श्रीलंकामा केन्द्रीय बैंकका गभर्नर काब्रालले दिए राजीनामा- अर्थ / वाणिज्य - कान्तिपुर समाचार
कान्तिपुर वेबसाईट
AdvertisementAdvertisement

श्रीलंकामा केन्द्रीय बैंकका गभर्नर काब्रालले दिए राजीनामा

एजेन्सी

काठमाडौँ — श्रीलंकामा केन्द्रीय बैंकका गभर्नर अजिथ निवार्ड काब्रालले राजीनामा दिएका छन् । सोमबार त्यहाँका २६ जना मन्त्रीले राजीनामा दिएको एक घण्टापछि नै गभर्नर काब्रालले पनि राजीनामा दिएका हुन् । सबै मन्त्रीहरुले राजीनामा दिएपछि आफूले पनि उनीहरुलाई नै पछ्याएको काब्रालले ट्विट गरी बताएका छन् ।


चरम आर्थिक संकटसँगै खाद्यान्न, इन्धन तथा औषधि अभावका कारण सुरु भएको सरकारविरोधी प्रदर्शन चर्कंदै गएपछि सोमबार श्रीलंकामा सबै मन्त्रीले राजीनामा दिएको बताइएको छ । सबै मन्त्रीले राजीनामा दिए पनि प्रधानमन्त्री महिन्दा राजापाक्ष र राष्ट्रपति गोटाभाया राजापाक्ष भने पदमै कायम रहनेछन् । राष्ट्रपति गोटाभायाले रक्षा, प्रविधि मन्त्रालयको समेत जिम्मेवारी सम्हाल्दै आएका छन् भने प्रधानमन्त्री महिन्दाले धार्मिक तथा सांस्कृतिक, आर्थिक नीति तथा योजना कार्यान्वयन र सहरी विकास तथा भवन निर्माण मन्त्रालयको समेत जिम्मेवारी सम्हालेका छन् ।

श्रीलंकाले पछिल्लो समय स्वतन्त्रतायताकै सबैभन्दा ठूलो आर्थिक संकट सामना गरिरहेको छ । विदेशी मुद्राको अभावसँगै इन्धन आपूर्ति लगभग ठप्प भएको छ भने खाद्यान्न तथा औषधिको चरम अभाव देखिएको छ । दैनिक उपभोग्य वस्तुको भाउ आकासिएका कारण जनजीवन कष्टकर बन्दै गएको छ । त्यस्तै, पछिल्लो समय विद्युत् आपूर्तिमा समेत समस्या देखिएपछि जनतामा आक्रोश बढेको छ । कोरोनासँगै श्रीलंकाली अर्थतन्त्रको बलियो आधारका रूपमा रहेको पर्यटन उद्योग ठप्प छ । केही अर्थशास्त्रीले भने ठूलो मात्राको वैदेशिक ऋण र व्यवस्थापन कमजोरीका कारण अर्थतन्त्र धर्मराएको बताएका छन् । श्रीलंकाले सन् २०२० को मार्चमा विदेशी मुद्रा बचाउन भन्दै आयातमा प्रतिबन्ध लगाएको थियो, जसका कारण खाद्यान्न तथा औषधि अभाव भएको हो ।

पछिल्लो समय रुसले युक्रेनमाथि गरेको आक्रमणले श्रीलंकाको अर्थतन्त्र थप ब्रिगिएको हो । पर्यटन तथा उत्पादनमूलक क्षेत्र धराशायी भएपछि कतिपय परियोजना बनाउन लिएको ऋणको वार्षिक किस्ता तिर्न मुस्किल भएको छ । अर्थतन्त्र ओरालो लाग्दै गएपछि श्रीलंकाले अमेरिकी डलरसँग आफ्नो मुद्रालाई अवमूल्यन गर्‍यो । त्यही कारण आयातित वस्तुको भाउ निकै महँगिएपछि सरकारविरोधी प्रदर्शन सुरु भएका छन् ।

