अन्तर्राष्ट्रिय व्यापार मेलामा नेपालका ३ स्टल- अर्थ / वाणिज्य - कान्तिपुर समाचार

अन्तर्राष्ट्रिय व्यापार मेलामा नेपालका ३ स्टल

राजेश मिश्र

नयाँदिल्ली — भारतको दिल्लीस्थित प्रगति मैदानमा भइरहेको अन्तर्राष्ट्रिय व्यापार मेलामा नेपालले पनि उपस्थिति जनाएको छ । नोभेम्बर १४ देखि सुरु भएको मेलाको ४१ औं संस्करण नोभेम्बर २७ सम्म चल्नेछ । मैदानको ७५ हजार वर्गमिटर क्षेत्र मेलाका लागि 


छुट्याइएको छ । जहाँ भारतका २९ राज्य तथा बाह्य मुलुकका पनि दर्जनौं स्टलहरू छन् । त्यसबाहेक फुड कर्नर, सांस्कृतिक कार्यक्रम तथा ठूला उद्योगहरूले आफ्ना उत्पादन बेच्न स्टलहरू पनि राखेका छन् । दैनिक लाखौंको संख्यामा सर्वसाधारण तथा उद्योगी, व्यापारीले मेलाको अवलोकन गरिरहेका छन् ।

भारतले आयोजना गर्ने अन्तर्राष्ट्रिय मेलाहरूमा यसलाई ठूलो र विशेष महत्त्वको मानिन्छ । विभिन्न मुलुकलाई भारतीय बजारमा आफ्नो उत्पदानको प्रचार र व्यापारको मौका यो मेलाले दिँदै आएको छ । त्यसबाहेक भारतकै एउटा राज्यको उत्पादनलाई अर्को राज्यसम्म पुर्‍याउने उद्देश्यसमेत मेलाले राख्दै आएको छ । कोभिड महामारीका कारण पछिल्ला २ वर्ष मेला आयोजना गरिएको थिएन । सोही कारण यस वर्ष मेलामा भीड बढेको बताइएको छ ।

मेलामा नेपालले २७ वर्गमिटर क्षेत्र भाडामा लिएर ३ वटा स्टल राखेको छ । जसका लागि २१ लाख रुपैयाँ खर्चिइएको छ । ३ वटा स्टलमा ६ व्यवसायीलाई स्थान दिइएको छ । हस्तकलाका सामग्री, उनी कपडा, पस्मिना, रुद्राक्ष, खुकुरी, पत्थरले बनाइएका शृंगार प्रयोजनका सामग्रीहरू लिएर नेपाली व्यापारी मेलामा सहभागी छन् । नेपाल हस्तकला कालिगड संघका अध्यक्ष हरि सेन्चुरी विकले नेपाली उत्पादनलाई अन्तर्राष्ट्रिय बजारसम्म पुर्‍याउन मेला उपयोगी देखिएको बताए ।

‘नेपालमा उत्पादन चिनाउने अवसर मेलाले दिए पनि यहाँको बजारअनुसार हाम्रो तयारी नपुगेको जस्तो मैले महशुश गरें,’ उनले कान्तिपुरसँग भने, ‘अझै धेरै तयारीका साथ यहाँ उपस्थित हुनुपर्ने रहेछ । त्यसका लागि नेपालका ठूला उद्योगी व्यसायीहरूको पनि साथ लिएर नेपाली उत्पादनलाई चिनाउने र व्यापार फैलाउने मौकाको सदुपयोग गरिनुपर्छ ।’ उनका अनुसार नेपाली रुद्राक्ष, टोपी, पस्मिना र उनी कपडा खोज्ने ग्राहकहरू प्रशस्तै आएका छन् । मेलाको पहिलो ५ दिन व्यापारीहरूका लागि मात्रै खुला गरिएको थियो । जहाँ सामान हेर्दै व्यापारीहरूले आगामी दिनका लागि सम्बन्ध विस्तार गर्ने र खरिद माग गरेका थिए । आफूहरूले पनि भोलिका दिनका लागि सम्बन्ध विस्तारको मौका पाएको उनले सुनाए ।

