एक वर्षमै नेपाली मुद्रा ९ रुपैयाँ कमजाेर 

असार मसान्त (३२ गते) एक अमेरिकी डलरको विनिमय दर १२८.११ पैसा थियो । ठीक एक वर्षअघि ०७८ असार मसान्तरमा यस्तो दर ११९.०४ रुपैयाँ थियो । २०७८ असार यता हरेक महिनाजसो डलरको भाउ बढिरहेको छ । भारतीय मुद्रा (भारु) सँगै नेपाली मुद्राको भाउ घटिरहेको हो । अमेरिकी डलरको तुलनामा भारतीय मुद्राको विनिमय दर पनि इतिहासमै सबैभन्दा कमजोर बनेको छ । त्यसको असर नेपाली मुद्रामा पनि परेको हो । बुधबार दिउँसो एक बजेसम्म एक अमेरिकी डलरको विनिमय दर भारु ७९.९६ रहेको छ । यो पनि हालसम्मकै उच्च हो ।

डलरको भाउ बढिरहेकाले आयात महँगो हुँदै गएको र त्यसको असरले नेपाली बजारमा मूल्यवृद्धि बढाएको राष्ट्र बैंकको मासिक प्रतिवेदनमा उल्लेख छ । पछिल्ला केही महिनायता विश्व बजारमा अमेरिकी डलरको माग बढ्दा त्यसको असर भारतीय मुद्रा (भारु) हुँदै नेपाली मुद्रासम्म आइपुगेको हो । अमेरिकामा मूल्यवृद्धि पछिल्लो ४ दशक यताकै उच्च विन्दुमा छ भने ब्याजदर पनि बढिरहेको छ । यही समयमा विश्व बजारमा डलरको माग बढिरहेको ‘डलर इन्डेक्स’मा भएको सुधारले पुष्टि गर्छ ।