प्रकाशित : चैत्र २१, २०७८ १४:२१
प्रतिक्रिया
पठाउनुहोस्

चिनियाँ जहाज दुर्घटना : सबै यात्रुको मृत्यु भएको आशंका 

एजेन्सी

कुनमिङ — चीनमा १३२ जना सवार यात्रुवाहक विमान सोमबार दिउँसो दुर्घटनाग्रस्त भएको छ । चाइना इस्टर्न एयरलाइन्सको ७३७–८०० विमान दक्षिणी प्रान्त ग्वाङ्सीको पहाडमा दुर्घटनामा परेको चिनियाँ सञ्चारमाध्यमले जनाएका छन् । विमानमा १२३ जना यात्रु र चालकदलका ९ सदस्य रहेका चीनको नागरिक उड्डयन प्रशासनले जनाएको छ । 

चीनको दक्षिण पश्चिम प्रान्त युनानको राजधानी कुनमिङस्थित चाङसुई विमानस्थलबाट दिउँसो १ बजे ग्वाङझाओका लागि उडेको विमान दुर्घटनामा परेलगत्तै आगलागी भएको ग्लोबल टाइम्सले जनाएको छ ।

दुर्घटनाग्रस्त विमानबाट मानिसहरूको जीवितै उद्धार हुने सम्भावना कम रहेको ठानिएको छ । मंगलबार पनि खोजी कार्य जारी रहेको चिनियाँ सञ्चारमाध्यमले जनाएका छन् ।

उक्त जहाज अपराह्न ३ बजे ग्वाङझाओमा अवतरण गर्ने जनाइएको थियो । स्थानीयले सामाजिक सञ्जालमा राखेका भिडियोमा विमानका भग्नावशेषहरू पहाडमा यत्रतत्र छरिएका अवस्थामा देखिएका छन् । दुर्घटनाका कारणबारे यकिन भइसकेको छैन । चिनियाँ राष्ट्रपति सी चिनफिङले दुर्घटनाका कारण पत्ता लगाउन तत्काल अनुसन्धान गर्न आदेश दिएका छन् । दुर्घटनापछि चाइना इस्टर्न एयरलाइन्सले बोइङ–७३७–८०० विमानमार्फत दिँदै आएको सेवा स्थगित गरिएको जनाएको छ ।

दुर्घटना भएको स्थानमा आगोको ज्वाला र धूवाँको मुस्लो देखिएको छ । सीसीटीभीका अनुसार घटनास्थलमा परिचालित उद्धारकर्ताहरूले दुर्घटनापछि जंगलमा लागेको आगो निभाएका छन् । दुर्घटनापछि घटनास्थलमा ६ सयको संख्यामा उद्धार टोली खटाइएको छ ।

विमान कम्पनीले भने दुर्घटनाबारे कुनै प्रतिक्रिया जनाइसकेको छैन । दुर्घटनामा परेको जहाज सन् २०१५ को जुनदेखि मात्रै सञ्चालनमा आएको थियो । १६२ सिट क्षमताको जहाजमा बिजनेस क्लासका १२ सिट थिए ।

चाइना इस्टर्न चीनको तीनवटा ठूलामध्येको विमान सेवा कम्पनी हो । राम्रो सुरक्षा प्रत्याभूतिसहित सेवा सञ्चालन गर्ने चिनियाँ विमान निकै कम दुर्घटनामा पर्ने गरेका छन् । यसअघि चीनमा १२ वर्षअघि ठूलो हवाई दुर्घटना भएको थियो । २०१० को अगस्टमा भएको दुर्घटनामा ४२ जनाको मृत्यु भएको थियो ।

प्रकाशित : चैत्र ८, २०७८ १०:३६
पूरा पढ्नुहोस्
प्रतिक्रिया
पठाउनुहोस्
×