उदयपुर- १ को मतगणनामा अन्योल कायमै

पछिल्लो पटक निर्वाचन आयोगले मुख्य निर्वाचन अधिकृतलाई कानुनअनुसार निर्णय गर्न अधिकार प्रत्यायोजन गरेपछि माइकिङ गरेर मतगणना सुरु गर्ने भनिएको थियो । सोमबार साँझ पौने ७ बजे पनि सार्वजनिक सूचना जारी गर्दै ८ बजेबाट गणना गर्ने भनिए पनि मतगणना अझै सुरु भएको छैन ।

आयोगले मुख्य निर्वाचन अधिकृत कृष्णप्रसाद सुवेदीलाई कानुनअनुसार निर्णय गर्ने अधिकार प्रत्यायोजन गरेको भनिएको छ । त्यसैका आधारमा मतगणना सुरु गर्ने भनिएको हो तर अहिलेसम्म गणना सुरु नभएको राष्ट्रिय स्वतन्त्र पार्टीका उम्मेदवार उद्धव अधिकारीले बताए ।

आयोगले निर्देशन दिँदै मतगणनाअघि भएको सहमतिका आधारमा गणना कार्यलाई निरन्तरता दिन भनेको थियो । साथै एउटा प्रणालीको मतपत्रबाट दोहोरो मतदान भएको भनी सम्बन्धित मतदान अधिकृतले प्रतिवेदन दिएको भए आयोगको पत्रबमोजिम मतगणना कार्यलाई दिने आयोगको निर्णय भएको भनिएको थियो ।

आइतबार मतगणनाका क्रममा पछिल्लो पटक खोलिएको १० वटा मतपेटिकामा उदयपुर १ (२) प्रदेश सभाको १०० मत पत्र भेटिएकोले गणना रोकिएको थियो ।

६३ हजार ८० मत गणना भइसकेपछि थप गणनाको लागि १० मतपेटिका खोलिएको हो । त्यसै क्रममा प्रदेश २ को १०० मतपत्र भेटिएपछि दलहरुले गणना रोक्न माग गर्दै अवरुद्ध गरेका हुन् ।

७६ हजार ७५६ मत खसेको यो क्षेत्रको ६३ हजार ८० मत गणना भइसकेको छ । गणना भइसकेकोमा कांग्रेसका नारायण खड्काले १ हजार ८२५ मतले अग्रता लिएका छन् । खड्काले २७ हजार ४८४ मत प्राप्त गरेका छन् भने एमालेकी मन्जुकुमारी चौधरीले २५ हजार ६५९ मत प्राप्त गरेको निर्वाचन अधिकृतको कार्यालयले जनाएको छ ।