बाजुरामा उच्च सुरक्षाबीच मतदान
धनगढी — गत आइतबार स्थागित भएको बाजुराको बुुढीनन्दा नगरपालिका ५ स्थित नन्देश्वरी मावि पीपलचौरमा गरिएको मतदान आज (शनिबार) पुन: सञ्चालन गरिएको छ ।
निर्वाचन कार्यालयका अनुसार शनिबार मतदान शान्तिपूर्ण ढंगले भइरहेको छ । नेपाली सेना, सशस्त्र र जनपथ प्रहरीको बाक्लो उपस्थितिमा उच्च सुरक्षाबीच भएको मतदानमा दिउँसोसम्म ५ सय ६५ मते खसेका जिल्ला निर्वाचन कार्यालयले जनाएको छ । त्यहाँको मतदाता संख्या ९ सय ९९ रहेको छ ।
मतगणनाबारे भने अन्योल कायम छ । जिल्लाका २४ मतदान केन्द्रमा निष्पक्ष तथा स्वतन्त्र मतदान नभएको कांग्रेस र एमालेको आरोप छ ।
कांग्रेसले ८ र एमालेले १६ मतदान केन्द्रमा पुन: मतदानको माग गर्दै निर्वाचन आयोगमा उजुरी गरेका छन् । घटनाको वस्तुस्थिति बुझ्न निर्वाचन आयोगका सहसचिव तुलसीबहादुर श्रेष्ठको संयोजकत्वमा तीन सदस्यीय टोली शुक्रबार बाजुरा आएर सरोकारवालासँग बुझिरहेको छ ।
बाजुराको त्रिवेणी नगरपालिका ७ मा गत आइतबार मतदानको क्रममा कांग्रेस र एमाले कार्यकर्ताबीच झडप हुँदा एक जनाको मृत्यु भएको थियो भने दुई जना घाइते भएका थिए ।
प्रकाशित : मंसिर १०, २०७९ १५:१९