'सूचना प्रविधिको पहुँच बढाउन मेहनत गर्नुपर्नेछ'
काठमाडौँ — देशका सबै भूभागमा सूचना प्रविधिको गुणस्तरीय पहुँच पुर्याउन अझै मेहनत गर्नुपर्ने आवश्यकता रहेकाे सञ्चार तथा सूचना प्रविधिमन्त्री ज्ञानेन्द्रबहादुर कार्कीले बताएका छन् । सूचना प्रविधि क्षेत्र सरकारको प्राथमिकतामा रहेको उनले बताए ।‘सूचना प्रविधिको पूर्वाधार विकास, सेवाको गुणस्तर, सुलभ सेवाको उपलब्धता र डिजिटल साक्षरतालाई सरकारले प्राथमिकतामा राखेको छ,’ मन्त्री कार्कीले भने, ‘यस क्षेत्रलाई रोजगारीको माध्यम बनाउने र विदेशी मुद्रा आर्जनको स्रोतका रूपमा विकास गर्न सरकार लागिपरेको छ ।’
बुधबार राष्ट्रिय सभा गृहमा क्यान इन्फोटेक २०२२ को उद्घाटनका क्रममा मन्त्री कार्कीले सूचना र प्रविधिलाई दूरदराजसम्म पुर्याउन र सबै क्षेत्रमा सूचना प्रविधिको प्रयोग बढाउन सरकारले डिजिटल नेपालको अवधारणा अगाडि सारेको बताए । उक्त अवधारणा अनुरुप नै कतिपय सरकारी निकायले योजनाहरू अघि बढाइरहेको उनको भनाइ छ ।
सरकारले सूचना प्रविधिसम्बन्धी नीतिगत सुधारका कामलाई पनि अगाडि बढाइरहेको उनले बताए । कार्यक्रममा मन्त्री कार्कीले क्यान महोत्सवमा स्टार्ट–अप र इन्नोभेसनलाई विशेष स्थान दिएकोमा प्रशंसा गरे । १२ वैशाखसम्म चल्ने प्रदर्शनीमा कुल १२७ स्टल छन् । तिनमा ब्रान्डिङ, फिन्टेक, स्टार्टअप र इन्नोभेसन, आईसीटी एक्सेसरिज तथा प्रोडक्ट लञ्चिङ र ई–गभर्नेन्स मुख्य खण्ड रहेको क्यानका महासचिव नारायण थापाले जानकारी दिए ।
प्रकाशित : वैशाख ७, २०७९ १३:५६
