चैतमा निक्षेपको ब्याजदर नबढ्ने

फाइनान्स कम्पनीहरुको छाता संगठन नेपाल वित्त कम्पनी संघले पनि आइतबार ब्याजदर नबढाउने निर्णय गर्ने स्रोतले बताएको छ । ‘वाणिज्य बैंक र विकास बैंकले ब्याजदर नबढाउने भएपछि वित्त कम्पनीले मात्र किन बढाउने भन्ने कुरा आएको छ,’ स्रोतले भन्यो, ‘फेरि बजार बिगार्नु पनि भएन ।’

यसरी चैत महिनाका लागि बैंक तथा वित्तीय संस्थाले सोमबार फागुनकै ब्याजदर प्रकाशित गर्ने छन् । जसअनुसार वाणिज्य बैंकहरुको हाल एक वर्षे मुद्दती निक्षेपमा अधिकतम ११.०३ प्रतिशत ब्याजदर तोकिएकाे छ । गत माघको तुलनामा फागुनमा बैंकहरुले मुद्दती निक्षेपको ब्याजदर ०.९८ प्रतिशत विन्दुले बढाएका थिए । यसका आधारमा यही फागुनमा वाणिज्य बैंकहरुमा संस्थागत एक वर्षे मुद्दती निक्षेपको अधिकतम ब्याजदर १०.०३ प्रतिशत र साधारण बचतको ६.०३ प्रतिशत कायम भएको छ । सहमति अनुसार नै बैंकहरुले नयाँ ब्याजदर प्रकाशित गर्ने भएकाले चैत महिनाका लागि पनि निक्षेपकर्ताले उल्लेखित ब्याजदर नै पाउने छन् ।

यस्तै, विकास बैंकहरुले पनि चैत महिनाका लागि एक वर्षे मुद्दती निक्षेपको ब्याजदर अधिकतम ११.५५ प्रतिशतमै स्थिर राख्दै छन् । यो दर फागुनकै हो । फागुन महिनामा फाइनान्स कम्पनीहरुले पनि निक्षेपको ब्याजदर एक प्रतिशत विन्दुले बढाएर ११.७१ प्रतिशत कायम गरेका थिए । उनीहरुले चैतमा पनि त्यही ब्याजदर प्रकाशित गर्ने स्रोतले बताएको छ ।