रामेछाप–लुक्ला उडान सुरु- अर्थ / वाणिज्य - कान्तिपुर समाचार
कान्तिपुर वेबसाईट
AdvertisementAdvertisement

रामेछाप–लुक्ला उडान सुरु

टीकाप्रसाद भट्ट

रामेछाप — निजी क्षेत्रका तीन वटा हवाई कम्पनीले रामेछापबाट सोलुखुम्बुको लुक्ला विमानस्थलका लागि शनिबारदेखि उडान सुरु गरेका छन् । नेपाल नागरिक उड्डयन प्राधिकरणले ती कम्पनीलाई काठमाडौंबाट उडान कटौती गरी रामेछापबाट लुक्कातर्फको उडान गर्न निर्देशन दिएको थियो ।

प्राधिकरणको निर्देशनअनुसार शनिबारदेखि वायुसेवा कम्पनीले रामेछाप–लुक्ला उडान थालेका हुन् । निजी क्षेत्रको तारा, सीता र समिट एयरले रामेछाप–लुक्लाका लागि उडान गर्न शुक्रबार नै केही जहाज रामेछाप विमानस्थलमा रात्रिकालीन पार्किङ गरेका थिए । लुक्लाका लागि उडान हुने सिजन भर अब रामेछाप भएरै उडान गर्ने तालिका ती कम्पनीको छ । त्यसका लागि जहाज र उडानसँग सम्बन्धित सबै कर्मचारीहरूलाई रामेछापमा नै राख्ने व्यवस्था वायुसेवा कम्पनीले मिलाएका छन् ।

रामेछाप विमानस्थल, नागरिक उड्डयन कार्यालयका एटिसी केदार सत्यालका अनुसार शनिबार तारा र समिटका २/२ र सीताको १ गरी ५ वटा जहाजले लुक्लाका लागि यात्रु ओसारेका थिए । काठमाडौंबाट सडक मार्ग हुँदै रामेछाप पुग्ने यात्रुलाई जहाजमा लुक्ला तर्फ लैजाने र त्यस तर्फबाट रामेछाप ओर्लिने यात्रुलाई सडक मार्गबाट काठमाडौं पठाउने गरी प्रबन्ध मिलाइएको छ ।

काठमाडौंबाट बीपी राजमार्ग हुँदै १ सय ३० किलोमिटर दूरीमा रामेछाप विमानस्थल छ । उक्त सडक यात्रा गर्न करिब ४ घण्टा समय लाग्छ । सडक मार्गबाट पुग्ने पर्यटकहरूलाई सोही दिन नै सकभर लुक्लातर्फ पठाउने गरिएको छ ।

त्रिभुवन अन्तर्राष्ट्रिय विमानस्थल काठमाडौंमा उडान र अवतरणका लागि होल्डमा बस्नुपर्ने भएकाले विकल्पको रुपमा रामेछाप विमानस्थललाई प्रयोगमा ल्याइएको हो । काठमाडौंभन्दा रामेछापबाट जहाज उडान गर्दा पर्यटकलाई भनेको समयमा गन्तव्यमा पुर्‍याउन सकिने नेपाल नागरिक उड्डयन प्राधिकरणले जनाएको छ । रामेछापमा उडान र अवतरणका लागि जहाज होल्डमा बस्नु पर्दैन ।

प्रकाशित : आश्विन १५, २०७९ १३:४६
प्रतिक्रिया
पठाउनुहोस्

व्यवस्था नै खतरामा छ : महासचिव गुरुङ  

प्रतीक्षा काफ्ले

कास्की — नेकपा (माओवादी केन्द्र)का महासचिव देवप्रसाद गुरुङले लोकतान्त्रिक गणतन्त्रात्मक व्यवस्था खतरामा रहेको बताएका छन् । उनले राष्ट्रियतामाथि नै आक्रमण हुन थालेको दाबी गर्दै प्रणालीमा चित्त नबुझे बहस गर्नुपर्ने तर अराजकता र अस्थिरता निम्त्याउने काम गर्न नहुने बताए । उनले व्यवस्था र संविधान जोगाउन वामलोकतान्त्रिक गठबन्धन आवश्यक रहेको बताए ।

माओवादी केन्द्र पोखरा महानगर कमिटीले शनिबार आयोजना गरेको कार्यक्रममा महासचिव गुरुङले यतिबेला मुलुक नै संकटमा परेको बताएका हुन् । नजिकिँदै गरेको निर्वाचनमा केन्द्रित रहदै उनले अहिले टिकट लिने क्रममा आ–आफ्नो पार्टीभित्र संघर्ष भए पनि टिकट पाएपछि वामलोकतान्त्रिक गठबन्धन नै एकताबद्ध भएर अगाडि बढ्ने बताए । ‘हाम्रो पाँच दलीय गठबन्धन अहिलेको व्यवस्था र संविधान रक्षाको लागि हो,’ उनले भने, ‘प्रतिगमनहरूको गठबन्धन संघीयता र कानुनका विरोधीहरूको हो ।’

निर्वाचनलाई आन्दोलनका रूपमा लिनुपर्ने पनि गुरुङको भनाइ थियो । नेपालको इतिहास, विकासको गति र भविष्यमा समाजवादको गति लिन निर्वाचन आवश्यक रहेको बताए । आगामी निर्वाचनमा प्राप्त मतले संघीयताको पक्ष र विपक्षमा को-को छन् भन्ने पनि प्रष्ट पार्ने उनको भनाई थियो । एमालेतिर लक्षित गर्दै उनले दुई पटक संसद् विघटन गर्नु, ९ महिना संसद् अवरोध गर्नु पनि गलत चिन्तन रहेको बताए ।

महासचिव गुरुङले नागरिकता विधेयक राष्ट्रपतिबाट प्रमाणीकरण नहुनुले पनि व्यवस्थामाथि खतराको संकेत गरेको बताए । ‘सबै कुरा राष्ट्रपतिले रोक्दै जाने हो भने व्यवस्था सफल कसरी हुन्छ ?,’ उनले प्रश्न गरे, ‘यसरी सरकारले चाहेर पनि केही काम गर्न सक्दैन । अब निर्वाचन आउँदै छ । निर्वाचित शपथको लागि राष्ट्रपतिसमक्ष पुग्दा यो निर्वाचन प्रणली नै गलत छ, म शपथ खुवाउन सक्दिनँ भने के हुन्छ ?’

प्रकाशित : आश्विन १५, २०७९ १३:२३
पूरा पढ्नुहोस्
प्रतिक्रिया
पठाउनुहोस्
×