मौद्रिक नीतिमा बैंकर्सको सुझाव : उत्पादनमूलक कर्जामा जोखिमभार घटाइयोस्  - अर्थ / वाणिज्य - कान्तिपुर समाचार
कान्तिपुर वेबसाईट
AdvertisementAdvertisement

मौद्रिक नीतिमा बैंकर्सको सुझाव : उत्पादनमूलक कर्जामा जोखिमभार घटाइयोस्  

कान्तिपुर संवाददाता

काठमाडौँ — बैंकरहरुले उत्पादनशील क्षेत्रमा बढी कर्जा लगानी हुनेगरी प्रोत्साहनमूलक नीति ल्याउन राष्ट्र बैंकलाई सुझाव दिएका छन् । आगामी मौद्रिक नीतिको सुझाव संकलनका लागि काठमाडौंमा सोमबार आयोजित अन्तर्क्रिया कार्यक्रममा बैंकरहरुले उत्पादन र अनुत्पादक क्षेत्रमा कर्जाको जोखिमभार फरक बनाउनुपर्ने सुझाव दिए । 

प्रतिकात्मक तस्बिर

नेपाल बैकर्स संघका अध्यक्ष तथा कृषि विकास बैंकका प्रमुख कार्यकारी अधिकृत अनिल उपध्यायले कृषि क्षेत्रमा लगानी बढाएर उत्पादनलाई वृद्धि गर्न सकेमात्रै अर्थतन्त्रमा सुधार आउने बताए । अध्यक्ष उपध्यायले उत्पादन र अनुत्पादन क्षेत्र छुट्याएर उत्पादनमूलकमा जाने कर्जामा जोखिम भार कम गरेमा बैंकहरुलाई प्रोत्साहन हुने बताए । बैंकहरुमा लागू भएको बेस रेट व्यवहारिक नभएको भन्दै मौद्रिक नीतिमार्फत सुधार गर्न उनले सुझाव दिए । रेमिट्यान्सलाई बैंकिङ च्यानलबाट ल्याउन पनि मौद्रिक नीतिले जोड गर्नुपर्ने उनको भनाइ छ । उपाध्यायले भने ‘उत्पादन क्षेत्रमा जति मार्जिन दियो त्यति लगानी बढ्छ । उत्पादन क्षेत्रमा जोखिम भार फरक गर्नुपर्छ ।’

विकास बैंक एसोसिएसनका अध्यक्ष तथा मुक्तिनाथ विकास बैंकका प्रमुख कार्यकारी अधिकृत प्रद्युमन पोखरेलले पनि उत्पादनमुखी उद्योग र कृषि उत्पादन तथा प्रशोधन उद्योगमा दिने कर्जाको जोखिम भार मौद्रिक नीतिमार्फत घटाउनुपर्ने बताए । उनले त्यस्तो कर्जामा जोखिम भार घटाउँदा सजिलै उद्योगले कर्जा पाएर आन्तरिक उत्पादन बढ्ने बताए । अध्यक्ष पोखरेलले अहिले बैंकहरुबाट उत्पादन क्षेत्रमा निर्देशित मात्रै कर्जा लगानी भएको भन्दै राष्ट्र बैंकले तोकिएको प्रतिशत भन्दा बढी उत्पादन क्षेत्रमा लगानी गर्ने बैंकलाई प्रोत्साहन गर्नुपर्ने बताए । मौद्रिक नीतिमार्फत विकास बैंकहरुले पनि सरकारी कारोबार गर्न पाउनुपर्ने व्यवस्था गर्न उनले सुझाव दिए । अध्यक्ष पोखरेलले भने ‘आजको आवश्यकता आन्तरिक उत्पादन बढाउनु पर्छ । त्यसको लागि उत्पादनमुखी उद्योग, कृषि उत्पादन तथा प्रशोधन उद्योगमा दिइरहेको कर्जामा लगाइको जोखिम भार रिभ्यु गरेर कम गर्न सक्याैं भने सजिलोसँग कर्जा बढ्न सक्छ ।'

