ट्याक्सीको नयाँ भाडादर कागजमै अड्कियो, मिटरमा पुरानै - अर्थ / वाणिज्य - कान्तिपुर समाचार

ट्याक्सीको नयाँ भाडादर कागजमै अड्कियो, मिटरमा पुरानै 

सीमा तामाङ

काठमाडौँ — माघदेखि लागू हुनेगरी ट्याक्सीमा सरकारले नयाँ भाडादर तोके पनि मिटर भने अझै अद्यावधिक हुन सकेको छैन । वाग्मती प्रदेशको मन्त्रीस्तरीय बैठकले पुस २० गते ट्याक्सीमा नयाँ भाडादरको निर्णय गरेको थियो । तर ट्याक्सीमा जडान गरिएका मिटरमा भने अहिले पनि पुरानै भाडादर कायम छ ।  


प्रदेशले फ्लाग डाउनमा ६० रुपैयाँ र सुरुको १ किलोमिटर यात्रा पश्चात प्रति २ सय मिटरको ९ रुपैयाँ ८० पैसाका दरले भाडादर समायोजन गरेको थियो । तर, भाडादर समायोजन भएपनि वेटिङ चार्ज र रात्रिकालीन समयको भाडादर स्पष्ट नहुनाले मिटर अद्यावधिक गर्न नसएिको गुणस्तर तथा नापतौल कार्यालयले जनाएको छ ।

‘वेटिङ चार्ज र रात्रिकालीन समयको भाडादर खुलाई दिन भन्दै श्रम, रोजगार तथा यातायात मन्त्रालयलाई पत्राचार गरेका छौं,’ कार्यालयका सहायक निरीक्षक रामप्रसाद लम्सालले भने, ‘पत्रबारे अहिलेसम्म केही जानकारी आएको छैन ।’ कार्यालयका मुख्य व्यक्तिहरुलाई कोरोना संक्रमण भएकाले यस विषयमा छलफल अघि बढाएपनि ठोस निर्णय भइनसकेको उनले सुनाए ।

प्रदेशले जारी गरेको सूचना र कार्यालयलाई पठाएको पत्रमा पहिलो १ किलोमिटरसम्म यात्राको सुरु फ्ल्याग डाउन ६० रुपैयाँ कायम भए पनि पहिलो किलोमिटमा हुनसक्ने वेटिङ चार्जबारे उल्लेख गरिएको छैन । त्यस्तै रात्रिकालीन समयको हकमा पनि भाडादरबारे खुलाइएको छैन । भाडादर समायोजन अघि फ्लाग डाउन १४ रुपैयाँ र प्रत्येक किलोमिटरमा ३९ रुपैयाँ कायम थियो ।

पुरानो भाडादर भन्दा पनि नयाँ भाडादरले ट्याक्सी चालक र व्यवसायी मारमा परेको उपत्यका ट्याक्सी व्यवसायी तथा चालक सेवा समाजका अध्यक्ष पुर्णलाल मोक्तानले बताए । ‘पहिला बस्नासाथ १४ रुपैयाँ उठ्थ्यो, त्यसपछि हरेक एक किलोमिटरमा ३९ रुपैयाँ थियो,’ उनले भने, ‘अहिले सुरुवाती कलसहित १ किलोमिटरसम्म ६० रुपैयाँ र त्यसपछि हरेक १ किलोमिटरमा ४९ रुपैयाँ कायम गरेको छ, हामीलाई उल्लु बनाउने काम भयो ।’

मन्त्रालायको भाडादर समायोजन समितिले नजानिँदो पारामा आफूहरुलाई घाटा लाग्नेगरी भाडादर बढाएको उनको आरोप छ । जुनसुकै देशमा अन्तर्राष्ट्रिय मापदण्ड अनुसार भाडा दर कायम भएपनि नेपालको हकमा नभएको उनले बताए । ‘सुरुवाती कलसहित ३ किलोमिटरसम्म एक सय ५० रुपैयाँ अनिवार्य गरी रनिङ चार्ज प्रत्येक एक किलोमिटरमा ४९ रुपैयाँ कायम गर्दा हुन्थ्यो, हाम्रो माग पनि यही हो,’ उनले भने, ‘ट्याक्सीमा नजिकको यात्रा गर्नेलाई महगों र टाढाको यात्रा गर्नेलाई सस्तो पर्थ्यो।’


