‘अमेरिकी लगानी र प्रविधि भित्र्याउने प्रयास गरियोस्’- अर्थ / वाणिज्य - कान्तिपुर समाचार

‘अमेरिकी लगानी र प्रविधि भित्र्याउने प्रयास गरियोस्’

रासस

काठमाडौँ — नेपाल उद्योग परिसङ्घले मुलुकमा प्रत्यक्ष विदेशी लगानी भित्र्याउन तथा निर्यात प्रवर्द्धनसँगै देशको पर्यटन विकासलाई केन्द्रमा राखेर काम गर्न अमेरिकाका लागि प्रस्तावित राजदूत श्रीधर खत्रीसँग आग्रह गरेको छ ।

परिसङ्घका अध्यक्ष विष्णुकुमार अग्रवाललगायत पदाधिकारीहरूसँग शुक्रबार भएको छलफलमा पस्मिना, तयारी पोशाक, छुर्पीजस्ता विशिष्टिकृत उत्पादनलाई अमेरिकी बजारसम्म सहज पहुँच स्थापित गर्न तथा बजार विस्तारमा भरमग्दुर प्रयासका लागि उनीसँग अनुरोध गरिएको हो ।

राष्ट्रको पर्यटन प्रवर्द्धन हुनेगरी अमेरिकाको तर्फबाट उच्चस्तरीय भ्रमणको प्रयास गर्न तथा नेपाल र अमेरिकाबीचको कूटनीतिक सम्बन्धलाई आर्थिक कुटनीतिका माध्यमबाट थप सबल बनाउनेतर्फ विशेष ध्यान दिन पनि परिसङ्घले अनुरोध गरेको छ ।

नेपाललाई विकासको पथमा अग्रसर गराउन गुणस्तरीय पूर्वाधार निर्माण पहिलो आवश्यकता भएकाले जलस्रोतसहित पर्यटन र सेवाका क्षेत्रमा अमेरिकी लगानी जुटाउने प्रयत्नका निम्ति पनि परिसङ्घले प्रस्तावित राजदूत खत्रीसमक्ष आग्रह गरेको छ ।

प्रकाशित : पुस ३०, २०७८ १६:१८
प्रतिक्रिया
पठाउनुहोस्

सत्ता कब्जापछि अफगानिस्तानमा पहिलो पटक खुल्यो एटीएम सेवा

रासस

काबुल — तालिबानले अफगानिस्तानको सत्ता कब्जामा लिएपछि पहिलो पटक शनिबारदेखि एटीएम सेवाहरू सञ्चालन हुन लागेको स्थानीय सञ्चारमाध्यमले जनाएका छन् ।

अफगानिस्तानको केन्द्रीय बैंक दा अफगानिस्तान बैंक (डीएबी)ले बिहीबार विज्ञप्तिमार्फत देशका वाणिज्य बैंकहरूद्वारा एटीएम सेवाहरू पुनः सञ्चालन गरिने जनाएको खामा प्रेसले उल्लेख गरेको छ । सहकारीसँगको वार्तापछि यो निर्णय भएको जनाइएको छ ।

सन् २०२१ अगस्टमा तालिबानले अफगानिस्तानको सत्ता कब्जामा लिएपछि एटीएम सेवाहरू बन्द भएका थिए ।

‘बैंकिङ प्रणाली र सेवाहरू सामान्य अवस्थामा फर्काउन दा अफगानिस्तान बैंक प्रयासरत छ,’ बैंकद्वारा जारी विज्ञप्तिमा भनिएको छ । एटीएमहरू पुन: सुचारु हुन थालेपछि मानिसहरूलाई थप सुविधा मिल्ने बैंकले विश्वास लिएको छ ।

जनताको सुविधाका लागि वाणिज्य बैंकका एटीएम विशेष क्षेत्रमा उपलब्ध हुनेछन् । यद्यपि बैंकले निश्चित रकम झिक्न प्रतिबन्ध कायमै रहेकाले झिक्ने रकमको सीमा भने उल्लेख नगरिएको खामा प्रेसले जनाएको छ ।

नयाँ नीतिअनुसार एक व्यक्तिले हप्तामा दुई सय अमेरिकी डलर (२० हजार अफगानी रकम) झिक्न सक्नेछन् ।

प्रकाशित : पुस ३०, २०७८ १४:०५
पूरा पढ्नुहोस्
प्रतिक्रिया
पठाउनुहोस्
×