कोभिडले थलिएको आरोहण क्षेत्र जुर्मुराउन थालेको छ : माया शेर्पा

हाल सगरमाथा, मनास्लु, चो यु, अमादबलम, मेरा पिकजस्ता पूर्वका साना–ठूला हिमालमा आरोहीको राम्रो चलहपलह हुने गरेको उनको भनाइ छ ।

‘वार्षिक सयौंको संख्यामा विदेशी अरोही बढिरहेका बेला कोभिडले एक वर्ष ठप्प पार्‍यो,’ सगरमाथा आरोही संघकी अध्यक्षसमेत रहेकी शेर्पाले भनिन्, ‘त्यसपछि हाम्रा स्थानीय आरोही र भरियाहरू साहसपूर्वक काममा फर्किए भने बहराइनका राजकुमारजस्ता पर्यटक आएपछि आरोहण व्यवसायले गति लियो ।’

कान्तिपुर मिडिया ग्रुपले शनिबार विराटनगरमा आयोजना गरेको ‘उज्यालो पूर्व’ कार्यक्रमको चौथो सत्र ‘पूर्वको पौरख’ मा उनले पर्वातारोहणका कारण हिमाली क्षेत्रका बासिन्दाको जीवनस्तर माथि उठिरहेको बताएकी छन् । ‘नेपाली आरोही, भरिया, स्थानीयबासीले रोजगारी पाउने गरेका छन्,’ उनले भनिन्, ‘साना–साना पसलदेखि होटलहरूले ग्राहक पाउँछन् । यसले गर्दा सगरमाथालगायत हिमाली क्षेत्रका बासिन्दाको जीवनस्तर उकास्सिरहेको छ ।’