मेलामा सहभागिताका लागि व्यापार तथा निकासी केन्द्रले जारी गरेको सूचनापछि १५ व्यवसायीले चासो राखेका थिए । जसमध्ये ६ जनालाई केन्द्रले अवसर दिएको हो । सोम हिमालय हस्तकला केन्द्रका सोम मुडवरीले मेलामा रुद्राक्ष खोजीको सूचीमा रहेको बताए ।

मेला घुम्न पुगेका दिल्लीमै बस्दै आएका रमेश जोशीले भने मेलामा नेपालको उपस्थिति फितलो देखिएको टिप्पणी गरे । ग्राहकलाई नेपाली सामानबारे राम्ररी व्याख्या गर्न सक्ने क्षमता नै बिक्रेतामा नदेखिएको उनको भनाइ छ । ‘नेपालको झन्डामुनि राखिएको स्टलमा न त्यसअनुसारका सामान छन् न त्यसको व्यापार प्रवर्द्धनका लागि मार्केटिङ पोलिसी अपनाइएको देखिन्छ । उपस्थितिका लागि उपस्थिति मात्रै भएको पाइयो,’ उनले भने ।

नेपाली दूतावासका इकोनोमिक काउन्सिलर बद्रि तिवारी नेपालको उत्पदानलाई बजारीकरणमा मद्दत पुर्‍याउन दिल्लीमा बर्सेनि हुने यो मेला धेरै उपयोगी रहेको बताउँछन् । यस अवसरको सदुपयोग नेपालका ठूला अद्यौगिक घरानाहरूले पनि उठाउनुपर्ने उनले बताए । ‘भारतभित्र र बाहिरबाट ठूला–ठूला स्टल तथा ठूलो परिणाममा सामग्रीहरू राखिएका ठाउँमा निश्चय पनि नेपालको उपस्थिति कमजोर देखिनै नै भयो,’ उनले भने ‘तर सानो उपस्थितिले पनि नेपालका केही उत्पादनहरूलाई चिनाउने बजारीकणमा यसले सहयोग भने पुर्‍याएको छ ।’

प्रकाशित : मंसिर ८, २०७९ ०७:४२
प्रतिक्रिया
पठाउनुहोस्

धेरै आयकर तिर्ने व्यक्ति विजय शाह र संस्था सूर्य नेपाल

कान्तिपुर संवाददाता

काठमाडौँ — आर्थिक वर्ष ०७७/७८ मा सबैभन्दा बढी कर तिर्नेमा संस्थातर्फ सूर्य नेपाल र व्यक्तितर्फ विजयकुमार शाह रहेका छन् । सूर्य नेपाल यसअघि पनि ७ पटकसम्म सबैभन्दा बढी आन्तरिक राजस्व दाखिला गर्ने कम्पनीको सूचीमा अग्रणी स्थानमा रहँदै आएको छ ।

शाह ०७५/७६ मा पनि सबैभन्दा बढी व्यक्तिगत आयकर दाखिला गर्ने करदाता भएका थिए । आन्तरिक राजस्व विभागले राष्ट्रिय कर दिवसको अवसरमा बुधबार सूर्य नेपाल र शाहसँगै सबैभन्दा बढी कर तिर्ने विभिन्न क्षेत्रका १६ करदातालाई सम्मान गरेको हो । विभागले २०६९ सालदेखि हरेक वर्ष विभिन्न क्षेत्रका ठूला करदातालाई सम्मान गर्दै आएको छ ।

