प्रदेशसभाका अधिकांश महिला पराजित- प्रतिनिधि / प्रदेशसभा निर्वाचन २०७९ - कान्तिपुर समाचार
कान्तिपुर वेबसाईट
AdvertisementAdvertisement

प्रदेशसभाका अधिकांश महिला पराजित

पर्वत पोर्तेल

झापा — उम्मेदवार बनाउँदै उपेक्षामा परेका थिए प्रदेश १ का धेरै महिला नेतृ । प्रदेशसभामा जतिले टिकट पाए अधिकांश पराजित भएका छन् । प्रदेशसभामा जम्मा ७ जना महिला उम्मेदवार थिए ।


एमाले, माओवादी र एकीकृत समाजवादीले २/२ जना तथा राप्रपाले एक महिलालाई प्रदेशसभामा उम्मेदवार बनाएको थियो । सत्ताधारी दल कांग्रेसले प्रदेशमा एकै महिलालाई पनि उम्मेदवार बनाएन ।

तीमध्ये झापा १ (२) मा राप्रपाकी सविना बजगाईंबाहेक कसैले जित्न सकेनन् । प्रदेशसभामा झापाको १० सिट थियो । एक सिटमा मात्रै महिलालाई टिकट दिइएको थियो । बजगाईंले सत्ता गठबन्धनका माओवादी उम्मेदवार श्यामवीर लिम्बूलाई हराएर प्रदेशसभाको यात्रा तय गरेकी हुन् । इलाम १ (१) मा उम्मेदवार बनाइएकी प्रदेश १ की पर्यटनमन्त्री खिनु लङ्वा लिम्बू एमालेकी शोभा पराजुलीभन्दा अघि छन् । यो क्षेत्रमा जसले जिते पनि एक महिला प्रदेशसभामा जाने निश्चित छ । त्यस्तै सुनसरीका ८ सिटमध्ये ३ (१) मा माओवादीले उम्मेदवार बनाएकी प्रदेशसभाका पूर्वउपसभामुख सरस्वती पोख्रेल एमालेका रोहित कार्कीभन्दा पछि छन् । यहाँ कार्कीको जित निश्चितप्रायः छ । यीबाहेक अन्य सबै महिला उम्मेदवार पराजित भइसकेका छन् । मोरङका १२ सिटमध्ये ६ (१) मा उम्मेदवार बनाइएकी एमालेकी रीता न्यौपाने माओवादी केन्द्रका जीवन आचार्यसँग पराजित भइन् । आचार्य माओवादी अध्यक्ष पुष्पकमल दाहालका ज्वाइँ हुन् ।

धनकुटाका २ सिटमध्ये १ (२) की उम्मेदवार माओवादीकी कुसुमकुमारी श्रेष्ठ एमालेका इन्द्रमणि पराजुलीसँग पराजित भएकी छन् । संखुवासभामा एसकी सरिता थापा एमालेका बिदुर लिंधेपसँग पराजित भइन् । तेह्रथुम, भोजपुर, उदयपुर खोटाङ, सोलु, ओखलढुंगा, पाँचथर र ताप्लेजुङमा दलहरूले एक जना पनि महिलालाई उम्मेदवार बनाएनन् । २०७४ मा पनि दुई महिलाले प्रत्यक्षमा निर्वाचित भएर प्रदेशसभामा पुगेका थिए । इलामकी खिनु लङ्वा र उदयपुरकी कला घले एमालेबाट निर्वाचित भएका थिए । प्रदेशसभामा ३० महिलाहरू समानुपातिकवाट पुगेका थिए ।

‘यस पटक प्रदेशसभामा महिलाको संख्या घट्न सक्ने सम्भावना देखिएको छ’, प्रदेश १ की पूर्वराज्यमन्त्री जसमाया गजमेरले भनिन्, ‘टिकट दिन दलहरूले पत्याएनन्, टिकट पाएकालाई जनताले पत्याएनन् ।’ संविधानसभा सदस्य अनिता परियारका अनुसार मुख्य दलहरूले नै महिला र दलितलाई हत्तपत्त उम्मेदवार बनाउने जाँगर गर्दैनन् । उम्मेदवार बनाइहाले हार्ने सम्भावना भएका ठाउँमा दिन्छन् । परियार भन्छिन्, ‘दलहरूको यो मानसिकता परिवर्तन नभएसम्म महिला र दलितलाई नेता बन्न अझै धेरै समय लाग्न सक्छ ।’

