पाँच दिनदेखि ठप्प जोगबनी नाकाबाट आयात–निर्यात सुरु
विराटनगर — भारतको बथनास्थित मिरगञ्ज पुल भासिएपछि पाँच दिनदेखि ठप्प जोगबनी नाकाको आयात निर्यात बुधबारदेखि भण्टाबारी नाकाबाट सुरु भएको छ ।
नेपाली पक्षको आग्रहमा भारतले मंगलबार सुपोल जिल्लाअन्तर्गत वीरपुर नाका प्रयोग गर्न अनुमति दिएपछि वीरपुर हुँदै भण्टाबारी नाकाबाट आयात–निर्यात सुरु भएको विराटनगर भन्सारका अधिकृत अमित तिवारीले बताए । उनका अनुसार भण्टाबारीदेखि विराटनगरको आईसीपीसम्म मालवाहक गाडीलाई स्कर्टिङ गरेर ल्याउनु पर्ने स्थिति छ ।
जोगबनी नाकाबाट हुने आयात–निर्यातको मुख्य मार्गमा पर्ने मिरगञ्ज पुल भासिएपछि अररिया प्रशासनले गत शुक्रबार उक्त पुलबाट साना–ठूला ढुवानीका साधन गुड्न रोक लगाएपछि निकासी पैठारी मंगलबारसम्म ठप्प भएको थियो । पाँच दिनपछि सुनसरी मोरङ औद्योगिक क्षेत्रका उद्योगका लागि कच्चा पदार्थ लिएर आएका १ हजार ५ सयभन्दा बढी मालवाहक ट्रक र कन्टेनर भारतीय सडकमै रोकिएका थिए ।
विराटनगर भन्सार कार्यालय प्रमुख ताराप्रसाद सापकोटाका अनुसार भारतको वीरपुर र सुनसरीको भण्टाबारी नाका हँुदै विराटनगरको आईसीपीसम्म आइपुग्दा मालवाहकलाई झन्डै ११६ किलोमिटरको यात्रा तय गर्नु पर्छ । ४ वर्षअघि पनि मिरगञ्जको पुल भासिँदा भारतले वीरपुर हुँदै मालवाहक सवारीलाई भण्टावारी नाकाबाटै नेपाल प्रवेश दिइएको थियो ।
भण्टाबारी नाका हुँदै नेपाल प्रवेश गर्ने मालवाहक ढुवानीका साधन सीधै विराटनगरको आईसीपी आएर मात्र भन्सार जाँच गराउने छन् । ती मालवाहक साधनले भण्टाबारी भन्सारमा जाँच गर्न नमिल्ने सापकोटाले बताए । विराटनगर भन्सारले दैनिक १५ करोड रुपैयाँ राजस्व असुली गर्दै आएको छ ।
प्रकाशित : पुस २८, २०७८ ११:३४