८ महिनामै मुलुकको व्यापार घाटा ११ खर्ब ६० अर्ब नाघ्यो 

सोही अवधिमा नेपालले जम्मा १ खर्ब ४७ अर्ब ७४ करोड रुपैयाँ बराबरको वस्तु निर्यात गरी आम्दानी गरेको छ । आयात गत वर्षको यसै अवधिको तुलनामा ३८.६४ प्रतिशत बढेको छ भने निर्यात ८२.९० प्रतिशतले बढेको तथ्यांक छ । पाम र सोयाविनको कच्चा तेल आयात भई प्रशोधन गरी पुन: निर्यात गरिँदा निर्यातको वृद्धिदर उच्च देखिएको हो । निर्यातमा प्रशोधित सोयाबिन तेल र पाम तेल सबैभन्दा अगाडि छन् । पहिलेदेखि नै ठूलो हिस्सा रहेको आयातमा ती कच्चा तेलको हिस्सा कम देखिन पुग्यो भने सानो आकारको निर्यातलाई त्यसले ठूलो वृद्धि दर देखाउन पुग्यो । तसर्थ यो निर्यातको वृद्धिदरलाई लिएर हौसिनुपर्ने अवस्था नरहेको जानकार बताउँछन् ।

८ महिनाको अवधिमा ७ खर्ब ९७ अर्ब रुपैयाँको वस्तु भारतबाट मात्रै आयात भएको छ । त्यस्तै १ खर्ब १८ अर्ब रुपैयाँ बराबरको निर्यात भारतमा मात्रै भएको छ । साे अवधिमा चीनबाट कुल १ खर्ब ८६ अर्ब रुपैयाँको वस्तु आयात भएको छ भने ५४ करोड रुपैयाँको वस्तु सो देशमा निर्यात भएको छ ।