भारतीय केराको आयात नरोकिए आन्दोलन थाल्ने किसानको चेतावनी

साउन सकिए लगत्तै धमाधम भारतीय केरा आउन सुरु भएका कारण नेपाली किसानहरु मर्कामा परेको संघका महासचिव जनकराज पन्तले बताए । साउनसम्म भारतीय केराको आयात कम भएका कारण नेपाली केराको खपत राम्रै रहेको पन्तले बताए । केरा आयात गर्न पनि एलसी अनिवार्य गरेपछि अग्रिम पैसा जम्मा गर्नु पर्ने भएका कारण आयात कम भएको थियो ।

तर एलसी खोले नखोलेको बारेमा नियमनमा कडाइ नभएकाले पनि भारतीय केराको आयात बढेको पन्तले सुनाए । यसको असर नेपाली केराको मूल्यमा परेको छ । नेपाल केरा उत्पादक महासंघका अध्यक्ष विष्णुहरि पन्तका अनुसार जेठमा मालभोग केरा दर्जनको ९० रुपैयाँ र हरियो केरा ‘जी नाइन’ दर्जनको ६० रुपैयाँमा बारीबाटै बिक्री भएको थियो । अहिले हरियो केरा दर्जनको ३० रुपैयाँमा झरेको पन्तले जानकारी दिए ।

‘आउँदो दुई महिनासम्म मुख्य सिजन हो । यो सिजनलाई देशभर तीन लाख ५० हजार मेट्रिक टन केरा आवश्यक पर्दछ । त्यति केरा हामी उत्पादन गर्न सक्दछौं । त्यसैले केरा आयात गर्नु पर्ने अवस्था छैन’ महासंघका केन्द्रीय अध्यक्ष विष्णुहरि पन्तले भने । अहिले भारतबाट काठमाडौंमा मात्रै दैनिक ८ देखि १० गाडी केरा आउन थालेको उनले बताए । जसले गर्दा व्यवसायीले स्वदेशी केरा खरिद घटाएका छन् ।

‘नेपाली किसानले सरकारको कुनै सहयोगविना उत्पादन गरेका छन् । मलका लागि सास्ती छ । जग्गा भाडामा पाउन उत्तिकै समस्या छ’ पन्तले भने ‘गुणस्तरमा धेरै फरक छैन । सस्तो हुने भएका कारण व्यापारीले भारतीय केरा मगाउँछन् ।’ मुख्य सिजनमा नेपाली केरा बिक्री नहुने र मूल्य नपाउने भए धेरै किसानको उठिबास लाग्ने पन्तले बताए । ‘किसानहरुलाई पलायन हुनबाट रोक्न भारतीय केरा नियन्त्रण गर्न आवश्यक रहेको उनले बताए । ‘२९ गतेपछि पनि भारतीय केराको आयात भइरहे हामी चरणवद्ध आन्दोलनमा जान्छौं’ चितवन केरा उत्पादक संघका अध्यक्ष माधवप्रसाद घिमिरेले चेतावनी दिए ।