प्रकाशित : माघ २, २०७८ १३:३८
प्रतिक्रिया
पठाउनुहोस्

आजदेखि अनलाइनबाट पुनः श्रम स्वीकृति जारी

रासस

काठमाडौँ — सरकारले सेवा प्रवाहलाई सूचनाप्रविधि मैत्री बनाउँदै लगेको छ । वैदेशिक रोजगार विभागअन्तर्गतको वैदेशिक रोजगार कार्यालय काठमाडौंले आजदेखि अनलाइन प्रणालीबाट पुनः श्रम स्वीकृति जारी गर्ने भएको छ । २०७७ पुसबाट भौतिक उपस्थिति र अनलाइन दुवै माध्यमबाट पुनः श्रम स्वीकृतिको काम हुँदै आएकामा आजदेखि अनलाइनबाट मात्र पुनः श्रम स्वीकृति जारी हुनेछ ।

श्रम स्वीकृतिलाई फेसलेस, पेपरलेस र क्यासलेस बनाइ छिटो, छरितो र पारदर्शी रुपमा गुनासोरहित सेवाप्रवाह गर्न अनलाइन प्रणालीबाट मात्र पुनः श्रम स्वीकृतिको काम गर्न लागिएको कार्यालयले जनाएको छ । श्रम, रोजगार तथा सामाजिक सुरक्षा मन्त्रालयले वैदेशिक रोजगारीमा जाने श्रमिकलाई बिना झन्झट आधुनिक प्रविधिको प्रयोग गरी सहज र सरल तरिकाबाट सेवा प्रदान गर्न निर्देशन गरेसँगै पुनः श्रम स्वीकृतिको काम अनलाइन प्रणालीबाट मात्र गर्न लागिएको वैदेशिक रोजगार कार्यालयका प्रमुख रमेश अर्यालले जानकारी दिए ।

कसरी लिने पुनः श्रम स्वीकृति ?

पुनः श्रम स्वीकृतिको अनलाइन सेवा लिन सेवाग्राहीले वैदेशिक रोजगार विभागको वेबसाइटको वैदेशिक रोजगार सूचना व्यवस्थापन प्रणालीमार्फत आवश्यक सबै कागजातसहित फाराम भर्नुपर्नेछ । यसका लागि सुरुमा विभागको वेबसाइटमा गएर अनलाइन श्रम स्वीकृतिमा क्लिक गर्नुपर्ने हुन्छ । अथवा सिधै वैदेशिक रोजगार सूचना व्यवस्थापन प्रणाली गएर पनि खोल्न सकिनेछ ।

श्रम स्वीकृतिको कागजात जाँच गर्दा कुनै कारणले आवेदन अस्वीकृत भएमा सो को कारणसहितको सूचना आवेदकको मोबाइल नम्बर र आवेदन गर्दाको युजर एकाउन्टमा जाने हुँदा आफ्नो व्यक्तिगत मोबाइल नम्बर र इमेल ठेगाना अनिवार्य रुपमा भर्नुपर्नेछ । युजरनेम र पासवर्ड प्रयोग गरी अर्कोपटक श्रम स्वीकृति लिन श्रम स्वीकृतिको अवस्था थाहा पाउन, विवरण हेर्न र उजुरी वा गुनासो गर्न सकिने भएकाले आवेदन गर्दाको युजरनेम र पासवर्ड सुरक्षित राख्नुपर्ने हुन्छ ।

अनलाइनमा कागजात जाँच गर्न समय लाग्ने भएकाले कम्तीमा तीन दिन अगाडि अनलाइन फाराम भर्न र श्रम स्वीकृति लिइसकेपछि मात्र हवाई टिकटको प्रबन्ध गर्न कार्यालयले आग्रह गरेको छ । उडान हुने मितिसम्म श्रम स्वीकृतिको म्याद ९० दिनभन्दा बढी हुनुपर्ने भएकाले सो बमोजिम भए नभएको यकिन गर्न पनि कार्यालयले भनेको छ ।

कार्यालयले संस्थागत श्रम स्वीकृति, पुनः श्रम स्वीकृति र व्यक्तिगत श्रम स्वीकृति दिने गरेको छ । संस्थागत श्रम स्वीकृतिका लागि सेवाग्राही कार्यालय आइरहनुपर्दैन, सम्बन्धित म्यानपावर व्यवसायी मात्र आउने गर्छन् । वैदेशिक रोजगार कार्यालयबाट चालु आर्थिक वर्षको पुससम्ममा पुनः श्रम स्वीकृतितर्फ करिब एक लाख जना, संस्थागततर्फ एक लाख ८० हजार र व्यक्तिगततर्फ आठ हजारभन्दा बढीले सेवा लिएको कार्यालयले जनाएको छ ।

प्रकाशित : माघ २, २०७८ १३:३२
पूरा पढ्नुहोस्
प्रतिक्रिया
पठाउनुहोस्
×