भाखा नाघेको सेयर कर्जा नविकरण गरे शतप्रतिशत नोक्सानी व्यवस्था- अर्थ / वाणिज्य - कान्तिपुर समाचार
कान्तिपुर वेबसाईट
AdvertisementAdvertisement

भाखा नाघेको सेयर कर्जा नविकरण गरे शतप्रतिशत नोक्सानी व्यवस्था

कान्तिपुर संवाददाता

काठमाडौँ — मौद्रिक नीतिमार्फत सेयर धितो (मार्जिन प्रकृति) कर्जामा ४ करोड सीमा हटाएर १२ करोड मात्र कायम गरेको राष्ट्र बैंकले त्यस्तो कर्जा नविकरणमा भने कडाइ गरेको छ ।

बैंक तथा वित्तीय संस्थाले कर्जा प्रवाह वा नवीकरण गर्दा उक्त ऋण भुक्तानी सीमा ननाघेको यकिन गरेर मात्र कर्जा प्रवाह/नवीकरण गर्नु पर्ने निर्देशन राष्ट्र बैंकले जारी गरेको छ । यसरी तोकिएको सीमा नाघी कर्जा प्रवाह वा नवीकरण गरेमा बैंक तथा वित्तीय संस्थाले उक्त कर्जामा शतप्रतिशत कर्जा नोक्सानी व्यवस्था कायम गर्नु पर्ने व्यवस्था पनि राष्ट्र बैंकले गरेको छ । यसअघि यस्तो व्यवस्था थिएन ।

यस्तै, निकै चर्चामा रहेको सेयर धितो कर्जामा ४/१२ करोड रुपैयाँको सीमामा राष्ट्र बैंकले ४ करोड हटाएर १२ करोड रुपैयाँ मात्र कायम गरेको छ । नयाँ व्यवस्थाअनुसार अब सेयर किन्न व्यक्तिले एउटै संस्था वा सबै बैंक तथा वित्तीय संस्थाबाट बढीमा १२ करोड रुपैयाँसम्म कर्जा लिन पाउँछन् । यसअघि एउटा संस्थाबाट बढीमा ४ करोड र सबै बैंक तथा वित्तीय संस्थाबाट १२ करोड रुपैयाँसम्म मात्र कर्जा लिनु पाइने व्यवस्था थियो ।

‘यस्तो कर्जा प्रवाह गर्ने बैंक तथा वित्तीय संस्थाले कर्जा प्रवाह वा नवीकरण गर्दा उक्त सीमा ननाघेको यकिन गरेर मात्र कर्जा प्रवाह/नवीकरण गर्नुपर्नेछ,’ निर्देशनमा भनिएको छ, ‘तोकिएको सीमा नाघी कर्जा प्रवाह वा नवीकरण गरे बैंक तथा वित्तीय संस्थाले उक्त कर्जामा शतप्रतिशत कर्जा नोक्सानी व्यवस्था कायम गर्नुपर्नेछ ।’ २५ लाखसम्मको सेयर कर्जामा जोखिम भार १ सय प्रतिशत कायम गरिएको छ । त्योभन्दा ठूलो रकमको कर्जामा भने १५० प्रतिशत जोखिम भार छ ।

प्रकाशित : श्रावण २१, २०७९ १४:५४
प्रतिक्रिया
पठाउनुहोस्

प्रकाशमान सिंह भन्छन् : ‘फर्स्ट म्यान भएँ भने स्वार्थ नभएको नेता कस्तो हुन्छ देखाउँछु’

कान्तिपुर संवाददाता

काठमाडौँ — नेपाली कांग्रेसका नेता प्रकाशमान सिंहले पुनः काठमाडौं क्षेत्र नं. १ बाटै चुनाव लड्ने संकेत गरेका छन् । ०७४ को प्रतिनिधिसभा सदस्य निर्वाचनमा काठमाडौं क्षेत्र नं. १ बाट निर्वाचित भएर प्रतिनिधिसभा सदस्य बनेका नेता सिंहले आगामी निर्वाचनमा पनि त्यही क्षेत्रबाट चुनाव लड्ने संकेत गरेका छन् ।

‘म यो क्षेत्रको जनप्रतिनिधि हुँ, मैले आफ्नो काम गरेको छु । यसको लेखाजोखा अब यहाँको समुदाय र जनताले गर्ने बेला आएको छ । मैले जनप्रतिनिधिका रूपमा इमान्दारिताका साथ आफ्नो भूमिका निभाएको छु,’ शनिबार थापाथलीमा भएको कार्यक्रममा बोल्दै नेता सिंहले भने, ‘मैले जनप्रतिनिधिका रूपमा गर्नुपर्ने काम गरेको छु । तर, अनावश्यक प्रचार गरेर हिँडेको छैन । हुन त अहिले हाम्रो चुनावी परिणामहरू हेर्दा ‘बोल्नेको पिठो बिक्छ, नबोल्नेको चामल पनि बिक्दैन’ भन्ने उखान सावित भएजस्तो लाग्छ ।’काठमाडौं क्षेत्र नं. १ मा नेता सिंहसँग अघिल्लो पटक तत्कालीन विवेकशील साझा पार्टीका अध्यक्ष रवीन्द्र मिश्र प्रत्याशी थिए भने अहिले पनि मिश्रले नै उम्मेदवारी घोषणा गरिसकेका छन् । त्यस्तै, अर्का युवा पुकार बमले पनि यहीँबाट स्वतन्त्र उम्मेदवारी दिने घोषणा गरेका छन् । नेता सिंहले मतदाताले दुःख गरेर, पार्टीको राजनीति गरेर आएका मान्छेलाई भन्दा नयाँ मान्छेले थोरै आश्वासन दिँदैमा विश्वास गर्न थालेको गुनासो गरे । ‘पुरानो मान्छेहरू होइन, नयाँ मान्छेले यो गर्छु, त्यो गर्छु मात्रै भने पनि माथि पुर्‍याइदिएको छ । अहिलेको डिजिटल वर्ल्डले तल भएकालाई माथि-माथि भएलाई तल झार्ने रहेछ,’ उनले भने, ‘त्यसैले हामी पनि आफूले गरेको काम भन्नुपर्छ भनेर लागेका छौँ । डिजिटल प्रविधिको सदुपयोग हुनुपर्छ भन्ने लाग्छ ।’ उनले आफूले जनप्रतिनिधिका रूपमा क्षेत्र नं. १ मा सामुदायिक विद्यालयका संरचनादेखि दुःख पर्दा बस्ने किरियापुत्री भवनसम्ममा काम गरेको बताए । नेता सिंहले आफू लामो समयदेखि पार्टी र सरकारमा समेत कहिल्यै 'फर्स्ट म्यान' नभएको भन्दै मौका दिन आग्रह गरे । ‘म ग्रासरुटदेखि नम्बर टु भएर काम गरेको मान्छे हुँ । अहिलेसम्म नम्बर वान भएर काम गर्न पाएको छैन । मलाई कुनै कुराको लोभलालच छैन,’ उनले अघि भने, ‘म यदि नम्बर वान म्यान भए भने लोभलालच नभएको, कुनै स्वार्थ नभएको नेता ठाउँमा पुग्यो भने गर्न सक्छ भनेर पुष्टि गर्छु, म काम गरेर देखाउँछु ।’

प्रकाशित : श्रावण २१, २०७९ १४:३०
पूरा पढ्नुहोस्
प्रतिक्रिया
पठाउनुहोस्
x
×