जापानद्वारा कृषि तथा पशुपन्छी तालिम केन्द्र हस्तान्तरण- अन्य - कान्तिपुर समाचार

जापानद्वारा कृषि तथा पशुपन्छी तालिम केन्द्र हस्तान्तरण

कान्तिपुर संवाददाता

काठमाडौँ — जापान सरकारले काभ्रेमा निर्माण गरेको कृषि तथा पशुपन्छी तालिम केन्द्रको नव निर्मित भवन लभ ग्रिन नेपाल(एलजीएन)लाई हस्तान्तरण गरेको छ । मंगलबार आयोजित कार्यक्रममा नेपालका लागि जापानी राजदूत किकुता युताकाले भवन हस्तान्तरण गरेका हुन् । जापान सरकारको ग्रासरुट ह्युम्यान सेक्युरिटी प्रोजेक्ट अन्तर्गत ८५ हजार अमेरिकी डलरमा सो भवन निर्माण गरिएको छ ।

सो अवसरमा सम्बोधन गर्दै नेपालका लागि जापानी राजदूत किकुताले नवनिर्मित तालिम केन्द्र समुदायको सम्पत्ति हुने र स्थानीय जनताको सेवा गर्ने विश्वास लिएको बताए । 'जापानमा अध्ययन गर्न नेपाली विद्यार्थीहरुको पहिलो समूह जापान गएको १ सय २० औं वार्षिकोत्सवको अवसरमा यो एउटा राम्रो परियोजना बनाइएको हो' राजदूत किकुताले भने ।

लभ ग्रिनले काभ्रेको पाँचखाल नगरपालिकामा विगतदेखि नै स्थानीय किसानलाई लक्षित गरेर तालिमहरु सञ्चालन गर्दै आइरहेको छ । जापानी दूतावासले जापान र नेपालका जनताको मित्रतालाई यसले झनै अभिवृद्धि गर्ने विश्वास व्यक्त गरेको छ ।


प्रकाशित : जेष्ठ ३१, २०७९ १६:१५
प्रतिक्रिया
पठाउनुहोस्

पाती झार अनुसन्धानकर्तालाई अन्तर्राष्ट्रिय पुरस्कार

कान्तिपुर संवाददाता

नेपालको रैथाने वनस्पति र समग्र जैविक विविधताकै लागि खतरा बनेको पाती झार नियन्त्रण र अनुसन्धानमा सहयोग पुर्‍याएबापत नेपाली वैज्ञानिक सीर्जना महर्जन अन्तर्राष्ट्रिय अवार्डबाट सम्मानित हुने भएकी छन्  । अमेरिकी राष्ट्रपतिले खाद्य तथा कृषि सुरक्षाका लागि गठन गरेको ७ सदस्यीय विज्ञ सल्लाहकार समिति बिफाड (बोर्ड फर इन्टरनेसनल फुड एन्ड एग्रिकल्चर डेभलपमेन्ट) ले महर्जनलाई बिफाड स्टुडेन्ट अवार्ड–२०२१ दिने निर्णय गरेको हो  ।

वनस्पति विभागमा वैज्ञानिक अधिकृतका रूपमा कार्यरत महर्जनले सन् २०२१ मा पातीझारमाथि विद्यावारिधि पूरा गरेकी छन् ।
झट्ट हेर्दा तीतेपातीजस्तै देखिने यो झार २ मिटरसम्मको अग्लो हुन्छ । खेतबारी, सार्वजनिक स्थान, खुला क्षेत्र जताततै देखिने यो झारबाट निस्कने ‘एलोपेथिक रसायन’ ले माटोको अम्लीयपनालाई फेरबदल गर्छ, जसकारण अन्य बिरुवा उम्रन पाउँदैनन् ।

महर्जनले यही झारको नियन्त्रणका लागि प्रयोग गर्नुपर्ने जैविक उपायबारे अनुसन्धान गरेकी हुन् । झार नियन्त्रणका लागि उनले नेपालमा दुई वटा जैविक उपाय प्रभावकारी हुन सक्ने जनाएकी छन् ।

ढुसी र खबटे किरा प्रयोग गरेर नियन्त्रणमा गर्न सकिने उनको अनुसन्धानले देखाएको छ । ‘जाइगोग्रामा बाइकोलोरटा प्यालिस्टर (लिफ इटिङ बिटल) भनिने एक प्रकारको खबटे किरा र विन्टर रस्ट भनिने ‘पक्सिनिया’ ढुसीको माध्यमबाट झार नियन्त्रण गर्न सकिने अनुसन्धानमा उल्लेख छ ।

यो पनि पढ्नुहोस्ः

३० वर्षमा ६४ गुणाले फैलियो मिचाहा पाती झार

प्रकाशित : जेष्ठ ३१, २०७९ १६:०९
पूरा पढ्नुहोस्
प्रतिक्रिया
पठाउनुहोस्
×