रेल उद्घाटन गर्न दुई मिति प्रस्ताव

भारत र नेपालका प्रधानमन्त्रीले भर्चुअल रूपमा उद्घाटन गर्ने भएकाले त्यही अनुसार मिति तय गर्न खोजिएको नेपाल रेलवे कम्पनीले जनाएको छ । कोंकणले भारतीय राजदूतावासलाई दुईवटा मिति तय गरेर पठाएको थियो । दूतावासले नेपाल सरकारबाट प्रस्ताव आउनुपर्ने बताएको कम्पनीका महाप्रबन्धक नीरञ्जन झाले जानकारी दिए ।

‘कोंकणले हामीसँग सल्लाह गरेरै उद्घाटनको मिति तय गरेर दुतावास पठाएको हो,’ झाले भने, ‘उद्घाटनका लागि हामी तयार छौं भनिसकेका छौँ ।’ अहिले चलाउन केही समस्या नरहेको उनले बताए । ‘भौतिक पूर्वाधार तथा यातायात मन्त्रालयमा कोंकणबाट आएको प्रस्ताव पेश गरेर चलाउने मिति तयार हुनेछ,’ उनले भने, ‘आइतबार मन्त्रालयलाई यसबारे औपचारिक रूपमा जानकारी गराउनेछौँ । दुईमध्ये एउटा मितिमा उद्घाटन हुन्छ, अब ढिलो गर्ने पक्षमा हामी छैनौँ ।’

१६ महिनाअघि भारतबाट ल्याइएका दुईवटा रेल सेट गत फागुन १ गतेदेखि यात्रुबिना नै परीक्षणका रूपमा सञ्चालनमा छ । रेल सञ्चालनको तालिम लिएका ६० जना नेपाली कर्मचारीहरू अहिले अभ्यास गरिहेका छन् । उनीहरूलाई प्राविधिक कुरा सिकाउन कोंकणबाट आएका १४ जना कर्मचारीले सहयोग गरिरहेका छन् ।

२६ जना भारतीय प्राविधिकमध्ये १४ जना अहिले आएका छन् भने बाँकी १२ जना रेल चल्ने बेलासम्म आइसक्ने झाको भनाइ छ । उनका अनुसार कुर्थादेखि जयनगरसम्म यात्रा गर्नेले सामान्य सिटको ७० रुपैयाँ र एसी सिटको ३ सय रुपैया तिर्नेगरी भाडादर कायम गरिएको छ ।