्षको प्रदर्शन

रुपा गहतराज

नेपालगन्ज — नेपालगन्जमा एक महिला कोठामा मृत भेटिएपछि मृतकका परिवारले दाइजोको नाममा हत्या गरेको भन्दै प्रदर्शन गरेका छन् । गत कात्तिक १६ गते बाँकेको राप्तीसोनारी गाउँपालिका ७ पिप्रहवाकी अफसरुल खान आफ्नै कोठामा झुण्डिएको अवस्थामा भेटिएको भन्दै उक्त घटनाबारे अनुसन्धान गर्न मृतकका आफन्तले माग गरेका हुन् ।


खान काखमा रहेको ९ महिनाको छोरोलाई बाहिर राखेर आफ्नै कोठामा झुण्डिएको अवस्थामा भेटिएकी थिइन् । उक्त घटनालाई लिएर बुधबार पीडित परिवारको पक्षमा महिला अधिकार्मी सडकमा उत्रिएका छन् ।

उनीहरूले जिल्ला प्रहरी कार्यालय र जिल्ला अदालत पुगेर निष्पक्ष छानबिनको माग गरेका हुन् । प्रदर्शनमा सहभागी नेतृ बिन्दु चर्ती मगरले दाइजोको नाममा एउटी महिलामाथि निर्मम रुपमा हत्या गरिएको भन्दै प्रहरीले यसमा छानबिन गर्नुपर्ने बताइन् ।

छोरीको हत्या गरिएको र त्यसलाई प्रहरीले आत्महत्या भन्दै घटनाको अनुसन्धान नगरेको पीडित परिवारको आरोप छ । मृतकका बुवा मो. वाहव खानले प्रहरीले हत्याको मुद्दामा घटनाको अनुसन्धान गर्नुपर्ने माग गरेका छन् ।

प्रहरीका अनुसार मेडिकल रिपोर्टमा आत्महत्या देखिएको छ । प्रहरीको प्रारम्भीक अनुसन्धानमा पनि यो आत्महत्या भएको देखिएको बताइएको छ । यद्यपि प्रहरीले मृतकका पति र जेठाजुलाई पक्राउ गरी आत्महत्या दुरुत्साहन मुद्दा चलाएको बताइएको छ । पीडित पक्षले भने हत्या नै गरेको आरोप लगाउँदै कर्तव्य ज्यान मुद्दामा अनुसन्धान गर्नुपर्ने माग गर्दै आएको छ ।

प्रकाशित : मंसिर १४, २०७९ २०:३६
पूरा पढ्नुहोस्
प्रतिक्रिया
पठाउनुहोस्
×