अमेरिकी केन्द्रीय बैंक 'फेड'ले फेरि बढायो ब्याजदर 

सन् २०२२ मा फेडले योसहित ६ पटक ब्याजदर वृद्धि गरेको छ । अमेरिकामा यो सन्दर्भ ब्याजदर सन् १९८० यताकै उच्च हो । नीति निर्माताले अर्को वर्ष यस्तो दर ५.१ प्रतिशतसम्म पुग्न सक्ने अनुमान गरेका छन् । अमेरिकी ब्याजदरले सुनचाँदी, कच्चा तेल तथा अमेरिकामा उत्पादित वस्तुको मूल्यमा समेत असर पार्ने भएकाले समग्र विश्व अर्थतन्त्रमा प्रभाव पर्दछ । मूल्यवृद्धिलाई वार्षिक २ प्रतिशतमा कायम राख्ने लक्ष्यअनुरुप सन्दर्भ ब्याजदर बढाउँदै जाने संकेत फेडले गरेको छ । सन्दर्भ ब्याजदरले नै अमेरिकामा उपभोक्ताले लिने जुनसुकै ऋण, ओभरड्राफ्टको दर बढाउने छ । जसले गर्दा घर, सवारीसाधन वा व्यापारिक ऋणमा लागत बढ्न जानेछ ।

यस्तो ब्याजदर बढ्दा उपभोक्ताले ऋण लिएर खर्च नगर्ने, घर तथा सवारीसाधनको खरिदमा मितव्ययिता अपनाइने भएकाले समग्रमा तिनको माग घट्न गई मूल्यवृद्धि नियन्त्रणमा सघाउ पुग्ने फेडको दाबी छ । यसअघिको सन्दर्भ ब्याजदर वृद्धिले मूल्यवृद्धिलाई नियन्त्रणमा राख्न सघाउ पुगेको समेत फेडका अध्यक्ष जेरोम एच पावेलले बताएका छन् ।