एक वर्षदेखि अलपत्र सडक कालोपत्र योजना- अर्थ / वाणिज्य - कान्तिपुर समाचार
कान्तिपुर वेबसाईट
AdvertisementAdvertisement

एक वर्षदेखि अलपत्र सडक कालोपत्र योजना

घनश्याम खड्का

म्याग्दी — राष्ट्रिय पुनर्निर्माण प्राधिकरणले भूकम्प प्रभावित सडकअन्तर्गत निर्माण गर्नुपर्ने अन्नपूर्ण गाउँपालिका–६ घारको पोखरे–चित्रे १८.५ किमि सडक कालोपत्र कार्यक्रम अलपत्र परेको छ । सडक निर्माण नसकिँदै प्राधिकरणले जिल्लामा रहेको आयोजना कार्यान्वयन इकाइ हटाएपछि सडक स्तरोन्नतिको काम अलपत्र परेको हो । 


सम्झौताअनुसार ०७७ जेठ २२ सम्म कालोपत्र भइसक्नुपर्ने थियो । तर ४५ प्रतिशत मात्रै काम सकेर प्राधिकरणले आयोजना कार्यान्वयन इकाइ ०७८ भदौ मसान्तदेखि फिर्ता गरेपछि कामले निरन्तरता नपाएको हो । प्राधिकरणले योजनाको बाँकी काम प्रादेशिक पूर्वाधार कार्यालय म्याग्दीलाई हस्तान्तरण गर्न खोजेको थियो । तर कार्यालयले सकार्न नमानेपछि ०७८ असोज १ देखि योजना अलपत्र छ ।

पोखरे–चित्रे १८.५ किमि सडक कालोपत्र स्तरवृद्धि कार्यक्रम कसले हेर्ने भन्ने विषयमा विवाद रहिरहेकैले गत वर्ष बजेटविहीन भएको प्रतिनिधिसभाका निवर्तमान सदस्य भूपेन्द्रबहादुर थापाले बताए । चालु आर्थिक वर्षमा भने उक्त सडक संघीय मन्त्रालयअन्तर्गत पोखरास्थित पूर्वाधार विकास कार्यालयमा हस्तान्तरण भएको छ । ‘चालु आर्थिक वर्षमा उक्त योजना हेर्ने निकाय टुंगो गरी ८ करोडभन्दा बढी बजेट निकासा भइसकेको छ,’ थापाले भने, ‘अब ठेकेदारसमेत काममा फर्कन्छन् । सोही सडकअन्तर्गत पाउद्वार गाउँ जोड्ने घारखोला पुल पनि अलपत्र परेको थियो, चालु वर्षमा पूर्वाधार कार्यालय पोखरालाई बजेट निकासा भइसकेको छ । काम छिटो हुने विश्वास लिएको छु ।’

पोखरे–चित्रे सडकको भौतिक प्रगति ५४ र वित्तीय प्रगति ५२.२५ प्रतिशत मात्र छ । सम्झौतामा १८.५ किमि सडक कालोपत्र गर्ने उल्लेख भए पनि आयोजनाले समय–समयमा डिजाइन परिवर्तन गरी ४.३ किमि ढुंगाको स्वेलिङ, २.३ किमि आरसीसी ढलान र बाँकी कालोपत्र गर्ने रहेको जिल्ला आयोजना कार्यान्वयन इकाइले त्यति बेला बताएको थियो ।

सडकका विभिन्न खोल्सामा भलबाढी तर्काउन ९० एमएमका ११ मध्ये ४ वटा र ६० एमएमका ३३ वटा ह्युमपाइप राख्न बाँकी छ । आयोजना कार्यान्वयन इकाइको पछिल्लो रिभाइज डिजाइनअनुसार पहिरो जोखिमयुक्त क्षेत्रमा पिच गर्दा बेस, सबबेस मिलाउन १० टनभन्दा बढीको रोलिङ मेसिनले लोड दिँदा वरपरको पूरै जमिन भाइब्रेट भई थप पहिरो जान सक्ने भएकाले कतै ढुंगाको सोलिङ मात्र, कतै ढलान र धेरै कालोपत्र गर्न लागिएको आयोजनाका प्राविधिकले बताए । ढुंगा सोलिङ र ढलान ४.४ मिटर चौडा र कालोपत्र भने डबलकोट ३.७५ मिटर र सिंगलकोट ४.५ मिटरको रहने बताइएको छ ।

प्रकाशित : मंसिर ११, २०७९ ०७:४३
प्रतिक्रिया
पठाउनुहोस्

एउटा बाख्रा फार्मले सयौं किसानलाई लाभ

९ करोड लगानीमा बाख्रा फार्म, ५० वटा बाख्राबाट सुरू गरिएको खोरमा अहिले ६ सय बाख्रा
प्रताप विष्ट

