कालीकोटमा मतगणना १ बजेबाट

अति सुरक्षा संवेदनशील मानिएको कालीकोटका पलाता, पचाल झरनालगायतका स्थानीय तहबाट १ सय ४ वटा मतपेटिका सोमबार राति सदरमुकाम पुर्‍याइएपछि मुख्य निर्वाचन अधिकृत भरत लम्सालको अध्यक्षतामा बसेको सर्वपक्षीय सर्वदलीय बैठकले मतगणना दिउँसोबाट गणना गर्ने सहमति भएको प्रमुख जिल्ला अधिकारी रामहरि शर्माले बताए ।

दलका प्रतिनिधिहरूले मत पेटिकाको सिल तोडिएको, केही मतदान अधिकृतले हस्ताक्षर गर्न सक्ने मतदातालाई पनि अर्धकट्टीमा ल्याप्चे लगाउन लगाएको, एक निर्वाचन प्रणालीका मतपत्र अर्कै बाकसमा हालिएको विषय उठाएका थिए । ठूला दलका प्रतिनिधिले मतदान केन्द्रको बाकस अलग अलग खन्याएर गणना गर्ने प्रस्ताव गरे पनि स्वतन्त्र उम्मेदवारले विरोध गरेका थिए ।

'निर्वाचन आयोगको निर्देशिका विपरीत अलग-अलग मत गणनामा मेरो सहमति छैन,' प्रतिनिधिसभाका स्वतन्त्र उम्मेदवार काशीचन्द्र बरालले भने, 'गाउँमा जनतालाई डर, त्रासमा राखेर, पैसाको चलखेल गरेर मतदान गर्न लगाइयो ।' उनले दुई वा दुईभन्दा बढी मतपेटिका एउटै ठाउँमा खन्याएर मात्र गणना गर्नुपर्ने अडान राखेका थिए ।

चार ठाउँमा सीसीटिभी क्यामेरा जडान गरेर मतगणनाको व्यवस्थापन गरिएको नेपाल प्रहरीका डिएसपी जयश्वर रिमालले जानकारी दिए । उनले एक उम्मेदवारको एक जना मात्र प्रतिनिधि राख्ने सहमति भएकाले मतगणनामा अनावश्यक भिडभाड गर्न नदिइने जानकारी दिए । ८० हजार ७ सय ३३ मतदाता रहेको कालीकोटमा ४६ हजार ६ सय ६९ मत खसेको छ ।