अब काठमाडौं महानगरले सहकारीको नियमित अनुगमन गर्ने- अर्थ / वाणिज्य - कान्तिपुर समाचार

अब काठमाडौं महानगरले सहकारीको नियमित अनुगमन गर्ने

कान्तिपुर संवाददाता

काठमाडौँ — काठमाडौं महानगरपालिकाले आफ्नो क्षेत्रभित्र रहेका सहकारी संघसंस्थाको नियमित रुपमा अनुगमन गर्ने भएको छ । महानगरभित्र भएका सहकारीहरुमा आफ्नो रकम जोखिममा परेको भन्दै सर्वसाधारणबाट उजुरी आउने क्रम बढेकाले  नियमित अनुगमन गर्नु परेको काठमाडौं महानगरपालिकाकी उपप्रमुख सुनिता डंगोलले बताइन् ।


सहकारीको नियमित अनुगमनका लागि कार्यपालिकाअन्तर्गत सहकारी समिति गठन गर्ने पनि उनले बताइन् । ‘आफ्नो बचत जोखिममा परेको भन्दै उजुरी आउने क्रम बढेको छ,’ महानगरअन्तर्गत सहकारी विभागको काम र योजनाका विषयमा बुधबार भएको अन्तर्क्रिया कार्यक्रममा डंगोलले भनिन्, ‘जनसाधारणले जम्मा गर्ने यो बचत रकमको जोखिम घटाउन सहकारीहरुमा नियमित अनुगमन गर्नुपर्छ ।’

विभागले अहिले १ सय १८ वटा सहकारीको उजुरी सुनुवाई गरिरहेको छ । जसमध्ये ७१ वटा आफैं हेरिरहेको छ भने ४७ वटालाई कारबाहीका लागि प्रहरीमा पठाएको छ । आफैं हेरिरहेको सहकारीका उजुरीहरुमा बचत फिर्ता, ब्याज मिलान, लिलाम व्यवस्थापन, अध्यक्षको मनोमानी कारोबार, स्टेटमेन्टमा कम रकम उल्लेख गरेको, साधारण सभा नबोलाएको, कार्यसमिति विवाद, लेखा समिति विवाद, ऋण असुली लगायत विषय रहेको महानगरले जनाएको छ।

हाल काठमाडौं महानगरपालिका क्षेत्रमा १ हजार ९ सय ५५ वटा सहकारी छन् । तीमध्ये १ हजार ६ सय २८ वटा बचत तथा ऋण सहकारी हुन् । २ सय ६४ वटा बहुउद्देश्यीय, १५ वटा कृषि, १३ वटा उपभोक्ता, ३ वटा सीपमुलक, २ वटा शिक्षामूलक, एउटा सञ्चार, ३ वटा श्रमिक, पर्यटन, साझा र चियाका एक/एक वटा र अन्य ५ वटा सहकारी छन् ।

प्रकाशित : मंसिर ८, २०७९ १७:३२
प्रतिक्रिया
पठाउनुहोस्

सिरहा १(१) : एमालेका चौधरी विजयी

भरत जर्घामगर

सिरहा — प्रदेश सभातर्फ सिरहा क्षेत्र नम्बर १(१) मा एमालेका राजेन्द्र प्रसाद चौधरी विजयी भएका छन् ।

कांग्रेसका सुनिल कुमार महतोलाई १ सय ७१ मतान्तरले पराजित गर्दै चौधरी विजयी भएका हुन् । चौधरीले ११ हजार ७ सय २१ मत पाएर विजयी भए । महतोले ११ हजार ५ सय ५० मत पाए ।

प्रकाशित : मंसिर ८, २०७९ १७:२५
पूरा पढ्नुहोस्
प्रतिक्रिया
पठाउनुहोस्
×