तेह्रथुममा मुख्य निर्वाचन अधिकृतद्वारा मतगणना परिसरमा जान पत्रकारलाई रोक
तेह्रथुम — तेह्रथुममा मुख्य निर्वाचन अधिकृत प्रमेश पोखरेलले मतगणना परिसरमा प्रवेश गर्न जिल्लाका पत्रकारहरुलाई रोक लगाएका छन् । यसअघि प्रकाशित समाचारका विषयमा असन्तृष्टि जनाउँदै पोखरेलले जिल्लाका सबै पत्रकारलाई मतगणना परिसरसम्म जान पनि रोक लगाएका हुन् ।
सोमबार कान्तिपुरसहित विभिन्न सञ्चारमाध्यममा प्रकाशित समाचारको विषयलाई लिएर मुख्य निर्वाचन अधिकृत पोखरेलले आफूलाई मिडियाले सहयोग नगरेको भन्दै समाचार संकलनमै रोक लगाएका छन् ।
सदरमुकाम म्याङलुङको सिंहवाहिनी माविमा अपरान्ह २ : ५० बजेबाट मतगणना भइरहेको छ । आइतबार सम्पन्न निर्वाचनमा छथर गाउँपालिका-१ वडा कार्यालय (ख) मतदान केन्द्रमा प्रदेशसभा सदस्यको मतपत्र नदिई कर्मचारीले प्रतिनिधिसभा सदस्यतर्फको मतपत्र दिएको खुलेको थियो । त्यसपछि राजनीतिक दल, उम्मेदवार र मुख्य निर्वाचन अधिकृतको कार्यालयबीच विवाद सिर्जना भएको थियो ।
सो मतदान केन्द्रमा कर्मचारीको लापरबाहीका कारण मतपत्र साटफेर भएको थियो । कर्मचारीले प्रतिनिधिसभाको मतपत्र दिनुपर्नेमा प्रदेशको र प्रदेशको मतपत्र दिनुपर्नेमा प्रतिनिधिसभाको मतपत्र दिएको खुलेको थियो । त्यही विषय थाहा पाएपछि राजनीतिक दलहरुले पुन: मतदानको माग गरेका थिए । जिल्लाबाट पुन मतदान गर्न माग भएकोमा निर्वाचन आयोगले पुन मतदान नगरी दलीय सहमति जुटाएर मतगणना गराउन निर्देशन दिएको थियो ।
पत्रकारहरुलाई निषेध गरेको विषयमा नेपाल पत्रकार महासंघ जिल्ला शाखाले विज्ञप्तिमार्फत् भत्सर्ना गरेको छ । प्रेस तथा अभिव्यक्ति स्वतन्त्रता, लोकतान्त्रिक शासन व्यवस्था र विधिको शासनका पक्षधर पत्रकार, संचारकर्मीहरुलाई मतगणना परिसरमा लगाएको रोकको विरोध गर्दै महासंघले गम्भिर ध्यानाकर्षण भएको जनाएको छ ।
जिल्लाका सञ्चारकर्मीहरूलाई स्वतन्त्र, निर्वाध, सुरक्षित सरल र सहजढंगबाट मतगणनाको समाचार संकलन र संप्रेषण गर्ने वातावरण सृजना गरिदिन निर्वाचन आयोग समक्ष महासंघले माग गरेको छ ।
प्रकाशित : मंसिर ६, २०७९ १८:३८