काठमाडौँ — त्रिभुवन आर्मी क्लबले छैटौं आरबीबी/एनभीए राष्ट्रिय महिला तथा पुरुष भलिबल क्लब लिगको उपाधि जितेको छ । आर्मी पुरुष/महिला दुवैमा च्याम्पियन बनेको हो । आर्मी १८ अंकसाथ च्याम्पियन भयो । दोस्रो भएको टिपटप हेल्प नेपाल स्पोर्ट्स क्लबले १४ अंक जोडेको थियो । नेपाल पुलिस क्लब ११ अंकसहित तेस्रो भयो ।

त्रिपुरेश्वरस्थित राष्ट्रिय खेलकुद परिषद्को कभर्डहलमा शनिबार पुरुषमा तीन खेल भए । आर्मीले निकट प्रतिद्वन्द्वी हेल्प नेपाललाई २५–१३, २५–१८, २६–२८, २८–२६ ले हराएर उपाधि जितेको हो । त्यसअघि गण्डकीले गल्कोट स्पोर्ट्स क्लबलाई २५–२३, २३–२५, २५–२०, २५–१५ ले र पुलिसले एपीएफलाई २५–२१, २५–२३, १९–२५, २०–२५, १८–१६ को सेटमा हराएका थिए ।

महिलातर्फ आर्मीले नेपाल पुलिस क्लबलाई २५–१८, २५–२३, २५–२० ले हराएर उपाधि जित्यो । पुलिस दोस्रो र एपीएफ तेस्रो भएका थिए । पुरुष/महिला दुवैमा शीर्ष तीन स्थान हात पार्नेले क्रमश: ६ लाख, ३ लाख र १ लाख ५० हजार रुपैयाँ पुरस्कार पाए ।

पुरुषमा आर्मीका धनबहादुर भट्ट उत्कृष्ट खेलाडी भए । स्पाइकरमा पुलिसका रविन चन्द, सेटरमा आर्मीका हरिहजुर थापा, लिबेरोमा पुलिसका भीमबहादुर गाहा, ब्लकरमा आर्मीका दुर्गा खड्का, सर्भरमा आर्मीका राजेन्द्र विष्ट र प्रशिक्षकमा आर्मीका जगतबहादुर सिंह उत्कृष्ट भए । एपीएफका धीरज बस्नेत उदीयमान खेलाडी चुनिए ।

महिलातर्फ आर्मीकी संगम महतो उत्कृष्ट खेलाडी भइन् । स्पाइकरमा एपीएफकी निरुता ठगुन्ना, सर्भरमा आर्मीकी शान्ति चौधरी, लिबेरोमा न्यु डायमन्डकी सलिना श्रेष्ठ, सेटरमा एभरेस्टकी अरुणा शाही, ब्लकरमा आर्मीकी सुनीता खड्का र प्रशिक्षकमा आर्मीका लोकेश बुढा उत्कृष्ट चुनिए । न्यु डायमन्डकी प्रगति नाथ उदीयमान खेलाडी भइन् । सर्वोत्कृष्ट खेलाडीले समान ३५ हजार तथा उदीयमानले समान १० हजार तथा विधागत उत्कृष्टले जनही १५ हजार पुरस्कार जिते ।