रुसबाट सस्तोमा तेल किन्न भारतको प्रस्ताव  

विश्वको तेस्रो ठूलो तेल आयातकर्ता भारतले सरकार र निजी रिफाइनरीहरूमार्फत फेब्रुअरीको अन्त्यदेखि हालसम्म ४ करोड ब्यारेल भन्दा बढी रूसी कच्चा तेल किनिसकेको छ । सरकारी तथ्यांकलाई उदृत गर्दै ब्लुमबर्गले जनाएअनुसार भारतले रुसबाट किनेको याे तेल सन् २०२१ मा किनेको सम्पूर्णको तुलनामा २० प्रतिशत बढी हो ।

भारतमा रूसी तेलको आयात सहज भने छैन । समुन्द्री बीमा, अन्तर्राष्ट्रिय प्रतिबन्धका कारण भारतलाई रुसबाट तेल खरिद गर्नका लागि चुनौती छ । अमेरिकाले नै प्रत्यक्ष रुपमा भारतलाई रुसबाट तेल नकिन्न दवाव दिँदै आएको छ । तर भारतीय प्रधानमन्त्री नरेन्द्र मोदीले भारी छुटमा तेल पाउने अवसर भएकाले मस्कोसँगको वार्तालाई कायम गर्न चाहेका छन् । रुसबाट हतियारको आयात गर्नमा पनि भारत धेरै हदसम्म निर्भर छ । यदि रुसले भारतले भनेजस्तो मूल्यमा तेल दिन स्वीकार गरेमा भारतका सरकारी रिफाइनरहरूले प्रति महिना लगभग १ करोड ५० लाख ब्यारेल तेल लिन सक्ने दाबी गरिएको छ ।