बैंक तथा वित्तीय संस्था परिसंघका अध्यक्ष पवन गोल्यानले पछिल्लो समय केही बैंकहरुले उत्पादन क्षेत्रभन्दा बाहिर बढी लगानी गर्दा समस्या आएको बताए । उनले उत्पादन क्षेत्रमा जाने ऋणको ब्याजदर अनुत्पादकभन्दा ४ प्रतिशत कम हुनुपर्ने बताए । अध्यक्ष गोल्यानले विदेशबाट आउने रेमिट्यान्समा मौद्रिक नीतिमार्फत थप दुई प्रतिशत ब्याजको व्यवस्था गर्नुपर्ने बताए । ‘रेमिट्यान्समा अहिले बैंकहरुले थप एक प्रतिशत ब्याज दिइरहेको छ । अब यसलाई थप दुई प्रतिशत ब्याज दिने व्यवस्था गर्नुपर्‍यो’ उनले भने ‘अब बैंकहरुले लगानी गर्दा उत्पादन क्षेत्रमा लगानी गर्नुपर्‍यो । त्यसको लागि डुअल ब्याजदर नीति ल्याउनुपर्छ । कम्तीमा ४ प्रतिशतको फरक हुनुपर्छ ।’ केही स्रोत नखोज्ने गरी एनआरएनहरुले विदेशी मुद्रा ल्याउने भएमा खुकुलो बनाउनुपर्नेमा उनले जोड दिए । बैंकहरुमा १० लाखभन्दा बढी जम्मा गर्दा स्रोत खोजिने अवस्था रहेकोमा त्यसको सीमा बढाएर २५ लाख पुऱ्याउनुपर्ने बताए ।

प्रकाशित : असार २१, २०७९ १७:३४
प्रतिक्रिया
पठाउनुहोस्

नेपाल र क्यानडा भिड्दै

कान्तिपुर संवाददाता

काठमाडौँ — आईसीसी विश्वकप क्रिकेट लिग–२ अन्तर्गत स्कटल्याण्ड र नामिबियासँग हुने त्रिकोणात्मक श्रृंखलाको तयारीका लागि क्यानडा पुगेको नेपाली राष्ट्रिय क्रिकेट टिमले मंगलबार घरेलु टिमविरुद्ध क्यानडासँग पहिलो एकदिवसीय खेल खेल्दैछ ।

क्यानडाको किङ सिटी मेपल लीफ क्रिकेट मैदानमा हुने खेल नेपाली समय अनुसार राति ८:४५ बजेदेखि सुरु हुनेछ । नेपालले क्यानडामा दुई खेल खेल्ने तालिका रहेको छ । त्यसअघि नेपालले पूर्व नेपाली क्रिकेटर नरेश बुढाऐरको कप्तानीमा स्थानीय ओन्टारियोसँग एक एकदिवसीय र एक ट्वान्टी–२० क्रिकेट खेलेको थियो ।

जसमा नेपालले एक दिवसीय खेलमा ६९ र ट्वान्टी–२० खेलमा ५५ रनको जित निकालेको थियो । चिरपरिचित प्रतिद्वन्द्वी क्यानडासँग यसअघि नेपालले तीन पटक खेलिसेकेको छ ।

तीन भेटमा नेपाल दुई खेलमा विजयी हुँदा क्यानडाले एक पटक जित हासिल गरेको छ । नेपाल र क्यानडा पहिलोपटक २०१४ मा खेलेका थिए । २०१५ को आईसीसी एक दिवसीय विश्वकप छनोट खेलमा नेपाल १२ रनले पराजित भएको थियो । आईसीसी लिग डिभिजन–२ मा नेपाल र क्यानडाको दोस्रो खेल भएको थियो । २०१५ मा नामिबियामा भएको उक्त खेलमा नेपालले ७ विकेटको सुखद् नतिजा निकालेको थियो ।

यस्तै क्यानडाविरुद्धको तेस्रो तथा अन्तिम खेल २०१८ मा भएको थियो । आईसीसी डिभिजन–२ को खेलमा नेपाल १ रनले विजयी भएको थियो । ५१ रन जित्नका लागि आवश्यक रहँदा नेपालसँग १ विकेट मात्र बाँकी रहेको अवस्थामा करण केसी र सन्दीप लामिछानेले रोमान्चक जित दिलाएका थिए । यस खेलमा करण केसीले ५ विकेटका साथ विजयी ४२ रन बनाएका थिए ।

घरेलु टोली क्यानडासँगको दुई खेलको श्रृंखलापछि नेपाल क्यानडाबाटै विश्वकप त्रिकेट लिग–२ खेल्न स्कटल्याण्ड जाने तालिका रहेको छ । नेपालले स्कटल्याण्ड र नामिबियासँग समान दुई खेल खेल्नेछ । स्कटल्याण्ड भ्रमणमा नेपाल जितसहित विश्वकप त्रिकेट लिग–२ अंकतालिकामा स्थान सुधार गर्ने लक्ष्यमा रहेको छ ।

प्रकाशित : असार २१, २०७९ १७:३१
पूरा पढ्नुहोस्
प्रतिक्रिया
पठाउनुहोस्
×