यसैगरी, सबैभन्दा बढी आयकर तिर्नेमा नेपाल दूरसञ्चार कम्पनी, निर्यात कारोबारमा श्री शिवशक्ति घिउ उद्योग, विशेष उद्योगमा राजेश मेटल क्राफ्ट, कृषि एवं पशुपक्षीजन्य उद्योगमा ओसीबी फुड्स एन्ड फिड्स प्रालि, सहकारी तथा लघुवित्त कारोबार गर्ने संस्थामा छिमेकी लघुवित्त वित्तीय संस्था, बैंक तथा वित्तीय कारोबार गर्ने संस्थामा नबिल बैंक, बिमा व्यवसायमा नेपाल पुनर्बिमा कम्पनी, स्वास्थ्य तथा शिक्षा सेवा प्रदायक कम्पनीमा नोबेल मेडिकल कलेज शिक्षण अस्पताल रहेका छन् । पर्यटन व्यवसायमा मनकामना दर्शन प्रालि, वस्तु व्यापारको कारोबारमा हंसराज हुलास चन्द एन्ड कम्पनी प्रालि, मध्यमस्तरीय करदातामा नेपाल धितोपत्र विनिमय बजार, ऊर्जामूलक उद्योगमा चिलिमे जलविद्युत् कम्पनी र रेमिट्यान्स तथा मनिट्रान्सफरहरूमा आईएमई रेमिट्यान्स कम्पनी रहेको विभागले जनाएको छ ।

२०६७ साउनदेखि २०७९ असारसम्मको कर अवधिमा मूल्य अभिवृद्धि कर विवरण र सोबमोजिमको कर समयमै दाखिला गरी नियमित कर सहभागिता जनाएका करदातामध्ये सबैभन्दा बढी मूल्य अभिवृद्धि कर दाखिला गर्नेमा गोर्खा ब्रुअरी प्रालि रहेको विभागको भनाइ छ । अघिल्लो आवमा सबैभन्दा बढी कर तिर्ने १० जना कर्मचारीलाई पनि विभागले सम्मान गरेको छ । यहाँ हालसम्म धेरै पटक सम्मानित भएका करदाताको चर्चा गरिएको छ ।

सूर्य नेपाल

विभागले ठूला करदातालाई सम्मान गर्न थालेदेखि सबैभन्दा बढी आयकर तिर्ने कम्पनीको पहिलो स्थानमा सूर्य नेपाल रहँदै आएको छ । यो कम्पनीले २०७३ यता हरेक वर्ष बढी आयकर तिर्ने कम्पनीको अग्रणी स्थानमा छ । २०७२ मा पनि सबैभन्दा बढी अन्तः शुल्क तिर्ने कम्पनीमा सूर्य नेपाल रहेको थियो । २०७१ र २०७२ मा सबैभन्दा बढी आयकर तिर्ने कम्पनीका रूपमा एनसेल विभागबाट सम्मानित भएको थियो ।

नबिल बैंक

बैंक तथा वित्तीय क्षेत्रमध्येबाट सबैभन्दा बढी आयकर दाखिला गर्ने कम्पनीमा नबिल बैंक अग्रणी स्थानमा छ । यसअघि कम्पनीले २०७१, २०७२, २०७३, २०७५, २०७७, २०७८ सालमा पनि विभागबाट सम्मानित भएको थियो । यसबाहेक २०७४ मा हिमालयन बैंक र २०७६ मा राष्ट्रिय वाणिज्य बैंक सबैभन्दा बढी कर तिर्ने वाणिज्य बैंक बनेका थिए ।

सिद्धार्थपछि विजय

व्यक्तिगत आयकरमध्ये हालसम्म धेरै पटक उच्च कर तिर्नेमा सिद्धार्थशमशेर जबरा छन् । विभागले ठूला करदातालाई सम्मान गर्न थालेदेखि ६ पटक (२०७१, २०७३, २०७४, २०७५, २०७६ र २०७८) उनी सम्मानित भइसकेका छन् । उनी सिप्रदी ट्रेडिङ प्रालिका कार्यकारी अध्यक्ष हुन् । २०७७ र यस वर्ष भने उनलाई उछिन्दै विजयकुमार शाह सबैभन्दा बढी कर तिर्नेको पहिलो नम्बरमा पुगेका छन् । शाह जाउलाखेल डिस्ट्रलरी ग्रुपका अध्यक्ष हुन् ।

