तरलता अभावको प्रभाव

९ महिनादेखि साढे २९ सय सवारी भन्सारमै

बैंकले ऋण सुविधा नदिएको र सोरुमका पनि बिक्री नभएकाले भन्सारबाट नयाँ गाडी जाँचपास गराउन नसकेको व्यवसायीको भनाइ
बैंकले फाइनान्स सुविधा दिनसाथ समस्या समाधान हुन्छ, सरकारलाई राजस्व पनि राम्रै उठ्छ : ध्रुव थापा, अध्यक्ष, नाडा
विमल खतिवडा

काठमाडौँ — बैंकहरूले ऋण प्रवाह गर्न छाडेका कारण ९ महिनायता साढे २९ सय सवारीसधान विभिन्न भन्सार नाकामा अड्किएर बसेका छन् । व्यवसायीले सोरुममा भएका सवारी बिक्री भएपछि मात्र भन्सारमा रोकिएका सवारी छुटाउने गरेका छन् । जसले गर्दा भन्सारमा धेरै संख्यामा सवारी रोकिएका हुन् ।

९ महिनादेखि साढे २९ सय सवारी भन्सारमै

नेपालमा धेरै सवारी भित्रिने भन्सार नाकामा वीरगन्ज र भैरहवा पर्छन् । जसअनुसार भैरहवा नाकामा मात्रै पिकअप गाडी, जिप, स्कुल बस, कार र भ्यानसहित १ हजार ७७ थान साधन थन्किएका भैरहवा भन्सार कार्यालय प्रमुख मनिराम पौडेलले बताए । ‘नयाँ सवारीसाधन भन्सारमा भित्रिरहन्छन् । अहिले पनि धेरै गाडी आएर बसेका छन्, जसमध्ये पिकअप गाडी धेरै संख्यामा छन्,’ उनले भने, ‘गाडी ल्याउने व्यवसायीसँग बुझ्दा बैंकले ऋण सुविधा नदिएकाले भन्सारमै थन्क्याएर राख्नुपरेको बताउने गरेका छन् ।’

यता, वीरगन्ज भन्सार कार्यालय प्रमुख नवराज ढुंगानाका अनुसार गाडीका च्यासिससहित १८ सय सवारीसाधनको भन्सार जाँचपास हुन बाँकी छ । जसमध्ये सयौं सवारी गत आर्थिक वर्षमै भन्सार ल्याइएका छन् । भन्सार कार्यालयको परिसर भरिएर व्यवस्थापन नै गर्न सकस पर्न गालेपछि भन्सार विभागले सम्बन्धित व्यवसायी र नाडा अटोमोबाइल्स एसोसिएसन अफ नेपाललाई समेत पत्राचार गरेको छ । ‘भन्सार परिसरमा नयाँ–नयाँ गाडी देखिन्छन् तर जाँचपासका लागि कसैले कागजात पेस गर्दैनन्,’ भन्सार विभागका सूचना अधिकारी पुण्यविक्रम खड्काले भने, ‘किन जाँचपास नगरेको भन्दा न व्यवसायीले चासो दिएका छन् न नाडाले नै केही भनेको छ ।’

जाँचपासमा सहजीकरण र व्यवस्थापनका लागि छलफलमा बोलाए पनि नाडाले समय नदिएको उनले दाबी गरे । ‘तपाईंहरूको समस्या के हुन्, हामीले के सहजीकरण गर्न सक्छौं आउनुस् भन्दै पुस पहिलो साता चिठी पठाएका थियौं,’ उनले भने, ‘भन्सारमा ल्याएर लामो समयसम्म सवारीसाधन राखिदिँदा कार्यालयका अन्य कामसमेत प्रभावित हुने अवस्था छ ।’

भैरहवा र वीरगन्जबाहेक चीनबाट ल्याइएका सिन्धुपाल्चोकको तातोपानी भन्सारमा २० वटा र रसुवा भन्सारमा ७० वटा सवारी जाँचपास हुन बाँकी छन् । ती सवारी कार्यालय परिसरमा पार्किङ गरेर राखिएको पनि महिनौं भइसकेको रसुवा भन्सार प्रमुख नारायणप्रसाद भण्डारीले बताए । ‘म प्रमुख भएर आएको ३ महिना भयो । त्यसयता एउटा पनि नयाँ गाडी आएको छैन । यसअघि नै आएका ७० वटा गाडी अझै यहींको पार्किङमा छन्,’ उनले भने, ‘जसमा पिकअप भ्यान, विद्युतीय सवारीलगायत छन् ।’

नाडा अध्यक्ष ध्रुव थापा व्यावसायिक प्रयोजन (कमर्सियल) का लागि ल्याइएका सवारीसाधन मात्रै भन्सारमा रोकिएको बताउँछन् । पिकअप, बढी सिट क्षमताका जिप, बस, बसका च्यासिस, ट्रकलगायतको जाँचपास हुन नसकेको उनले स्विकारे । ‘बैंक तथा वित्तीय संस्थाबाट फाइनान्सिङ भएन । पहिला अर्डर भएका गाडीहरू आइरहे पनि छुटाउन पैसा नहुँदा भन्सारमै रोकिएका हुन्,’ उनले भने, ‘छुटाउन गाडीको मूल्यभन्दा दोब्बर रकम भन्सारमा बुझाउनुपर्छ, त्यसका लागि व्यवसायीसँग पैसा भएन ।’

सुरुमा कम्पनीमा गाडी अर्डर गरिन्छ । त्यसपछि प्रतीत पत्र (एलसी) खोलिन्छ र उता कम्पनीले गाडी पठाउँछ । त्यसपछि भन्सारमा आएका गाडी जाँचपास गर्ने र सोरुममा भएका पनि बिक्री गर्ने गरिन्छ । ‘यसरी चक्रअनुसार गाडीको आयात र बिक्री गरिन्छ,’ उनले भने, ‘तर पहिला अर्डर गरेका, एलसी खोलेका सबै गाडी भन्सारमा थन्किएका छन् । सोरुममा भएका गाडी बिक्री भइसकेका छैनन्, जसले गर्दा भन्सारमा गाडीको संख्या धेरै भएको हो ।’

व्यवसायीले भन्सारमा गाडी पार्किङ गरेको शुल्क बुझाउनुपर्छ । पार्किङ शुल्कबापत दैनिक ५ रुपैयाँसम्म तिर्नुपर्ने उनले जनाए । बैंकले फाइनान्स सुविधा दिनासाथ यो समस्या समाधान हुने उनको दाबी छ । ‘समस्या समाधान हुनासाथ भन्सार जाँचपास गरेर गाडी धमाधम सोरुममा ल्याइनेछ,’ उनले भने, ‘सरकारलाई राजस्व पनि राम्रै उठ्नेछ ।’ उनका अनुसार नेपालमा खपत हुनेमध्ये सामान्यतया वीरगन्जबाट ६० प्रतिशत, भैरहवाबाट ३० प्रतिशत र अन्य नाकाबाट १० प्रतिशत गाडी भित्रिने गरेका छन् ।

प्रकाशित : पुस १३, २०७९ २२:४५
प्रतिक्रिया
पठाउनुहोस्
जनताको राय

छ वर्षअघि अन्त्य भइसकेको यातायात क्षेत्रको सिन्डिकेट ब्युँताउने चलखेल सुरू भएको छ । तपाईंको के राय छ ?