हेटौंडा — पचास वटा बाख्राबाट व्यवसाय सुरु गरेका हेटौंडा उपमहानगरपालिका–४ का गोविन्द सुवेदीको खोरमा अहिले ६ सय बाख्रा छन् । अस्ट्रेलियाबाट दुई वटा बोयर जातका बोका ल्याएर स्थानीय बाख्रामा क्रस गराएका थिए ।


त्यति बेला उनले प्रतिगोटा ३ लाखमा २ वटा बोयर बोका ल्याएका थिए । त्यति नै बेला १० वटा बोयर बाख्रा पनि ल्याएका थिए, जसकारण उनको बाख्रा फार्म क्रमशः बोयर बाख्राको फार्मका रूपमा विकास हुँदै गयो ।

हेटौंडा उपमहानगरपालिका–३ बसामाडीमा ०७० मा स्थापित फार्म सिमरथली एग्रो प्रालिमा विस्तार भएको छ । यहाँ ७५ बोका र ४ सय २५ बोयर बाख्रासहित ६ सय छन् । पाँच जना संलग्न रहेको उक्त फार्ममा अहिले ९ करोड रुपैयाँ लगानी भइसकेको छ । ‘घाँस लगाउन ३ बिघा जमिन किनेका छौं । बाख्रा राख्न १५ कट्ठामा आधुनिक पक्की गोठ बनाएका छौं,’ सुवेदीले भने । फार्म अवलोकन गर्न आउनेहरूलाई बस्न आवासको पनि व्यवस्था गरिएको छ । किसानलाई सैद्धान्तिक र व्यावहारिक तालिम दिन आवासीय तालिम हल पनि निर्माण गरिएको छ । उक्त फार्मको अवलोकन गर्न अहिलेसम्म ७० जिल्लाबाट किसान आइसकेका छन् । यहाँ उत्पादित बोयर जातका पाठापाठी र बोका ६६ जिल्लामा पुगिसकेको सुवेदीले जनाए । अघिल्लो आर्थिक वर्षमा ५ करोड रुपैयाँ हाराहारीको कारोबार गरेको थियो । गत आर्थिक वर्षमा भने ३ करोड रुपैयाँको मात्र कारोबार गरेको सुवेदीले बताए ।

फार्मले मकवानपुरका किसानको जीवनमा पनि राम्रै आयआर्जन गराउन सफल भएको छ । जिल्लाका ४८ बाख्राफार्मका लागि सुवेदीको फार्मले बीउका रूपमा बोयर बोका उपलब्ध गराउँदै आएको छ । र, बोयरको क्रसबाट जन्मिएका पाठापाठी सबै फार्मले किनिदिएर अन्यत्र बिक्री गर्ने गरेको छ । ‘सिमरथली एग्रो प्रालि अर्थात् बोयर बाख्राफार्मका कारण मेरो पनि आम्दानी दोब्बर भएको छ,’ कैलाश गाउँपालिकास्थित चुनियाका किसान कर्ण पाख्रिनले भने, ‘मैले सामान्य ढंगले बाख्रापालन गर्दा वर्षको ८ देखि १० लाख रुपैयाँका खसीबोका बेच्थें, अहिले बोयर बोकाबाट पाठापाठी उत्पादन गरेपछि वर्षको २० लाख रुपैयाँसम्म आम्दानी हुने गरेको छ ।’

सिमरथली एग्रो फार्ममा १८ जनाले प्रत्यक्ष रोजगारी पाएका छन् । सस्तो ब्याजदरमा बैंकबाट ऋण लिएर बाख्राफार्मलाई देशकै नमुना फार्म बनाउने प्रयास गरिएको सुवेदीले बताए । बाख्राको बडकुलाको प्रशोधन गर्ने मेसिन ल्याएर गुणस्तरयुक्त मल उत्पादन गर्ने र मलमूत्र संकलन गरेर घाँस र तरकारी खेतीमा प्रयोग गर्ने तयारी गरिरहेको पनि उनको भनाइ छ । स्थानीय, प्रदेश र संघ– तीनै तहका सरकारले यस्ता फार्मलाई सहज ढंगले ऋण र प्राविधिक उपलब्ध गराउनुपर्ने उनको माग छ ।

बाख्रा खरिद गर्न नसक्ने र विदेशबाट फर्किएर नेपालमै केही गरौं भन्ने युवाका लागि फार्मले एक सय ५० वटा बाख्रा उपलब्ध गराएको छ । फार्मले हालसम्म बाख्रा पाल्न ४ सय घरका १२ सय जनालाई तालिमसमेत दिएको छ ।

प्रकाशित : मंसिर ११, २०७९ ०७:३९
पूरा पढ्नुहोस्
प्रतिक्रिया
पठाउनुहोस्
×