प्रदेशसभाकी सदस्य उमिता बराइलीले केही दलहरूले प्रत्यक्ष र प्रदेशसभामा महिलालाई टिकट दिए पनि दलितलाई कुनै दलहरूले विश्वास नगरेको आरोप लगाइन् । प्रदेश १ बाट एक जना पनि दलितलाई प्रदेश र प्रतिनिधिसभाको प्रत्यक्षमा उम्मेदवार नबनाइनु साह्रै दुःखलाग्दो घटना रहेको उनले गुनासो पोखिन् । ‘दलितलाई त टिकट नै दिइएन,’ बराइलीले भनिन्, ‘केही महिलालाई दिइयो तर हार्ने ठाउँमा ।’ संविधानसभा सदस्य परियारले दलहरूले समानुपातिक, समावेशी सिद्धान्तको खिल्ली उडाउँदै दलहरूले दलित र महिलाको प्रतिनिधित्व बर्सेनि घटाउँदै लैजानु दुर्भाग्यपूर्ण भएको दाबी गरिन् । ‘बर्सेनि दलित र महिलाको राजनीतिक प्रतिनिधि घट्दै जानु गम्भीर कुरा हो,’ परियारले भनिन् ।

प्रकाशित : मंसिर ११, २०७९ ०८:५०
प्रतिक्रिया
पठाउनुहोस्

पश्चिम अस्ट्रेलियामा झल्कियो नेपाल

नारायण खड्का

अस्ट्रेलिया — अस्ट्रेलियाको पर्यटकीय सहर पर्थ शनिबार बिहान नेपालमय बन्यो । नेपाली परम्परागत पोसाक, विभिन्न झाँकी, कलासंस्कृति झल्काउने पहिचानसहितको प्रभातफेरीले पश्चिम अस्ट्रेलियाको राजधानी पर्थलाई शनिबार ‘सानो नेपाल’ भन्न मिल्ने बनाइदिएको थियो । 


बिहानै सयौंको संख्यामा सहभागी नेपालीले सुरु गरेको प्रभातफेरीमा नेपालीमात्र नभई स्थानीयले समेत सहभागिता जनाएका थिए । उनीहरूले महोत्सव, नेपालबारेमा चासो र उत्साहसँगै ताली बजाएरसमेत स्वागत गरेका थिए ।

हरेक दुई वर्षमा प्रवासी नेपालीको संगठन एनआरएनएले गर्ने कार्यक्रमले नेपालको पर्यटन प्रवर्द्धनमा टेवा पुर्‍याउनुका साथै नेपालीको पहिचान अझ सुदृढ र सबल बनाउन भूमिका खेलिरहेको आयोजकको भनाइ छ । आयोजक समितिका संयोजक दीपक बस्नेतले नेपाली दोस्रो पुस्ता बढिरहेका कारण कार्यक्रमले उनीहरूलाई आफ्नो कलासंस्कृति र परम्परालाई नजिकबाट चिन्न र बुझ्न यस्तो कार्यक्रमले सहयोग पुरयाउने सुनाए ।

अस्ट्रेलियामा विभिन्न समयमा महोत्सवहरू हुने भए पनि नेपाल महोत्सवको अलग महत्त्व र पहिचान रहेको आयोजकको दाबी छ । ‘एकातिर यो अस्ट्रेलियाको हरेक राज्यमा आयोजना गरिन्छ भने अर्कोतिर यसलाई सफल बनाउन नेपाली समुदायका साथै काउन्सिल, स्थानीय सरकार र अस्ट्रेलियाली नेताहरूको पनि साथ र सहयोग रहने गर्छ,’ एनआरएनएका डेपुटी युथ कोअर्डिनेटर उत्तम अधिकारीले भने ।

महोत्सव सफल बनाउन स्थानीय काउन्सिल र राज्य सरकारले समेत प्रवर्द्धन र प्रचारप्रसारमा सहयोग पुर्‍याएको थियो । करिब एक महिनाअघिदेखि नै सहरका मुख्य भागमा काउन्सिलले प्रचारप्रसारका लागि बोर्ड राखिदिएको थियो भने गाडीहरूमा समेत प्रचार सामग्री राखिएको थियो । कार्यक्रमका सहभागीलाई मनोरञ्जन प्रदान गर्द स्थानीय सांगीतिक ब्यान्ड र कलाकारका साथै नेपालबाट आएका रिदम ब्यान्ड, दीपक बज्राचार्य र सन्दीप क्षत्रीले विभिन्न प्रस्तुति दिएका थिए ।

प्रकाशित : मंसिर ११, २०७९ ०८:४८
पूरा पढ्नुहोस्
प्रतिक्रिया
पठाउनुहोस्
×