नेपाल दूरसञ्चार कम्पनी

यो वर्ष पनि सबैभन्दा बढी मूल्य अभिवृद्धि कर (भ्याट) दाखिला गर्ने कम्पनीको पहिलो स्थानमा नेपाल दूरसञ्चार कम्पनी लिमिटेड रहेको छ । यसअघिका ४ वर्ष (२०७१, २०७२, २०७३ र २०७८) पनि यो कम्पनी यही शीर्षकमा विभागबाट सम्मानित भइसकेको छ ।

आईएमई

रेमिट्यान्स व्यवसायमा सबैभन्दा बढी आयकर तिरेको भन्दै विभागले आईएमई लिमिटेडलाई सम्मानित गरेको छ । आईएमई यसअघि पनि ४ पटक (२०७१, २०७२, २०७३ र २०७७) बढी आयकर तिर्ने रेमिट्यान्स कम्पनीका रूपमा सम्मानित भइसकेको छ ।

डाबर नेपाल

हालसम्मको इतिहास हेर्दा निर्यातकर्ताहरूमध्ये सबैभन्दा बढी आयकर तिर्ने कम्पनीको अग्रणी स्थानमा डाबर नेपाल रहँदै आएको छ । यो कम्पनीलाई २०७२, २०७३, २०७५, २०७६, २०७७ र २०७८ मा सबैभन्दा बढी आयकर तिरेको भन्दै विभागले सम्मान गरेको थियो । यो वर्ष भने डाबर नेपालको स्थान श्री शिवशक्ति घिउ उद्योग प्रालिले ओगटेको छ ।

नेपाल पुनर्बिमा कम्पनी

नेपालमा बिमा व्यवसाय गर्ने कम्पनीमध्येमा वार्षिक रूपमा सबैभन्दा धेरै आयकर दाखिला गर्ने कम्पनीमा नेपाल पुनर्बिमा कम्पनी सम्मानित भएको छ । यो कम्पनीले २०७४, २०७५, २०७७ र २०७८ मा पनि यही शीर्षकमा सम्मान थापेको थियो ।

तारागाउँ रिजेन्सी

पर्यटन व्यवसायमा सबैभन्दा बढी आयकर तिर्ने कम्पनीको अग्रणी स्थानमा तारागाउँ रिजेन्सी रहँदै आएकोमा यो वर्ष उक्त स्थान मनकामना दर्शन प्रालिले ओगटेको छ । अघिल्लो आवमा धेरै कर तिरेको भन्दै मनकामना दर्शन बुधबार सम्मानित भएको हो । यसअघि ४ वर्ष (२०७५, २०७६, २०७७ र २०७८) पर्यटन क्षेत्रमा धेरै आयकर दाखिला गरेको भन्दै विभागले तारागाउँ रिजेन्सीलाई सम्मान गरेको थियो ।

छिमेक लघुवित्त

लघुवित्त वित्तीय संस्थाहरूमध्ये सबैभन्दा बढी कर तिरेको भन्दै यो वर्ष विभागले छिमेक लघुवित्त वित्तीय संस्थालाई सम्मान गरेको छ । यो कम्पनी यसअघि पनि ६ पटकसम्म (२०७१, २०७३, २०७५, २०७६ र २०७७) सबैभन्दा बढी कर दाखिला गर्ने कम्पनीका रूपमा सम्मानित भइसकेको छ ।

प्रकाशित : मंसिर ८, २०७९ ०७:३९
पूरा पढ्नुहोस्
प्रतिक्रिया
पठाउनुहोस्
×