बैंकहरूको कमसल र खराब कर्जा बढ्यो

२०७८ असोज मसान्तसम्म कुल कर्जामा बैंकहरुको औसत निष्क्रिय कर्जा १.१४ प्रतिशत रहेकोमा २०७९ असोज मसान्तसम्म १.७६ प्रतिशत पुगेको छ । असोज मसान्तसम्म वाणिज्य बैंकहरुले कुल ४२ खर्ब २० अर्ब रुपैयाँ कर्जा प्रवाह गरेका छन् । सो रकमको औसतमा १.७६ प्रतिशत कर्जा निष्क्रिय देखिएको हो ।

निष्क्रिय कर्जालाई पनि अवधिअनुसार तीन किसिमले वर्गीकरण गरिएको छ । जसअन्तर्गत कमसल, शंकास्पद र खराब कर्जा पर्दछन् । भाखा नाघेको ३ महिनादेखि ६ महिनासम्म नतिरेको साँवा तथा ब्याजलाई कमसल, ६ महिनादेखि १ वर्ष पुगेमा शंकास्पद र १ वर्ष नाघेमा खराब कर्जा भन्ने गरिएको छ ।

निष्क्रिय कर्जामा बैंक तथा वित्तीय संस्थाहरुले भाखा नाघेको अवधिअनुसार नोक्सानी व्यवस्थापन गर्नुपर्ने हुन्छ । यदि भाखा नाघेको १ वर्ष पूरा भएमा अर्थात् खराब कर्जा भइसकेको अवस्थामा कर्जाको शत प्रतिशत नोक्सानी व्यवस्थापन गर्नुपर्ने व्यवस्था छ । दुई बैंक राष्ट्रिय वाणिज्य र इन्भेस्टमेन्टबाहेक सबैको निष्क्रिय कर्जा समीक्षा अवधिमा बढेको छ । यसले समयमै बैंकलाई तिर्नुपर्ने साँवा तथा ब्याज रकम नतिर्नेहरु बढेको पनि जनाउँछ ।

कुल कर्जामा कुन बैंकको निष्क्रिय कर्जा कति ?